Bəhruz Quliyev: “Bu addım heç də diplomatik deyil, daha çox siyasi təxribat xarakteri daşıyır”
Məlum olduğu kimi, Ermənistanın Sünik rayonunun Gorus şəhərində (Zəngəzur) Fransanın fəxri konsulluğunun nəhayət ki, açılışı olub. Fəxri konsul vəzifəsinə Gorusdakı Frankofoniya mərkəzinin direktoru Karmen Apunts təyin edilib.
Ermənistan xarici işlər nazirinin müavininin sözlərinə görə, sabit sülhün təminatı həm də iqtisadi qarşılıqlı əlaqə və regional əməkdaşlıqdır ki, bu da regionda qarşılıqlı etimad mühitinin formalaşmasına töhfə verəcək.
Göründüyü kimi, Qərbi Zəngəzurda davam edən konsulluq yarışında Fransa İrandan sonra nəticə əldə edən ikinci ölkə oldu. İranın orada konsulluğu 2022-ci ilin dekabrında fəaliyyətə başlayıb. Burada sual doğuran bir məqam var: Fransanın konsulluğu hansı fəaliyyəti göstərəcək? Konsulluq missiyasının təmsil etdiyi ölkənin vətəndaşları ilə işləmək olduğu və Zəngəzur bölgəsində Fransa vətəndaşlarının yaşamadığı faktı fonunda da bu sual aktuallaşır.
“Buradakı missiya daha çox regionda sabitliyi pozmağa yönəlmiş siyasi mövqe nümayişidir”
Sözügedən məsələyə aydınlıq gətirən “SƏS” Media Qrupunun rəhbəri, politoloq Bəhruz Quliyev “Bakı-Xəbər”ə açıqlamasında buna bir neçə aspektdən yanaşdı: “Son zamanlar Qərbi Zəngəzurda baş verən geosiyasi proseslər, xüsusilə də Fransanın bölgədə konsulluq açması ciddi suallar doğurur. Nəzərə almaq lazımdır ki, konsulluq diplomatik institut olaraq əsasən həmin ölkənin vətəndaşlarının hüquqlarını qorumağa və konsulluq-hüquqi xidmətlər göstərməyə hesablanıb. Bəs görəsən, Zəngəzurda fransız vətəndaşları yaşamadığı halda, bu konsulluq konkret olaraq hansı vəzifəni icra edəcək? Əslində, bu addım heç də diplomatik deyil, daha çox siyasi nümayiş və təxribat xarakteri daşıyır. Fransa regionda Ermənistanın havadarlığını davam etdirərək, öz təsir imkanlarını genişləndirməyə, Cənubi Qafqazda geosiyasi manevr meydanı qurmağa çalışır. Bu, sadəcə konsulluq deyil - bu, bir informasiya və təsir məntəqəsidir. Fransa burada nə “turist” axtarır, nə də “təhsil” mübadiləsi aparır. Buradakı missiya daha çox regionda sabitliyi pozmağa yönəlmiş siyasi mövqe nümayişidir. Fransanın bu addımı həm beynəlxalq hüquqa, həm də bölgənin reallıqlarına ziddir. Azərbaycan dövləti hər zaman öz suverenliyinə hörmət tələb edib və bundan sonra da bu cür manipulyativ addımlara qarşı qətiyyətli mövqeyini ortaya qoyacaq. Unutmaq olmaz ki, Qərbi Zəngəzur tarixi Azərbaycan torpağıdır. Burada hansısa ölkənin diplomatik vitrin altında geosiyasi oyun qurması regionda sülhə və əməkdaşlığa deyil, gərginliyə xidmət edir”.
Vidadi ORDAHALLI
