İlham Əliyev bəzi neft-qaz ölkələrinin böyük səhvini açıqladı - “biz qazı artırırıq, lakin...”
Fuad İbrahimov: “Məsələlərə rasional yanaşma olmalıdır”
Prezident İlham Əliyev 30-cu “Caspian Oil and Gas”, 13-cü “Caspian Power” və 30-cu “Baku Energy Forum”un rəsmi açılış mərasimində çıxışında deyib ki, bəzi ölkələrdə bu gün qazıntı yanacağı növləri ilə “yaşıl enerji” arasında olan balans nəzərə alınmır:
“Nəticədə genişmiqyaslı enerji kəsilməsi, enerji sisteminin çökməsi baş verir. Həmçinin burada daha mürəkkəb ssenarilər də baş verə bilər. Yəni bəzi müəyyən addımları şərtləndirən meyllərə rəğmən həmin balansın qorunması düzgün siyasətdir. Azərbaycana gəldikdə, biz təbii qazın hasilatının həcmini artırırıq. Çünki buna ehtiyacı olan ölkələr var və biz bu tələbatı ödəməliyik. Eyni zamanda, biz tərəfdaşlarımızla birlikdə yaşıl enerji layihələrinə də yatırım edirik”.
“Ənənəvi enerji ilə “yaşıl enerji” arasında balans qorunmalıdır”
Sözügedən məsələni “Bakı-Xəbər”ə şərh edən iqtisadçı-ekspert Fuad İbrahimovun fikrincə, Prezidentin yanaşması iqtisadi və siyasi reallığı əks etdirir: “1914-cü ildə Birinci Dünya müharibəsi ərəfəsində Almaniya kansleri hərbi texnikaların hərəkətini görərkən demişdi ki, daş kömür erası bitdi. Tankların ortaya çıxması, digər hərbi nəqliyyat vasitələrinin yaranması yeni reallıqlar yaratmışdı. Ancaq üstündən 1 əsr keçsə də, yenə də daş kömürün bazarı var. İndi bəzi beynəlxalq təsisatlar ətraf mühitin mühafizəsi ilə əlaqədar qazıntı yanacağından imtina etməkdən bəhs edirlər. Ancaq reallıqda bu mümkün deyil. Bəli, alternativ və “yaşıl enerji” mənbələrinə maraq, keçid artır. Ancaq bu mənbələr yaxın perspektivdə qazıntı yanacağını əvəz edə bilməyəcəklər. Çünki bu mümkün deyil. Ona görə ki, bu, insanın yaşamaq gündəmini bahalaşdırır. İnsanın yaşamağı üçün həyat şərtlərini bahalaşdırır. Aydın məsələdir ki, belə olan halda birbaşa keçid belə ola bilməz. Azərbaycanın “yaşıl enerji” ilə bağlı kifayət qədər potensialı var. Nəinki ölkədaxili tələbatı ödəmək üçün, ixrac üçün də ciddi potensial mövcuddur. Ancaq elə ölkələr var ki, qazıntı yanacağı xaric, “yaşıl enerji” potensialı yoxdur və yaxud da məhduddur. Yaxşı, bəs həmin ölkələr nə etsin? Ona görə də məsələlərə rasional yanaşma olmalıdır. Ənənəvi enerji ilə “yaşıl enerji” arasında balans qorunmalıdır. Bir məqamı nəzərə almaq lazımdır ki, Donald Tramp prezident seçiləndən sonra Birləşmiş Ştatların müsbət mənada ənənəvi enerjiyə münasibəti dəyişdi. Hasilatın artırılması istiqamətində çağırışlar artır. Bu isə o deməkdir ki, hələ “yaşıl enerji” mənbələrinə keçid müəyyən vaxt aparacaq. Bu nöqteyi-nəzərdən Prezident Əliyevin çıxışları həm humanistdir, həm də xoş qonşuluq siyasətini nümayiş etdirir. Bütün bunlar nəticə etibarı ilə bizim iqtisadi dövriyyəmizə ancaq müsbət təsir edir. Başqa bir tərəfdən, paralel şəkildə ətraf mühitin mühafizəsi ilə bağlı biz öz tədbirlərimizi görürük. Ən müasir avadanlıqlara yeri gələndə önəm veririk ki, ətraf mühitə maksimal şəkildə ziyan dəyməsin”.
Vidadi ORDAHALLI
