"Bu günlərdə İlon Mask da "X" hesabında paylaşdığı fikirlərlə təsdiq etdi ki, sosial şəbəkə platformalarının rəhbərləri Avropa Komissiyası ilə sövdələşməyə gedib. Onun səsləndirdiyi fikirlərin həqiqət olduğu sübut olunur. Avropa xristian klubu özünə lazım olan dövlətləri, təşkilatları sosial şəbəkələrdə qoruyur. Bizim mediaya ikili standartlarla yanaşma və qərəz özünü "Bakı-Xəbər"in paylaşımlarına münasibətdə də biruzə verir.
Deyim ki, təkcə "Bakı-Xəbər"ə deyil, başqa media orqanlarına qarşı da bu cür davranışlar göstərilir. Hesab edin ki, onların qarşısına bir sipər çəkib və səddi keçmək olmur. Həqiqəti demək, həqiqəti göstərmək, gerçək mənzərəni təsvir etmək mümkün olmur". Bunu baki-xeber.com-a açıqlamasında "SƏS" Media Qrupunun rəhbəri, politoloq Bəhruz Quliyev "Bakı-Xəbər" qəzetinin eyni adlı saytının (baki-xeber.com) paylaşımlarının sosial mediada, əsasən də Facebook-da dərhal və səbəbsiz olaraq silinməsinə münasibət bildirərkən deyib.
"Yəni bir neçə media orqanlarının, o cümlədən aktiv sosial şəbəkə istifadəçilərinin Facebook tərəfindən paylaşımlarının silinməsi hallarının şahidi olmuşam. Hətta bu yaxınlarda "Səs" TV-nin Youtube kanalından 35 min görüntü silinmişdi. Bunlar ermənilərlə, Avropa ilə bağlı olan görüntülər idi. Biz məsələni qaldırdıq, müzakirə etdik, beynəlxalq platformaya daşıdıq. Görüntülərin bir qismini bərpa etdik, bir qismini isə edə bilmədik. Bizə blok qoyulmuşdu. Demək istəyirəm ki, bu cür ikili yanaşma standartlarını biz çox görürük".
B.Quliyev qeyd etdi ki, Avropadan Azərbaycana, müxtəlif insanlara qarşı qərəzli münasibəti görmüşəm. "Yəni bu bizim üçün yenilik deyil. Eyni zamanda da "Bakı-Xəbər"ə qarşı sosial şəbəkələr üzərindən edilən bu hücumu pisləyirik. Mən buna hücum deyərdim. Burada konkret olaraq "Bakı-Xəbər"in, eyni zamanda digər media qurumlarının hüquqları pozulur. Söz azadlığı pozulur. Özünü azadlıq aşiqi kimi göstərən Avropa belə təzyiqlər göstərir. Bəzən deyirlər ki, Avropa demokratiyanın beşiyidir. Əslində, bu bir xristian klubudur, demokratiyanı, söz azadlığını boğur, sözdən, sosial şəbəkələrdə yayılan həqiqətdən qorxur. Ona görə də, hesab edirəm ki, paylaşımların silinməsi məsələsi beynəlxalq platformalara daşınmalı və müzakirə olunmalıdır, bu beynəlxalq ictimaiyyətin nəzərinə çatdırılmalıdır ki, bu cür haqsızlıq var. Amma Avropa hansısa insan hüquq və azadlığından, media azadlığından danışır. Halbuki, bundan danışmağa haqları yoxdur" - deyə B.Quliyev bildirdi.
Qeyd edək ki, xeyli bir müddətdir "Bakı-Xəbər" qəzetinin eyni adlı saytından (baki-xeber.com) paylaşılan yazılar sosial mediada dərhal və səbəbsiz olaraq silinir. Bu, xüsusilə də Facebook sosial platformasında daha açıq formada müşahidə edilir.
"Bakı-Xəbər", xüsusilə İlon Maskın Avropa Komissiyası ilə digər sosial şəbəkə platformalarının rəhbərləri arasında gizli sövdələşmə olduğu barədə X hesabındakı paylaşımını yaydıqdan sonra baki-xeber.com saytının yazılarının Facebook-da silinməsi daha da intensivləşib, yazılara blok qoyulur.
İradə SARIYEVA
