Ramil Hüseynov: “... sülh sazişi müqabilində bu düzəliş birdəfəlik ləğv edilə bilər”
“Mən ümid edirəm ki, münasibətlərimizin inkişafı “907-ci düzəliş” olmadan davam edəcək”. Bunu “Diplomatic Watch” nəşrinə müsahibəsində Azərbaycanın ABŞ-dakı fövqəladə və səlahiyyətli səfiri Xəzər İbrahim bildirib.
Səfir bu düzəlişin tətbiqi məsələsinin nə ABŞ-ın milli təhlükəsizlik, nə də beynəlxalq münasibətlər və ya beynəlxalq siyasətlə bağlı olduğunu vurğulayıb: “Sözügedən düzəliş Azərbaycanın əraziləri işğal altında olduğu bir vaxtda, etnik təmizləmələr törədilərkən qüvvəyə minmişdi. Bəzi konqresmenlər isə yeni Administrasiyanı “907-ci düzəliş”in qüvvədə qalmasına təhrik etmək istəyir. Bu, onların daxili işidir. ABŞ-ın regiondakı strateji maraqlarını nəzərə alaraq demək olar ki, belə bir maneənin aradan qaldırılması həlledici rol oynaya bilər. Azərbaycan ABŞ üçün önəmli olan bütün məsələlərdə müəyyən rola malikdir. Ölkəmiz üçün ABŞ təkcə qlobal supergüc olması ilə deyil, həm də ortaq maraq və dəyərlərin mövcudluğu səbəbindən vacib ölkədir”.
Belə görünür ki, düzəlişin ləğvi ilə bağlı hansısa proses gedir.
“Nəzərə alsaq ki, Tramp administrasiyası üçün Azərbaycanın önəmi artıb, belə bir qərar verilə bilər”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, “907-ci düzəliş”in qüvvədən salınması ilə bağlı həm gözləntilər artır, həm də bəzi proseslərin getdiyi hiss olunur: “Əvvəla, bu bədnam düzəliş 1992-ci ilin oktyabrında əsasən Demokratlar Partiyasını təmsil edən konqresmenlərin təşəbbüsü ilə qəbul edilib. O zaman hakimiyyətdə Respublikaçılar Partiyası olsa da, Konqresdə Demokratlar çoxluqda idilər. Onların da erməni lobbisi ilə yaxınlığı ənənəvi hal alıb. 1993-cü ildə ABŞ-da Demokratlar hakimiyyətə gələndən sonra ərazilərimizin böyük hissəsi məhz Rusiyanın yardımı ilə Ermənistan tərəfindən işğal edildi. ABŞ fövqəldövlət olaraq buna əngəl ola bilərdi, amma hakimiyyətə gələn qüvvələrin erməni lobbisi ilə yaxınlığı buna mane oldu. Maraqlıdır ki, Respublikaçılar 2001-ci ildə hakimiyyətə gələndən sonra “907-ci düzəliş” hər il ABŞ prezidenti tərəfindən donduruldu. Həmçinin 2020-ci ildə 44 günlük müharibə zamanı Azərbaycan ərazilərini azad edəndə ABŞ-da hakimiyyətdə Respublikaçılar Partiyası idi. Bütün bunlardan çıxış edərək böyük gözlənti və ümid var ki, bu düzəliş birdəfəlik ləğv ediləcək. Çünki bunun qalması üçün hansısa əsas yoxdur. Qarabağ münaqişəsi ortadan qalxıb, Azərbaycan ərazi bütövlüyünü təmin edib, Ermənistanla imzalanacaq sülh sazişinin maddələri razılaşdırılıb. Üstəlik, hakimiyyətdə yenə Respublikaçılardır. Bütün bunlar düzəlişin birdəfəlik ləğvini şərtləndirir. Nəzərə alsaq ki, Tramp administrasiyası üçün Azərbaycanın önəmi artıb, belə bir qərar verilə bilər. Çox güman ki, sülh sazişi müqabilində bu düzəliş birdəfəlik ləğv ediləcək. Fikrimcə, ABŞ-ın istəyi bu yöndədir. Ancaq bu, təkcə bizdən asılı olan məsələ deyil. Ermənistan gərək Azərbaycanın sülh sazişi ilə bağlı məlum 2 şərtini yerinə yetirsin”.
Vidadi ORDAHALLI
