Bəhruz Quliyev: "Moskva üçüncü tərəf olaraq bu bəyanatın 9-cu bəndinin həyata keçirilməsi üçün müvafiq addımlar atmayıb"
"Zəngəzur dəhlizinin yaradılması gündəmdə deyil". Bunu Rusiyanın Ermənistandakı fövqəladə və səlahiyyətli səfiri Sergey Kopırkin deyib.
Daha sonra səfir bunları qeyd edib: "Yeri gəlmişkən, bədxahlar nə deyirlər-desinlər, rus diplomatlar bölgəni durbinlə gəzməyi sevən qərblilərdən fərqli olaraq, Zəngəzurda mütləq casusluq etmək fikrində deyillər. Zəngəzur dəhlizinin yaradılması da gündəmdə deyil, bunu da Moskvaya aid etməyə çalışırlar".
Kopırkində dəhlizlə bağlı bu əminlik haradandır? Məgər bilmir ki, Rusiya 10 noyabr 2020-ci il razılaşmasında 9-cu bəndin reallaşmasında maraqlıdır? O zaman belə məsulyətsiz yanaşma nə deməkdir?
"Kopırkin bununla Qərb mediasında, siyasi dairələrində gedən söhbətləri guya neytrallaşdırmağa çalışır"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyev Rusiya səfirinin açıqlamasına tənqidi prizmadan yanaşdı: "Zəngəzur dəhlizi Azərbaycan, Rusiya və Ermənistan rəhbərləri tərəfindən 10 noyabr 2020-ci ildə imzalanmış üçtərəfli Bəyanatda təsbit olunmuş maddələrdən biridir. Bəyanatın 9-cu bəndində deyilir ki, "bölgədəki bütün iqtisadi və nəqliyyat əlaqələri bərpa edilir. Ermənistan Respublikası vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətinin təşkili məqsədilə Azərbaycan Respublikasının qərb rayonları və Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verir. Nəqliyyat əlaqəsi üzrə nəzarəti Rusiyanın Federal Təhlükəsizlik Xidmətinin sərhəd xidmətinin orqanları həyata keçirir. Tərəflərin razılığı əsasında Naxçıvan Muxtar Respublikası ilə Azərbaycanın qərb rayonlarını birləşdirən yeni nəqliyyat kommunikasiyalarının inşası təmin ediləcək". Çox təəsüsüflər olsun ki, bu maddə hələ də Ermənistan tərəfindən yerinə yetirilməyib. Rusiya tərəfinə gəlincə, Moskva üçüncü tərəf olaraq bu bəyanatın 9-cu bəndinin həyata keçirilməsi üçün müvafiq addımlar atmayıb. Halbuki, onun buna texniki imkanları çatır".
Politoloqun sözlərinə görə, Zəngəzur dəhlizi qlobal nəqliyyat infrastukturunun tərkib hissəsidir: "Bu dəhliz təkcə Azərbaycana yox, bütün region, həm də qeyri-region ölkələri üçün əhəmiyyətlidir. Ermənistanın başlatdığı ədalətsiz, işğalçı siyasətə söykənən müharibəyə Azərbaycan son qoyub. Bu gün müharibə yox, dirçəliş, quruculuq, əlaqələrin bərpası, infrastrukturun yeni reallıqlara uyğun qurulması zamanıdır. Orta Dəhlizə aid olan Zəngəzur dəhlizi Şərqdən Qərbə, yaxud əksinə daşınan yüklərin keçəcəyi marşrutlardan biridir. Həm Gürcüstan, həm də İran ərazisindən keçməklə qədim İpək Yolunun işlək vəziyyəti təmin olunub. Azərbaycan üçüncü yolu – Zəngəzur dəhlizini açmaqla alternativ marşrut əldə etməyi düşünür. Amma Qərbin bəzi qüvvələri Orta Dəhlizi öz əllərində saxlamaq üçün Ermənistan üzərindən regional güclərə təzyiq göstərməyi qarşılarına məqsəd qoyublar. "Zəngəzur dəhlizinin yaradılması gündəmdə deyil" deməklə, Rusiyanın Ermənistandakı fövqəladə və səlahiyyətli səfiri Sergey Kopırkin Qərb mediasında, siyasi dairələrində gedən söhbətləri guya neytrallaşdırmağa çalışır. Yəni görürsünüz ki, Rusiya buna can atmır. Halbuki, rusiyalı diplomat da bilməmiş deyil ki, Rusiya tərəfi üçtərəfli bəyanatın 9-cu maddəsində qeyd olunan Zəngəzur dəhlizinin açılmasını təmin etməyə borcludur. Çünki üzərinə öhdəlik götürüb. Azərbaycan isə üçtərəfli bəyanatın imzalanmasından ötən 3 il yarım ərzində həm Ermənistana, həm də digər region ölkələrinə Zəngəzur dəhlizinin açılmasında fayda olduğunu dəfələrlə ərz edib. Və bu dəhlizin təkcə Azərbaycan üçün əhəmiyyətli olacağını deməyib, həm də uzun illər regional layihələrdən, nəqliyyat şəbəkəsindən kənarda qalan Ermənistan üçün faydalı olacağını deyib. Üzdə Ermənistanı "sevən", ona "bacılıq", "qardaşlıq" edən qüvvələr isə əksinə, İrəvana nə qədər düşmən olduqlarını göstərirlər. Ermənistana qonşuları ilə əlaqələr qurmağa, normal qonşuluq münasibətləri yaratmağa əngəl olanlar bununla da bu ölkəni inkişafdan tənəzzülə sürükləyir, əvəzində isə Azərbaycanı düşmən obrazında təqdim edirlər. Maraqlıdır, düşmən kimdir və bunu ermənilər nə vaxt anlayacaq? Azərbaycanın müharibəni ədalətli Qələbə ilə başa vurduqdan sonra atdığı addımlar regionda davamlı və əbədi sülhün təmin olunması üçündür".
Vidadi ORDAHALLI
