Mətləb Salahov: "Xankəndini tərk edən ermənilərin yaşadıqları evlərdən tutmuş əşyalarına qədər hamısı siyahıya alınıb və onlar qeydiyyata götürülüb"
Erməni saxtakarlığı, yalanı bütün dünyanı başına götürüb. Əllərindəki bütün imkanlardan istifadə edərək Azərbaycana qarşı əsassız ittihamlar səsləndirirlər. Son günlərdə erməni saytlarında yayılan saxta video da bu qəbildəndir.
Erməni əsilli amerikalı yazıçı, xeyriyyəçi kimi qələmə verilən hüquq elmləri namizədi Anna Astvattaturyan-Turkotte reallıqdan uzaq bir video paylaşıb. Videoda ermənilərin özünə xas davranışlar əks olunub və görüntüləri belə qələmə verirlər ki, guya azərbaycanlılar Xankəndidən köçüb getmiş ermənilərin əşyalarını "pəncərədən çölə tökürlər".
Guya bizim hökumətin mənbələri "Şəhərin zibildən təmizlənməsi davam edir" yazır.
Yenə də köhnə "etnik təmizləmə" havasını çalırlar, yenə də oradakı evlərin guya "150 min erməni mülki vətəndaşının evləri" olduğunu iddia edirlər. Bir vaxtlar 120 min ermənidən danışırdılar, indi yalanları balalayıb və onların sayı 150 min kimi göstərilir. Guya keçən əsrin 90-cı illərinin əvvəllərində "350 min Bakı ermənisinə" qarşı hansısa hərəkətlər edilib. Təbii, bunlar hamısı erməni blefidir. Yeri gəlmişkən, hələ Xankəndinin yerli sakinləri olan azərbaycanlıların orada məskunlaşdırılması prosesi başlamayıb. Bu baxımdan da, onların iddiaları əsassızdır.
Əsl həqiqət isə belədir ki, ermənilər könüllü şəkildə Xankəndini və Qarabağın başqa ərazilərini tərk etdikdən sonra Azərbaycan dövləti onların bütün əşyalarını qeydiyyata alıb qoruyur. O əşyaları, əmlakı qeydiyyata alır ki, sonradan ermənilər saxtakarlıq edəndə, bizə şər atanda siyahını onların qarşısına qoyub "siz burda bunları qoyub getmişdiniz" desin.
Amma görün ermənilər qondarma, saxta video ilə məsələni necə qələmə verirlər ki, guya onların əşyaları bayıra atılır. Əslində isə belə şey yoxdur, onların əşyaları siyahıya alınıb.
Əlbəttə, ermənilər gerçəyi ört-basdır etmək üçün hər cür qarayaxmaya əl atırlar. Amma unudurlar ki, azərbaycanlılar ermənilər kimi deyil, bizim başqasının malında gözümüz yoxdur. Bu barbarlıq ermənilərə xas xüsusiyyətdir ki, azərbaycanlıların malına, mülkünə, sərvətlərinə, ev-eşiyinə yiyələnmişdilər.
"Qeydiyyatı aparılmış mülk və əşyaların sonradan bu "hala salınması" hansı ağıl və məntiqin "məhsulu" sayıla bilər? - əlbəttə, erməni-daşnak şüurunun"
Jurnalist-ekspert Mətləb Salahov "Bakı-Xəbər"ə bildirdi ki, bu video saxtadır: "Sosial şəbəkələrdəki bu saxta görüntülər ilk növbədə nəyin təsdiqidir? Əvvəla, erməni təbliğat maşını bir gün də olsun öz məkrli və hiyləgər xislətindən əl çəkən deyil və bu son saxta video paylaşımlar da onların bariz nümunəsidir. Heç bir məntiq və həqiqətə uyğun olmayan, sadəcə "nə olur olsun, Azərbaycan əleyhinə mənfi rəy yaradılsın" yanaşması və istəyi ilə ortaya atılan bu saxta görüntülərlə erməni tərəfi növbəti bir oyuna başlamaq istəyir.
Əvvəla, Xankəndi şəhərində əhali məskunlaşması hələ aparılmayıb. Orda yaşayan azsaylı insanlar arasında separatçı erməni çağırışlarına qoşulmayıb şəhərdə qalan və Azərbaycan vətəndaşlığını qəbul edən yerli ermənilər yetərincədir. Təkcə bu faktın özü Azərbaycanın humanist və multukutural dəyərlərə, insan hüquq və azadlıqlarına sözdə deyil, əsl əməldə verdiyi önəmin göstəricisidir.
Eyni zamanda Xankəndini tərk edən ermənilərin yaşadıqları evlərdən tutmuş əşyalarına qədər hamısı siyahıya alınıb və onlar qeydiyyata götürülüb.
Qeydiyyatı aparılmış mülk və əşyaların sonradan bu "hala salınması" hansı ağıl və məntiqin "məhsulu" sayıla bilər? - əlbəttə, erməni daşnak şüurunun". M.Salahov qeyd etdi ki, həm də Xankəndidə yaşayan erməni sakinlərin zaman-zaman yerli telekanallara və xarici KİV-ə, habelə "Euronews" telekanalına verdikləri açıqlamaları, Azərbaycan hökümətindən və Xankəndidəki yerli strukturlarımızdan razılıq etdiklərini bütün dünya qarışıq İrəvandakılar da görür və izləyirlər.
"Digər baxımdan, əgər sosial medianın Ermənistan seqmenti iddia edirsə ki, bu kadrlar indi yox, məhz ermənilərin könüllü şəkildə Azərbaycan buraxılış məntəqəsindən gül-çiçəklə, duz-çörəklə yola salındığı vaxtlarda baş verib, bu daha böyük yalan və rüsvayçılıqdır! Çünki erməni olasan, xislətin şər-böhtan atmaq olsun, sən əlinə düşən belə "kadrları" az qala bir il saxlayıb, hadisələr sovuşandan sonra indi əhəmiyyətsiz bir vaxtda ortaya çıxarasan? Ermənilərin əlində iddia etdikləri kimi bu cür həqiqi faktlar və video sübutlar olsaydı, inanın, həmin andaca dünyaya car çəkib Azərbaycan əleyhinə böyük şou yaratmışdılar. Onlar belə faktlarla yaxşı "oynamağı", əzabkeş cildinə girib dünyanı ayağa qaldırmağı yer üzündə hamıdan əla bacarırlar. Tarixdən gün kimi aydındır ki, erməni təbliğat maşını belə fürsətləri heç zaman boşa vermir. Bu saxta paylaşım bir daha göstərir ki, bizim sülh sazişi, ermənilərin ağlını başına yığmalarını gözlədiyimiz vaxtda, təəssüf ki, erməni cəmiyyəti anti-azərbaycan isterikasından qurtula bilmir"-deyə M.Salahov əlavə etdi.
İradə SARIYEVA
