Ramil Məmmədli: "Talıbov kim idi ki, hakimiyyət qarşısında belə bir şərt qoysun?"
Naxçıvan Əlahiddə Ümumqoşun Ordusunun komandanı Müdafiə Nazirliyinin (MN) rəhbərliyi siyahısından çıxarılıb. Nazirliyin saytında apardığımız araşdırma bunu göstərir.
Xatırladaq ki, bir müddət əvvəl Əlahiddə Ümumqoşun Ordunun sabiq komandanı general-polkovnik Kərəm Mustafayev vəzifəsindən azad edilib.
Qeyd edək ki, bundan əvvəl nazirliyin strukturuna əsasən Əlahiddə Ümumqoşun Ordunun komandanı müdafiə nazirinin müavini vəzifəsini tuturdu. Məlumata görə, iyulun 5-də Vətən Müharibəsi Qəhrəmanı general-mayor Kənan Seyidov Müdafiə nazirinin müavini - Əlahiddə Ümumqoşun ordunun komandanı təyin edilib. General Kənan Seyidov Müdafiə Nazirliyinin Quru Qoşunlarının 5-ci Ordu Korpusunun Komandiri, Xüsusi Təyinatlı Qüvvələr Komandanının birinci müavini - Qərargah rəisi vəzifələrində işləyib. Vətən müharibəsindəki iştirakına görə, müxtəlif orden və medallarla o cümlədən, Vətən Müharibəsi Qəhrəmanı fəxri adı ilə təltif edilib.
Bütün bunlardan başqa zaman-zaman cəmiyyətdə belə fikirlər olub ki, bu, Azərbaycan hakimiyyətinə vaxtilə Vasif Talıbovun təzyiqi ilə olub. Yəni Talıbov deyib ki, məndə olan qoşun gərək əlahiddə olsun və onun rəhbəri həm də müdafiə nazirinin müavini olsun. O baxımdan bu, versiya nə qədər inandırıcı görünür? İctimaiyyət arasında belə fikirlər səslənirdi ki, Talıbov hakimiyyətə bununla bağlı təzyiq göstərib. Yəni mənim ordumun komandanı müdafiə nazirinin birinci müavini olmalıdır və başqa variant ola bilməz. İndiyə qədər Əlahiddə Ümumqoşun Ordusunun komandanı müdafiə nazirinin müavini Kərəm Mustafayev idi. Kərəm də general idi, onun yerinə gələn Kənan Seyidov da generaldır. Ancaq Kərəmdən fərqli olaraq Kənan Seyidov Vətən Müharibəsi Qəhrəmanıdır. Belə çıxır ki, general, Vətən Müharibəsi Qəhrəmanı müdafiə nazirinin müavini ola bilməz, amma digər general ola bilər? Bir sözlə, Talıbovun absurd tələblərinin nəticəsi olaraq belə vəziyyətin yaranması nə dərəcədə doğru ola bilər?
Sözügedən məsələyə münasibət bildirən hərbi ekspert Ramil Məmmədli baki-xeber.com-a açıqlamasında belə söz-söhbətlərin əsasının olmadığını qeyd etdi: "Hesab edirəm ki, bununla bağlı spekulyasiyalara, şişirtmələrə yol verilir. Ortaya atılan versiyaların reallıqla heç bir əlaqəsi yoxdur. Çünki Vasif Talıbov kim idi ki, hakimiyyət qarşısında belə bir şərt qoysun? Onun Naxçıvan MR Ali Məclisinin sədri olması o demək deyildir ki, o, bu cür məsələlərlə bağlı öz şərtərini diqtə edə bilirdi. O zaman Naxçıvan Əlahiddə Ümumqoşun Ordusunun yaradılması müəyyən zərurətdən irəli gəlirdi. Burada başlıca məqam ondan ibarətdir ki, Naxçıvan Azərbaycanın materik hissəsi ilə birbaşa quru əlaqəsinə malik deyil. Bu səbəbdən ordakı ordu birləşmələrinin logistikasının, təminatının və digər bu kimi məsələlərin özünəməxsus çətinlikləri var. Məhz bu səbəbdən Əlahiddə Ümumqoşun Ordusu yaradıldı. ƏÜO-nin komandanına nazirin müavini səlahiyyəti verildi. O da məlumdur ki, 44 günlük Vətən müharibəsindən sonra Azərbaycan Ordusunda islahatlar aparılır. Prezident İlham Əliyev ordumuzun qurulmasında Türkiyə ordu modelinə üstünlük veriləcəyini bəyan edib. Bu baxımdan ordumuzda aparılan struktur və digər dəyişikliklər tamamilə normaldır. Dövlətimizin, ordumuzun maraqlarına uyğun olan nədirsə, bundan çıxış edərək yeniliklər tətbiq olunur".
Vidadi ORDAHALLI
