Ramil Məmmədli: "Bu razılaşmadan sonra Fransa Ermənistana yeni müasir silahlar verəcək"
Fransa müdafiə və təhlükəsizlik sahəsində Ermənistanla əməkdaşlığı davam etdirəcək. İrəvana rəsmi səfərə gəlmiş Frnsanın Xarici işlər naziri Stefan Sejurne ermənistanlı həmkarı Ararat Mirzoyanla görüşdə belə vəd verib.
İndiki Fransa hakimiyyətinin Azərbaycana qarşı düşmənçilik siyasətinin bariz nümunəsi kimi Sejurne erməni həmkarı ilə keçirdiyi birgə mətbuat konfrnasında Qarabağ bölgəsini könüllü tərk etmiş ermənilər üçün Parisin 29 milyon avro yardım ayıracağını da açıqlayıb. Sejurne həmçinin qeyd edib ki, Fransa Ermənistanla müdafiə sahəsində əməkdaşlığı davam etdirəcək: "Ermənistan öz ərazisini, bütövlüyünü və əhalisini qorumağı bacarmalıdır. İki ölkənin müdafiə sahəsində əməkdaşlığı regionda vəziyyəti gərginləşdirməyə yönəlməyib, heç kimin belə niyyəti yoxdur".
Bundan başqa, "Hindustan Times" qəzeti yazır ki, Hindistan Ermənistanda Rusiya istehsalı olan Su-30 qırıcı təyyarələrini modernləşdirəcək. Hindistanın yüksək rütbəli rəsmisi Ermənistanın Su-30-ların modernləşdirilməsində maraqlı olduğunu təsdiqləyib.
Görünən odur ki, Ermənistan Fransa ilə yeni hərbi razılaşma əldə etdi. Hindistanla da hərbi əməkdaşlığın əhatə dairəsini genişləndirir.
"Özü də bu, təkcə müdafiə xarakterli yox, həm də hücum silahları olacaq"
Sözügedən məsələni "Bakı-Xəbər"ə şərh edən hərbi ekspert Ramil Məmmədli hesab edir ki, Fransanın növbəti dəfə belə addım atacağı gözlənilən idi: "Onsuz da Fransanın Cənubi Qafqazda apardığı siyasət pozuculuq üzərində qurulub. Rəsmi Paris hər vəchlə Cənubi Qafqazda münaqişənin alovlanmasına çalışır. Bu məqsədlə Ermənistanı silahlandırır. Yeni hərbi müqavilələr də bu siyasətin davamıdır. Nəzərə alaq ki, bundan əvvəl Ermənistanın müdafiə naziri Fransa-Almaniya müdafiə konserni olan KNDS ilə hərbi-texniki əməkdaşlıq haqqında saziş imzalayıb. Bundan əvvəl Paris İrəvana "Thales" şirkətinin istehsalı olan üç "Ground Master 200" (GM200) radar sistemi və "Mistral" yaxın mənzilli hava hücumundan müdafiə sistemləri verib. Üç ay əvvəl Fransa ilə Ermənistan arasında SEZAR özüyeriyən artilleriya qurğularının alqı-satqısı barədə müqavilə imzalanıb. SEZAR özüyeriyən 155 millimetrlik, 52 kalibrli topdur və qabaqcıl mərmilərlə atış məsafəsi 50 kilometri ötür. SEZAR NATO-nun döyüş sursatları standartlarına uyğundur və ondan Ukraynada Rusiya qüvvələrinə qarşı davam edən müharibədə geniş şəkildə istifadə edilir. Bu razılaşmadan sonra Fransa Ermənistana yeni müasir silahlar verəcək. Özü də bu, təkcə müdafiə xarakterli yox, həm də hücum silahları olacaq. Çünki faktiki olaraq, bununla Fransa açıq şəkildə Ermənistanı silahlandırmaqla məşğuldur. Bütün bunlar Fransanın regionda gərginlik yaratmaq istəklərindən irəli gəlir. Aydın məsələdir ki, silahlandırılan Ermənistan danışıqlarda pozucu mövqe tutacaq və sülh sazişinin imzalanmasını yubadacaq".
Vidadi ORDAHALLI
