Abutalıb Səmədov: "Əsas xaricdən aldıqları pullar və sifarişlərdir"
Məlumdur ki, xarici qüvvələr növbədənkənar parlament seçkilərindən sonrakı və COP29 ərəfəsindəki dövrdə Azərbaycanda qarşıdurma yaratmaqda çox maraqlıdırlar. Nəyin bahasına olursa olsun, bu mühüm beynəlxalq tədbiri pozmağa, yaxud dəyərini azaltmağa çalışırlar.
Adəti üzrə onlar yenə də seçkiləri boykot taktikasını tutublar. Ssenari bəllidir, seçkilərdən dərhal sonra parlament seçkilərinin demokratik keçirilmədiyini, hüquqlarının pozulduğunu, kütləvi tədbirlərə icazə verilmədiyini, siyasi məhbusların olduğunu və s. kimi buna bənzər "arqumentlər" gətirərək Azərbaycana qarşı kampaniyaya başlayacaqlar.
Onların parlament seçkiləri ilə bağlı seçdikləri taktika nə dərəcədə effekt verə bilər?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, müstəqil Azərbaycanın tarixində ərazilərimizin hamısını əhatə edən ilk parlament seçkilərində siyasi partiyaların mütləq əksəriyyəti iştirak etmək qərarını verib: "Çünki bilirlər ki, bu, mühüm bir tarixi hadisədir və yüz illərlə bu hadisə tarixçilərimiz tərəfindən öyrəniləcək, araşdırılacaq, bu hadisə barədə çoxsaylı kitablar yazılacaq. Eyni zamanda seçkilərdə iştirak siyasi partiyaların əsas vəzifəsidir. Çünki seçkilər siyasi partiyalara geniş imkanlar verən hadisədir. Ağıllı siyasətçilər bütün hallarda bu imkanlardan istifadə etməyə çalışır. Evləri bir-bir gəzmək, insanlarla görüşmək, imza yığmaq, sonradan da təşviqat prosesində daha çox insanı əhatə etmək siyasi partiyalar üçün unikal imkanlar yaradır. Çox təəssüf ki, AXCP bu mühüm tarixi hadisəyə kölgə salmaq üçün əvvəlcə seçkilərdən imtina etmək, seçkiləri boykot etmək qərarını verdi. Sonra da həmin mühüm kampaniyanı qaralamaq üçün əlindən gələni etdi. Bəyan edirlər ki, AXCP dövlət maliyyələşməsini əldə edə bilərdi, ancaq onlar dırnaqarası prinsipiallıq göstərib, bundan da imtina ediblər. Nəticədə, guya bir qrup lider dırnaqarası məhrumiyyətlər içərisində yaşamağı seçib. Halbuki, mərhumiyyətləri sıravi cəbhəçilər çəkir. Dövlətin ayıracağı 300-400 min manat vəsait onların bir çox problemlərinin həllinə kömək edə bilərdi. Ancaq bundan radikallar imtina etdi. Çünki dövlət büdcəsinə ayrılan vəsait nəzarət altındadır, onu istədiyin kimi xərcləyə bilməzsən. Üstəlik, ondan da artıq vəsait xarici dostları bu müxalifətçilərə səxavətlə təqdim edirlər. Onları istədikləri kimi xərcləyə bilirlər. Əli Kərimlinin ətrafındakı bir qrup yararlanır bu vəsaitdən. Xarici qüvvələr yaxşı bilirlər ki, səxavətlə pul verdikləri dırnaqarası liderlər həmin pula kifayət qədər haram qatırlar və buna göz yumurlar. Çünki nə qədər çox haram işlər görülsə, siyasətçilər bir o qədər gözükölgəli olarlar. Bu cür də idarə edirlər. Görünür, seçkilərdə iştirak etməmək barədə komanda da xaricdən verilib. Azərbaycan hakimiyyətini təzyiq altında saxlamaq, gələcəkdə maraqlarını reallaşdırmaq üçün müəyyən işlək rıçaqları əldən vermək istəmirlər. Çox təəssüf ki, böyük tarixi nəaliyyətlər qazandığımız bir dövrdə özünü müxalifət adlandıran bir qrup xəyanət yolunu tutub və Azərbaycan dövlətinə problem yaratmaq üçün əlindən gələni edir. Baxmayaraq ki, siyasi partiyaların, liderlərin seçkilərdə iştirakı onlara çox mühüm imkanlar verir, bu adamlar xaricdən aldıqları komanda əsasında bu imkanlardan da imtina etmək barədə qərar verirlər. Başa düşürlər ki, belə qərarlar, Azərbaycan dövlətçiliyi əleyhinə göstərilən bu fəaliyyət onlara əlavə gəlirlər gətirəcək, sıravi cəbhəçilərə əlavə sıxıntılar yaradacaq. Ancaq biz son illər buna adət etmişik. Bir qrup radikal siyasətçinin öz dövləti və xalqı əleyhinə apardığı işləri, göstərdikləri fəaliyyəti seyr etmək məcburiyyətində qalmışıq. Günümüzün reallığı budur. Bizim üçün bir məsələ son dərəcə ümidvericidir ki, o cür radikallara inananların sayı böyük sürətlə azalır və onlar durmadan öz dəstəkçilərini, sosial bazalarını itirməkdə davam edirlər. Ancaq bu onları o qədər də narahat etmir. Əsas xaricdən aldıqları pullar və sifarişlərdir. Onlar da can-başla bu sifarişlərə əməl edirlər və anlaşılmaz bəyanatlar verirlər".
Məhəmmədəli QƏRİBLİ
