Elxan Şıxəliyev: "Hər bir halda cəbhədəki vəziyyətə ciddi təsirlər çox olacaq"
Erməni hərbi ekspert Karen Vrtanesyan Ukrayna Silahlı Qüvvələrinin Kursk vilayətinə hücumunu hərbi yox, daha çox siyasi əməliyyat hesab edir:
"Qərbpərəst və rusiyayönlü ermənilər Kursk vilayətində baş verən hadisələri diqqətlə izləyirlər. Ukrayna ordusu Rusiya Federasiyasının Kursk vilayətinə soxulub və rus ordusu bir neçə gündür ki, düşməni oradan sıxışdırıb çıxara bilmir. Ukraynanın hücumu hələlik dayanmış kimi görünür, lakin bu, çox güman ki, Rusiyanın hərəkətlərindən çox Ukraynanın maddi-texniki çətinlikləri ilə bağlıdır. Bu, vəziyyəti dəyişmək üçün ciddi cəhddən daha çox, ukraynalıların piar əməliyyatıdır, çünki Rusiyanın cəbhənin "ənənəvi sektorları" adlanan ərazisinə hücumu bir neçə istiqamətdə davam edir və ukraynalıların vəziyyəti getdikcə çətinləşir.
Mən tamamilə istisna edə bilmərəm ki, ukraynalılar daha bir gözlənilməz zərbə vurmaq üçün hansısa dərin məxfi yerlərdə yeni qüvvələr hazırlayır və toplayırlar, indiki mənzərə bunun əksini göstərir. Kursk vilayətinin işğalı hərbi əməliyyatdan daha çox siyasi əməliyyatdır".
Müharibədə hərbi əməliyyatların Rusiya ərazisinə keçməsi hansı perspektiv vəd edir və bunu doğrudan da hərbi yox, piar xarakterli əməliyyat saymaq olar?
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, Ukrayna silahlı qüvvələrinin əməliyyatlar keçirəcəyi ehtimal olunurdu: "Xüsusən də 5 - 10 briqada arasında ehtiyat qüvvələrini yaradaraq, sentyabra yaxın müddətdə əks -hücum əməliyyatlarının keçirəcəyi düşünülürdü. Sadəcə, Ukrayna bir az zamanı uzatdı, asimmetrik müharibə taktikasını həyata keçirdi. Bu əməliyyatların iki istiqamətdə hədəfləri var - siyasi və hərbi hədəflər. Siyasi hədəf ondan ibarətdir ki, 6 avqustdan sonra Ukrayna əməliyyatlar teatrında Rusiyanın ərazilərinə daxil olmaqla vəziyyəti dəyişdi və mümkün ola biləcək ikinci sülh sazişində masada əlini çox gücləndirdi. Əvvəlcə Rusiya masada öz təkliflərini Ukraynaya qəbul etdirəcəyi halda müharibəni dayandıracağını deyirdisə, indi məcburən Ukraynanın da şərtlərinə razı olacaq. Gələcəkdə ərazilərin və əsirlərin mübadiləsi üzərinə Ukrayna vəziyyəti dəyişmiş oldu. Hərbi hədəf də ondan ibarətdir ki, əraziləri nəzarətə götürüb, taktiki səviyyədə xüsusi təyinatların əməliyyatlarını həyata keçirmiş olsa da, ən azından 600 kv km ərazi nəzarətlərindədir, 1000 - ə yaxın da hərbiçi əsir götürüb. Rusiya da digər istiqamətlərdə Xarkovdan, Krımdan, Zaparojedən əlavə qüvvələr cəlb etmək məcburiyyətində qalacaq. Bu da Rusiyanın əlinin zəiflədilməsi, ikinci bir cəbhənin açılması kimi qiymətləndirilir. Rusiya taktiki səviyyədə Xarkov istiqamətində hücumlar həyata keçirdiyi halda, Ukrayna digər bir cəbhədə Rusiyanın əlavə qüvvələrə ehtiyac məcburiyyətini yaratdı. Digər məsələ də odur ki, Rusiyanın daxilində psixoloji effekt var. Rusiya əhalisi müharibənin öz ərazilərində keçirilməsini üzərində hiss edir və bu yük hökümət üzərində ciddi təsir yaradacaq. Rusiya prezidentinin müharibənin davamına və ya tamamına qərarına da bu proses ciddi təsir edəcək. Eyni zamanda Ukraynanı dəstəkləyən güclər Rusiyanı test etdilər. Nə qədər Rusiya xüsusi hərbi əməliyyat adlandırsa da, Ukrayna artıq Rusiya ərazilərindədir. Ukrayna silahlı qüvvələrin psixoloji vəziyyəti də çox dəyişib. Rusiyanın o istiqamətdə hərbi gücünü test edərək, əlavə qüvvələr cəlb edərək bunu davam etdirə də bilərlər. Maksimum əraziləri nəzarətə götürməyə çalışacaqlar. Nəzarətə götürməyə çalışdıqları ərazilərin içərisində iki mühüm strateji obyekt var ki, gələcəkdə Rusiyada olan vəziyyətə təsir edəcək. Bu, qazpaylayıcı stansiyanın - Avropaya gedən qaza birbaşa nəzarətin üzərinə götürülməsidir. Ukrayna bu qaz təminatını dayandırmaqla Rusiyaya öz şərtlərini irəli sürə biləcək. Digəri də Kurçatov atom elektrik stansiyasıdır. O da 10 km - ə yaxın bir məsafədədir . Bunu nəzarətə götürsələr, vəziyyət ya dəyişəcək ya da bərabərləşəcək. Bu səbəbdən fərqli bir vəziyyət yaranır. İyirmiyə yaxın yaşayış məntəqəsinin Ukrayna nəzarətində olmasını heç nə olmamış kimi qiymətləndirmək olmaz. Bu ciddi bir məsələdir. Rusiyanın siyasi hərbi elitasının xalq, cəmiyyət tərəfindən sorğulanması baş verəcək. Hər bir halda cəbhədəki vəziyyətə ciddi təsirlər çox olacaq".
Məhəmmədəli QƏRİBLİ
