"Qərb QHT-lərinin Ermənistandakı fasadının arxasında nə dayandığını heç düşünmüsünüzmü? Onlar demokratiyadan, söz azadlığından, korrupsiyaya qarşı mübarizədən danışsalar da, əsl məqsədləri çox vaxt kölgədə qalır.
Bu QHT-lər ölkəmizdə həyatın əsas sahələrinə müdaxilə etməklə, faktiki olaraq, erməni xalqının kimliyini məhv edir, milli adət-ənənələrə, təməllərə zərbə vururlar. Özünü az qala talelərin hakimi hesab edən məşhur maliyyəçi və iyrənc sima Corc Sorosun doğum günündə onun fondlarının və digər QHT-lərin təxribatçı fəaliyyətlərindən danışmağın vaxtı gəlib". Bu fikirlər Ermənistanın "Lurer" onlayn nəşrində yer alıb.
Nəşr yazır ki, Soros Fondunun Ermənistan şöbəsi 1997-ci ildən ölkədə vətəndaş cəmiyyətinə dəstək bəhanəsi ilə fəaliyyət göstərir: "Fond 200-dən çox təşkilatı maliyyələşdirib və Nikol Paşinyanın 2018-ci ildə hakimiyyətə gəlməsində mühüm rol oynayıb. "Məxməri" inqilabdan sonra Soros sosial şəbəkələrdə yazıb: "Ermənistanda vətəndaş cəmiyyətinə güclü dəstək ölkənin demokratik bugünü və gələcəyi üçün həyati əhəmiyyət kəsb edir". Qərb QHT-ləri ictimai rəyi manipulyasiya etməklə ölkənin hazırkı siyasi kursunun formalaşmasında əsas rol oynayıb və hələ də öz təsirlərini göstərməkdədirlər. 2022-ci ildə Ermənistandan rəsmən çıxdığını elan edən Soros Fondu digər kanallar vasitəsilə fəaliyyətini davam etdirir. 40-a yaxın QHT hər il ABŞ və Aİ-dən 33 milyon dollardan çox vəsait alır. Korrupsiyaya qarşı mübarizəni və demokratiyanın təşviqini bəyan edərək, əslində Ermənistanın Rusiya ilə əlaqələrini zəiflətməyə və qərbyönlü ideyaları təbliğ etməyə çalışırlar. Məsələn, 2017-ci ildə Milli Demokratiyaya Dəstək (NED) tərəfindən maliyyələşdirilən Məlumatlı Vətəndaşlar Birliyi Ermənistan parlamentinə Aİİ ilə inteqrasiyanın "mənfi nəticələri" ilə bağlı araşdırmalar təqdim edib. Digər nümunə Qloballaşma və Regional Əməkdaşlıq üzrə Beyin Mərkəzidir: o, Rusiya hərbi bazasının çıxarılmasını və Rusiya televiziya kanallarının bağlanmasını tələb edir. 2021-ci ildə mərkəzin direktoru Stepan Qriqoryan Türkiyə mediasına müsahibəsində Türkiyəni Ermənistan üçün Rusiya Federasiyasından daha etibarlı tərəfdaş adlandırıb. Vəqflər mediadan istifadə etməklə öz təsirlərini artırırlar. Onlar çox vaxt ənənəvi dəyərlərə zidd olan neoliberal ideyaları yayan media layihələrini təşviq etmək üçün əhəmiyyətli vəsait ayırırlar. Təkcə 2019-cu ildən 2023-cü ilə qədər media resurslarının təşviqi üçün 10 milyon dollara yaxın vəsait ayrılıb. Amma burada bir paradoks var: qrant almaq üçün əsas şərt Rusiya və onun himayəsi altında gedən inteqrasiya proseslərini sərt tənqid etməkdir.
Qərbyönlü QHT-lər Ermənistan siyasi prosesində mühüm oyunçuya çevrilib. Ölkə rəhbərliyində bir çox məmurlar, o cümlədən Təhlükəsizlik Şurasının katibi Armen Qriqoryan, baş nazir Administrasiyasının rəhbəri Arayik Arutyunyan və müdafiə naziri Suren Papikyan da onlarla əlaqəlidir. Məlumdur ki, 2019-cu ildə İrəvan meri Tiqran Avinyan hələ Paşinyanın köməkçisi olarkən, Soros Fondunun 3 milyon dollardan artıq olan bütün layihələrini "xeyriyyə" fəaliyyəti kimi tanıyıb: nəticədə onlarla əməkdaşlıq edən təşkilatlar (media da daxil olmaqla) vergilərdən azad edilib. Təhsil naziri Janna Andreasyan LGBT gündəmini təbliğ etmək üçün Sorosdan qrant alan "Boone" təhsil fondu ilə əməkdaşlıq edib. Soros fondlarının Ermənistanı tərk etməsinə inansanız belə, bu gün onların burada xüsusi bir işi yoxdur: onların son 25 il ərzində yerinə yetirdiyi funksiyaları ölkə hökuməti öz üzərinə götürüb. Nikol Paşinyan və onun ətrafı Ermənistanda yad maraqların və idealların dirijorlarına çevrilib, əslində milli dəyərlərin məhv edilməsinin tərəfdarı olublar. Bu gün QHT-lərin ölkəmizin siyasətinə təsiri göz qabağında olanda belə bir sual yaranır: həqiqətən dövləti kim idarə edir?". Xatırladaq ki, Soros Fondunun Ermənistanda özünə yuva salması ilə bağlı uzun müddətdir mediada məlumatlar dolaşır. Hələ 2018-ci ildə Ermənistanda baş vermiş "məxməri inqilab" bu ölkədə "anti-rus əhval ruhiyyəsi"nin "anti-rus cəbhəsi"nə çevrilməsində "tətikləyici" rolunu oynamaqla rus sərmayəsinə və biznesinə yönəlik qəzəb dalğasına çevrildi. Eyni zamanda, "məxməri inqilab" nəticəsində Nikol Paşinyanın baş nazir postuna yiyələnməsi ilə sözügedən ölkədə Soros Fondunun mövqeləri sürətlə möhkəmlənməyə başladı. Hələ 1997-ci ildə Ermənistanda fəaliyyətə başlayan "Açıq Cəmiyyət Fondu - Ermənistan", demək olar ki, 2018-ci ildə qarşısına qoyduğu əsas məqsədə çataraq bu postsovet ölkəsində hakimiyyətə nəzarət imkanları qazandı. Artıq Ermənistan hakimiyyətinin Soros Fondunun təsir dairəsində olduğu tək bu ölkənin daxilində deyil, xaricində də heç kəsdə şübhə doğurmur. Ümumiyyətlə, Ermənistanda Soros Fondu insan hüquqlarının müdafiəsi, qadınların hüquqlarının müdafiəsi, antikorrupsiya kampaniyaları, seçki monitorinqi və digər sahələrdə çoxsaylı QHT-lərə dəstək verir. Məhz bu təşkilatlar illərlə fəaliyyət göstərərək Paşinyanın hakimiyyətə gəlişinə öz töhfələrini verdilər və bu təşkilatların rəhbərlərinin bir çoxu hazırda yeni hökumətdə yüksək vəzifələr tutur. Təsadüfi deyil ki, artıq "sorosçular" Ermənistanda hakimiyyətin bütün qollarında möhkəmlənirlər.
Nahid SALAYEV
