Paşinyan seçki ərəfəsində öz partiya yoldaşını polis rəisi qoydu - repressiya artacaq...
Tural İsmayılov: “Paşinyanın öz partiya üzvünü polis rəhbərliyinə gətirməsi seçki ərəfəsində təkcə kadr dəyişikliyi deyil, həm də siyasi nəzarətin gücləndirilməsi cəhdidir”
Ermənistanın baş naziri Nikol Paşinyan qarşıdakı seçkilərdə qalib gəlmək üçün indidən bir sıra tədbirlər görür, öz kadrlarını hüquq-mühafizə orqanlarında, güc qurumlarda yerləşdirir. Bu günlərdə o, Lori vilayətinin keçmiş qubernatoru Aram Kazaryanı Ermənistan polisinin rəisi təyin edib.
Kazaryan qubernator vəzifəsindən çıxarlaraq polis rəisi postuna gətirilib. Bu barədə Ermənistanın Daxili İşlər Nazirliyinin mətbuat xidmətindən verilən məlumata görə, iyunun 3-də baş nazir Nikol Paşinyanın qərarı ilə Aram Qazaryan polis rəisi, daxili işlər nazirinin müavini təyin edilib”.
Paşinyan öz adamını və partiyasının üzvünü polis rəisi qoyub. Bu da ondan irəli gəlir ki, o, seçki ərəfəsində öz daxili vəziyyətini bərkidir.
“Paşinyan seçki müstəvisini inzibati resurslarla kontrol altına almaq istəyir”
Politoloq Tural İsmayılov bu barədə “Bakı-Xəbər”ə bildirdi ki, Ermənistanda siyasi idarəetmənin avtoritar çalarlar daşıdığı bir daha təsdiqini tapır: “Paşinyanın öz partiya üzvünü polis rəhbərliyinə gətirməsi seçki ərəfəsində təkcə kadr dəyişikliyi deyil, həm də siyasi nəzarətin gücləndirilməsi cəhdidir. Bu qərar ölkədə hüquq-mühafizə orqanlarının tamamilə siyasi hakimiyyətin uzantısına çevrilməsi prosesini sürətləndirir. Ermənistan hakimiyyəti demokratik institutların formallığa çevrildiyi bir model qurur.
Siyasi rəqabət, müstəqil məhkəmə və obyektiv hüquq-mühafizə sistemi Paşinyanın siyasi gündəliyində yoxdur. Onun üçün prioritet daxildə səsləri boğmaq və kənardan gələn təzyiqləri öz lehinə yönəltməkdir. Polis rəhbərliyinə özünün siyasi komandasından təyinat verməsi əslində seçkiyə gedərkən cəmiyyətə bir xəbərdarlıq mesajıdır”.
T.İsmayılovun fikrincə, bu, həm də Ermənistanda demokratik şüurun inkişafına açıq şəkildə zərbədir. Politoloqun sözlərinə görə, cəmiyyətin müxtəlif təbəqələri artıq polis aparatına güvənmir, onu siyasi sifariş aləti kimi görür: “Paşinyan seçki müstəvisini inzibati resurslarla kontrol altına almaq istəyir. Bu, postsovet məkanında tez-tez rast gəlinən avtoritar ssenarilərin Ermənistan versiyasıdır.
Ermənistanın özünü demokratik Qərb dəyərlərinə yaxın göstərməsi bu davranışla tam ziddiyyət təşkil edir. Rəsmi İrəvan sözdə demokratiya deyir, əməldə isə siyasi inhisarçılıq qurur. Hüquqi dövlət prinsipləri təbliğat vasitəsinə çevrilib.
Əslində bu, həm də Ermənistanın daxili zəifliyini etiraf etməsi deməkdir. Hakimiyyət xalqın deyil, yalnız özünün iradəsini təmin etmək üçün hüquq-mühafizə sistemindən istifadə edir. Bu cür tendensiya isə nə daxili sabitlik, nə də regional inteqrasiya üçün faydalıdır”.
İradə SARIYEVA
