Qərbi Azərbaycan Xronikası layihəsi çərçivəsində növbəti verilişin qonağı olan Milli Məclisin Elm və təhsil komitəsinin sədr müavini, ADA Universitetinin prorektoru Fariz İsmayılzadə musahibəsində deyib ki, Türkiyədə Qərbi Azərbaycan məsələsinə ikili münasibət var.
Amma bu, çap mediasında ötəri bir fikir kimi keçir, heç bir aydınlıq gətirilməyib.
İstədik ki, bu barədə fikir müəllifi özü bizə danışsın, aydınlıq gətirsin görək, nə mənada Türkiyədə Qərbi Azərbaycan məsələsinə ikili münasibət var.
Fariz İsmayılzadə: "Deyirlər ki, Qarabağ müharibəsi artıq bitdi, biz bundan sonra gərək sülh barədə danışaq, belə problemləri qabartmayaq"
Baki-xeber.com-un müxbirlərinin cəhdlərinə baxmayaraq, deputat Fariz İsmayılzadə yazılı mediada daha çox oxucu diqqəti çəkən bu bir cümləlik fikrinə şərh verməkdən imtina etdi. Amma sözügedən verlişin youtube üzərindən yayımlanan tam versiyasını izlədikdə bu fikrin şərhi elə deputatın dilindən səslənir. Sadəcə bu, yazılı mediada izahsız yayılıb.
Belə ki, aparıcı Rufiq İsmayılovun "Türkiyə ictimaiyyətəinin Qərbi Azərbaycan mövzusuna münasibəti necədir, bununla bağli konfrans müddətində nələri müşahidə etdiniz" sualını cavablandıran Milli Məclisin Elm və təhsil komitəsının sədr müavini, ADA Universitetinin prorektoru Fariz İsmayılzadə deyib: "Turkiyədə Qərbi Azərbaycan mövzusuna ikili münasibət var. Bir tərəfdən Türkiyə siyasətçiləri sülhün, barışın tərəfdarı olduqlarını bəyan edir, deyirlər ki, Qarabağ müharibəsi artıq bitdi, biz bundan sonra gərək sülh barədə danışaq, belə problemləri (Qərbi Azərbaycan mövzusunu -red. A.N.) qabartmayaq. Amma digər tərəfdən Qərbi Azərbaycanda olan deportasiyalar, xüsusilə 20-ci əsrdə Azərbaycan xalqının bir neçə dəfə qovulmasını öyrəndikcə, Türkiyədə buna maraq daha çox artır. Həmin kəsimdən olan Türkiyə siyasətçiləri və allimləri hesab edir ki, biz susmamalıyıq, biz bu məsələni qaldırmalıyıq və işıqlandırmalıyıq. Düzdür, Cənubi Qafqazda sülh prosesi istiqamətində müəyyən danışıqlar aparılır, amma tarixi unutmamalıyıq. Tariximizi unutsaq gələcəyimizi görə bilmərik. Məsələyə bu cür ikili münasibət var. Bizim vəzifəmiz odur ki, onları məlumatlandıraq və geniş təbliğat kampaniyaları aparaq ki, Türkiyə siyasətçiləri bu mövzunu daha ətraflı bilsinlər. Onlar özləri də etiraf edirdilər ki, bu mövzunu dərindən bilmirlər".
Doğrudanmı biz sülh naminə Qərbi Azərbaycan məsələsini unutmalıyıq, Ermənistandan qovulmuş soydaşlarımızın qayıdışına çalışmamalıyıq?
Mübariz Göyüşlü: "Biz indiki Ermənistandan - Qərbi Azərbaycandan qovulmuş soydaşlarımızın öz ata-baba yurduna qayıtmasına nail olacağıq"
Baki-xeber.com saytının sualını cavablandıran Cross Media Təhlil Mərkəzinin analitiki, siyasi şərhçi Mübariz Göyüşlü bildirdi ki, sülh və ya daha vacib məsələlərə görə Azərbaycan cəmiyyəti Qərbi Azərbaycan məsələsini unuda bilməz: "Bu, Azərbaycan xalqının və dövlətinin prioritetlərindən biridir. Biz həm dövlət, həm də cəmiyyət olaraq bu istiqamətdə fəaliyyətimizi əzimlə davam etdirməliyik. Bu istiqamətdə hazırda Qərbi Azərbaycan İcmasi daha intensiv fəaliyyət göstərir. Cəmiyyətdə bu mövzunun qabardılmasına sosial sifariş var. Əgər Türkiyədə və ya başqa ölkədə bu mövzuya fərqli yanaşma varsa, bu yalnız məlumatsızlıq, bilginin az olması ilə bağlıdır. Ona görə də biz bu istiqamətdə daha davamli, daha intensiv işləməliyik.
Qarabağ məsələsini necə təbliğ edirdiksə, Qərbi Azərbaycan məsələsini də o səviyyədə təbliğ etməliyik. Fərqli cəhət odur ki, bunun üçün müharibəyə ehtiyac yoxdur. Amma dinc şəraitdə biz Qərbi Azərbaycana qayıtmağı bir hədəf kimi seçmişik. Bu istiqamətdə çox ciddi mübarizə gedir.
Biz indiki Ermənistandan - Qərbi Azərbaycandan qovulmuş soydaşlarımızın öz ata-baba yurduna qayıtmasına nail olacağıq. Sülh prosesi isə bu işə mane olmur".
Akif NƏSİRLİ
