Radikal müxalifət AB ofisindəki görüşü sonadək məxfi saxlaya bilmədi…
Arzuman Abdulkərimov: "Əslində milli maraqlara söykənən siyasətçilər bu cür polemikaya ciddi etirazlarını bildirməli idi"
Avqustun 12-də Avropa İttifaqının Bakıdakı ofisində səfir Piter Mixalko, ofisin bəzi əməkdaşları və Aİ-yə daxil olan ölkələrin Azərbaycandakı səfirlərinin iştirakı ilə AXCP sədri Əli Kərimli, Musavat Partiyasının sabiq və indiki sədrləri İsa Qəmbər və Arif Hacılı, həmçinin müxalifəti təmsil edən daha bir neçə şəxsin iştirakı ilə görüş keçirilib.
Mediada yayılan məlumatlarda bildirilir ki, görüşdə regionda və Azərbaycanda hazırkı durum, ölkəmizdəki ictimai-siyasi vəziyyət, müxalifətin fəaliyyəti və digər məsələlər müzakirə olunub.
Məlumata görə, səfir Piter Mixalko müxalifətin hazırkı fəaliyyətsizliyi məsələsinə toxunaraq, Avropa İttifaqının Xarici İşlər və Təhlükəsizlik Siyasəti Məsələləri üzrə ali nümayəndəsi Cozef Borrellin yaranmış durumdan ciddi narazılığını müxalifət təmsilçilərinin diqqətinə çatdırıb. Azərbaycandakı cari durumu qısa şəkildə təsvir edən P.Mixalko deyib ki, uzun illərdir ABŞ və Aİ müxalif qüvvələrin fəallığının təmin edilməsi, hakimiyyətə təsir və təzyiq imkanlarının gücləndirilməsi üçün müxalifətə böyük vəsaitlər ayırıb. Bunun müqabilində isə cəmiyyətin narazı hissəsini arxasınca aparmalı olan müxalifət fəaliyyətini yalnız virtual məkanda replikalar paylaşmaqla, müxalifətçiliyi imitasiya etməklə məşğuldur. Hazırda seçkilərlə əlaqədar siyasi fəallığını yüksəltməli olan qüvvələr artıq bu imitasiyanı da lazımi şəkildə edə bilmirlər.
P.Mixalko nümunə kimi Gürcüstan müxalifətini və vətəndaş cəmiyyətini göstərərək bildirib ki, həm Azərbaycana, həm də Gürcüstana ayrılan vəsaitlərin həcmi eyni olsa da, qonşu ölkədə vətəndaş cəmiyyəti hakimiyyətə çox ciddi təsir etmək və iqtidarı sarsıdacaq addımlar atmaq imkanlarına malikdir.
Qeyd edək ki, görüşdə Fransa və Niderlandın səfirləri xüsusi fəallıq göstərərək, müxalifətin canlandırılması üçün tədbirləri gücləndirməyi tələb ediblər. Nə qədər anlaşılmaz olsa da, görüşdə ABŞ və Böyük Britaniyanın səfirləri də iştirak ediblər. Buna görə də görüş Aİ-Azərbaycan müxalifəti formatından kənara çıxıb.
Ən maraqlısı budur ki, görüşdə iştirak edən müxalifətçilər içtimaiyyətə bu barədə heç bir məlumat verməyiblər. Yalnız məlumat mediaya sızandan sonra belə görüşün baş tutduğunu etiraf etmək məcburiyyətində qalıblar.
Radikal müxalifətin Aİ-nin Bakı ofisində keçirilən görüşü gizli saxlamaq niyyətlərinin arxasında hansı məqsəd dayanır?
Görüşdə iştirak edən Müsavat Partiyasının funksioneri Arif Hacılı öz sosial şəbəkə hesabında belə bir görüşün baş tutduğunu etiraf edib. O qeyd edib ki, Avropa İttifaqının Bakı ofisində keçirilən görüş barədə həqiqət olmayan məlumat yayıb: "Müsavat Partiyasının başqanı İsa Qəmbərlə birlikdə iştirak etdiyimiz görüşə Aİ Bakı ofisinin rəhbəri Piter Mixalko ilə yanaşı ölkəmizdə fəaliyyət göstərən Avropa ölkələri diplomatık korpusunun nümayəndələri də qatılmışdı.
Görüşdə Azərbaycanda ümumi ictimai-siyasi durum, 1 sentyabr seçkiləri, Azərbaycan-Ermənistan sülh danışıqlarının gedişi, siyasi məhbuslar, Müsavat Partiyası ilə Aİ ölkələri diplomatik korpusunun nümayəndəliklərinin əməkdaşlıq perspektivləri haqqında fikir mübadiləsi aparılıb…"
Görüşün müxalifət tərəfindən gizli saxlanması ilə bağlı məsələyə münasibət bildirən, müstəqil siyasətçi Arzuman Abdulkərimov "Bakı-Xəbər"ə açıqlamasında bildirdi ki, radikal müxalifətin iştirak etdiyi bu formatdakı görüşün detallarının gizli saxlanmasının bir çox səbəbləri var: "Ölkənin bir çox ciddi media quruluşlarında bu görüşün detalları, formatı barədə ətraflı məlumat verilib. Əslində Avropa İttifaqının ofisində müxalifəti danlayıblar. Onlara verilən pulların müqabilində ciddi fəaliyyət ortaya qoya bilmədikləri bildirilib. Əslində milli maraqlara söykənən siyasətçilər bu cür polemikaya ciddi etirazlarını bildirməli idi. Çünki görüşün detalları barədə verilən məlumatdan görünür ki, Avropa İttifaqının əsas məqsədi ölkədə çaxnaşma yaratmaq, hakimiyyətə qarşı etirazları alovlandırmaqdır. Nə üçün orada iştirak edən bizim siyasətçilərdən heç biri buna etiraz etməyib? Deyə bilərdilər ki, siz kimsiz Azərbaycanın daxili işlərinə qarışırsız? Bunu edən olmayıb. Əksinə, çıxıb görüşün detalları barədə məlumatı tirajlayan medianı məhkəmə ilə hədələyirlər. Onlar şəffaf siyasət yürüdürlərsə, ilkin olaraq görüş barədə özləri müdiaya açıqlama verməli idilər. Adətən görmüşük ki, partiyalar belə görüşlərlə bağlı mediaya açıqlama verir. Deməli, orada elə detallar olub ki, bunun açıqlaması zəruri sayılmayıb. Daha dəqiq ifadə etsək, görüşü təşkil edənlər bu qadağanı onlara qoyub. "Pulu kim verirsə, mahnını da o sifariş edir", - deyimi bu hal üçün xarakterikdir. Görün bizim radikal müxalifət dairələri Avropadan necə asılı vəziyyətdədir. Əslində, burada təəccüblü nəsə görmürəm. Çünki Avropanın belə cəhdləri əvvəllər də olub. Onların maliyyəsi əsasında törədilən siyasi xarakterli cinayətlərlə bağlı məhkəmə hökmləri var. Buna bənzər cinayət əməlləri ilə bağlı hazırda istintaqı gedən işlər də mövcuddur. Görüşdən sonrakı davranışlar bir daha göstərir ki, yazılanlarda həqiqət payı var. Belə formatda görüş nə üçün medianın iştirakı olmadan keçirilməlidir? Hesab edirəm ki, Avropa İttifaqı öz davranışlarına fikir verməlidir. Müstəqil bir dövlətin daxili işlərinə qarışmaq, etiraz aksiyalarının təşkili reseptini vermək qanunla qadağandır".
Məhəmmədəli QƏRİBLİ
