İran hakimiyyəti silkələnir - Pezeşkiana içdən ikinci zərbə gəldi...
Sahil Kərimli: "Yeni kabinetin açıqlanmasından sonra Pezeşkianın da təmsil olunduğu "islahatçılar" qanadı ilə prezident arasında ixtilaf yaranlıb"
İranın keçmiş xarici işlər naziri və İran İslam Respublikasının strateji məsələlər üzrə vitse-prezidenti təyin edilmiş Məhəmməd Cavad Zərif istefa verib. O, bu barədə X hesabında paylaşım edib.
Avqustun 1-də İran Prezidenti Məsud Pezeşkian Cavad Zərifi strateji məsələlər üzrə vitse-prezident təyin edib.
Cavad Zərif Məsud Pezeşkianın nazirlər seçimindən narazılığına görə istefa verdiyini bildirib.
Pezeşkian Nazirlər Kabinetinin yeni tərkibini parlamentə təqdim edib.
Bu nümunə bir daha göstərir ki, Pezeşkiana işləmək üçün hərtərəfli mane olurlar, onun işləri sabotaj edilir. Bunun səbəbi nə ilə bağlıdır?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, İranda hakimiyyət daxilində daim daxili çəkişmələr olub: "İranın sabiq prezidenti Rəisinin helikopter qəzasında həlak olmasından sonra həmin ölkədə yeni reallıqlar yaranıb. Pezeşkian kimi adamın qəfildən meydana çıxıb prezident seçilməsi və baş verən digər ziddiyyətli proseslər onu deməyə əsas verir ki, İrandakı vəziyyət normal deyil. Son dövrdə molla rejiminin İsraillə, ABŞ-la bağlı daha sərt mövqe tutması daxili çaxnaşmanı da gücləndirib. Bir daha sübut olunur ki, İranda dayanıqlı idarəetmə mexanizmi yoxdur. İsraillə düşmənçiliyin daha pik həddə çatması ölkədə gedən prosesləri ciddiləşdirir. Daxildə insanlar hökumətdən narazıdır və yumşalma istəyir.
Yeni kabinetin açıqlanmasından sonra Pezeşkianın da təmsil olunduğu "islahatçılar" qanadı ilə prezident komandası arasında ixtilaf yaranıb.
İranda yeni hökumətin tərkibi açıqlanıb. Prezident Məsud Pezeşkian yeni hökumətin tərkibini təsdiq edilməsi üçün parlamentə təqdim edib.
Yeni hökumətdə Ruhani və Rəisi hökumətlərində təmsil olunmuş 8 nəfər var ki, onların arasında əslən Azərbaycan türkü olan Abbas Əraqçi və Əmir Nəsirzadə də var. Ərsqçinin əslən Ərdəbildən olduğu və Tehranda doğulduğu bildirilir. O, XİN başçısı postuna namizəd göstərilib.
Əmir Nəsirzadə isə Güney Azərbaycanın Sərab şəhərindəndir və hazırda İran Müdafiə Nazirliyi Baş Qərargahının rəis müavinidir. Onu Pezeşkiyan İranın müdafiə naziri görmək istəyir.
Lakin yeni kabinetin açıqlanmasından sonra Pezeşkianın da təmsil olunduğu "islahatçılar" qanadı ilə prezident arasında ixtilaf yaranıb. Buna səbəb yeni hökumətin tərkibinin onların maraqlarına cavab verməməsi və daha optimal komanda qurulması məsələsində razılaşmanın pozulmasıdır. İslahatçılar bildiriblər ki, Məhəmməd Cavad Zərifin diqtəsi ilə müəyyən edilmiş hökumət onların deyil, radikal sağın maraqlarına daha çox cavab verir. Onlar Zərifin vitse-prezident postundan istefa verməsini və yeni hökumət quruculuğu üçün prosesə başlamağı tələb ediblər. Zərifin məlum istefası da məhz bu tələbdən irəli gəlib".
Məhəmmədəli QƏRİBLİ
