Azər Həsrət: “Türkiyə cəmiyyətinin böyük əksəriyyəti siyasətdən uzaqdır, hətta Pakistan-Hindistan münaqişəsindən xəbəri belə yoxdur”
Hindistan və Pakistan arasında silahlı qarşıdurma genişlənib. Artıq qarşılıqlı zərbələr endirilir və sistemi döyüşlər gedir. Məlum hadisədə Azərbaycan və Türkiyə Pakistana dəstək oldu. Bu isə Hindistanın narazılığına səbəb oldu.
Hətta Hindistanın rəsmiləri Azərbaycan və Türkiyəyə səfər etməməyə, bu ölkələrin mallarını almamağa çağırış edib. Demək olar ki, Hindistan Azərbaycan və Türkiyə ilə bütün əlaqələri kəsdi.
Ancaq maraqlı məqam ondan ibarətdir ki, Türkiyədə hələ də hind filmləri yayımlanır. Onların bu cür münasibəti qarşılığında hələ də türk kanallarında hind filmləri nümayiş olunur. Bu nə dərəcədə düzgündür?
“Qardaş ölkədə hələ də hind filmlərinin yayılması problemli məsələ deyil, çünki ictimaiyyətin məlum məsələdən elə də dərin məlumatı yoxdur”
Siyasi şərhçi Azər Həsrət “Bakı-Xəbər”ə şərhində bildirdi ki, Pakistanla Hindistan arasında olan münasibətə görə Azərbaycan və Türkiyəyə yüklənmək, üstünə getmək doğru deyil: “Nəzərə almaq lazımdır ki, Azərbaycan və Türkiyə Hindistana qoşun, silah göndərmir. Azərbaycanın ictimai rəyi Pakistanın tərəfindədir. Əslində Hindistan buna irad bildirməməlidir. Azərbaycan və Türkiyə Pakistanın yanındadır, bu bizim vəfa borcumuzdur. Hindistan Ermənistana silah satanda biz bununla bağlı heç bir çağırış etmədik, əlaqələri kəsmədik, sanksiyaların tətbiqi ilə bağlı fikirlər səsləndirmədik. Sadəcə narazılığımızı bildirdik. Bu səbəbdən də hesab edirəm ki, Hindistan tərəfindən bu kimi addımları atanlar çox cılız davranış sərgiləyir. Biz ordumuzla Pakistanın yanında olsaydıq, o zaman Hindistanın davranışlarını başa düşə bilərdik. Bu cür cılız, xırda yanaşmalarla dövlət idarə etmək olmaz”.
Həmsöhbətimiz hesab edir ki, qardaş ölkədə hələ də hind filmlərinin yayılması problemli məsələ deyil: “Çünki ictimaiyyətin məlum məsələdən elə də dərin məlumatı yoxdur. Türkiyə cəmiyyətində siyasi avtivlik elə də geniş deyil. Cəmiyyətin böyük əksəriyyəti siyasətdən uzaqdır, əksəriyyətinin Pakistan-Hindistan münaqişəsindən xəbəri belə yoxdur. Belə olan halda o adamlara niyə hind filmləri yayımlayırsız və ya niyə baxırsız demək düzgün deyil. Azərbaycan cəmiyyəti bu kimi məsələlərə ağıllı və təmkinli yanaşır”.
Günel CƏLİLOVA
