İranın İsrailə qarşı gözlənilən cavab hücumu Yaxın Şərqdə gərginliyi daha da artırıb. HƏMAS-ın keçmiş lideri İsmayıl Haniyə Tehranda öldürüldükdən sonra İranın İsrailə hücumu artıq an məsələsinə çevrilib.
İsraillə birgə İranın hücumuna hazırlaşan ABŞ İranın nə vaxt hücum edəcəyini açıqlayıb.
İran bu həftə İsrailə hücum edə biləcəyini deyən Ağ Evin Milli Təhlükəsizlik sözçüsü Con Kirbi bildirib "hazır olmalıyıq". "Bizim cavab verməkdən başqa çarəmiz yoxdur" deyən Kirbi, ABŞ-ın İrana qarşı nəyin bahasına olursa-olsun İsraili müdafiə edəcəyini bildirib.
Bundan əvvəl ABŞ-ın "Axios" media orqanına danışan İsrail kəşfiyyatından bəzi mənbələr də İranın bir neçə gün ərzində İsrailə hücum edəcəyini iddia edib. Mənbələr həmçinin İranın hücumlarının geniş miqyaslı olacağını, raket və pilotsuz təyyarələrlə İsraildə məskunlaşmanın sıx olduğu ərazilərin hədəf alınacağını iddia edib.
Kəşfiyyat məlumatlarına görə, hücum cümə axşamına planlaşdırılan atəşkəs danışıqlarından əvvəl baş verə bilər ki, bu da mümkün razılaşma üçün danışıqları təhlükə altına qoyur.
İsrailin müdafiə naziri Yoav Gallant da amerikalı həmkarı Lloyd Austin ilə görüşündə İranın genişmiqyaslı hücuma hazırlaşdığını iddia edib.
"Wall Street Journal" mənbəyə istinadən, İsrail ordusunun İran və Livandakı "Hizbullah" hərəkatının cavab hazırlıqlarını müşahidə etdikdən sonra bu ay ilk dəfə olaraq yüksək döyüş hazırlığına keçib.
İranın rəsmi agentliyi isə sosial media hesabında hücumla bağlı saat açıqlayıb. Qum saatı paylaşan İran mediası saat 02:00-a işarə edib.
Bundan başqa İranın dini lideri Xamneyinin bu yaxınlarda Qum şəhərindəki Cəmkəran məscidinə gizli səfərinin fotoları ortaya çıxıb. Iddia edilir ki, Xamneyin mühüm qərarlar verməzdən əvvəl bu məscidi ziyarət edir, Xamneyi bu məscidə gələndə bölgədə mühüm hadisələr baş verir.
Bir neçə gün əvvəl isə İranın BMT nümayəndəsi bildirib ki, cavab tədbirləri uyğun vaxtda həyata keçiriləcək və mümkün atəşkəsə təsir etməyəcək.
TAHİR
