Məhərrəm Zülfüqarlı: "Rubinin iddiaları tamamilə əsassızdır və onun ölkə başçısına qarşı dediyi fikirlər absurddur"
ABŞ-da oturub bizim bölgədən xəbərsiz insanlar var ki, peşələri Azərbaycana böhtan atmaqdır.
Bunlardan biri də amerikalı politoloq Maykl Rubindir ki, yazdığı məqalədə iddia edir ki, Prezident İlham Əliyev Azərbaycanın neft və qaz satışından əldə edilən pullarla guya Qarabağdan ərazicə üç dəfə böyük olan Yeni Kaledoniyada Fransaya qarşı qisas zəminində inqilabi hərəkatı, müstəqillik uğrunda azadlıq hərəkatını maliyyələşdirir.
"Hər şeyə pul gözü ilə baxan Rubin kimiləri unudurlar ki, Azərbaycan Yeni Kaledoniya xalqının haqlı mübarizəsinə maddi yox, siyasi və mənəvi dəstək verir, burada da beynəlxalq hüquqa zidd heç nə yoxdur"
Siyasi ekspert, professor Məhərrəm Zülfüqarlı "Bakı-Xəbər"ə şərhində bildirdi ki, Rubinin iddialarının heç bir əsası yoxdur və bu, beynəlxalq ictimaiyyəti çaşdırmaq, Yeni Kaledoniya xalqının Fransa müstəmləkıçiliyinə qarşı haqlı mübarizəsinə ləkə yaxmaq məqsədi daşıyır. "Bu cür yazılar, bu cür çıxışlar dəfələrlə hər zaman olub. Özü də Azərbaycan hansısa məsələdə uğur əldə edəndə, Azərbaycanın xeyrinə hansısa qətnamə qəbul olunanda bu cür politoloqlar, jurnalistlər, informasiya agentlikləri Azərbaycan əleyhinə kampaniyaya başlayır. Yəni Fransanın Ermənistana qanunsuz şəkildə, beynəlxalq hüquqi sənədlərə zidd olaraq verdiyi dəstəyi ört-basdır etmək məqsədilə bu cür cəfəng iddialar meydana gəlib. Azərbaycana qarşı bu hücumlar 44 günlük Vətən müharibəsində qazandığımız qələbədən və 23 saatlıq antiterror tədbirlərindən sonra ermənilərin könüllü şəkildə Qarabağı tərk etməsinin ardınca başladı. Sarkozi dövründə, Azərbaycan torpaqları işğal altında olanda münasibətlər normal idi. İndi Azərbaycanla Fransanın münasibətlərinin korlanmasının əsas səbəbi məhz Makron rejiminin qeyri-qanuni olaraq, insan haqlarını pozaraq Qafqazda öz imperialist siyasətini Ermənistan tərəfə kömək etməklə və onun əli ilə yeritməyə çalışmasıdır. Bu da, əlbəttə, Azərbaycanı narahat edir. Azərbaycan da Fransanın yeritdiyi müstəmləkəçilik siyasətini tənqid edir.
Rubinin iddiaları tamamilə əsassızdır və onun ölkə başçısına qarşı dediyi fikirlər absurddur. Hər şeyə pul gözü ilə baxan Rubin kimiləri unudur ki, Azərbaycan Yeni Kaledoniya xalqının haqlı mübarizəsinə maddi yox, siyasi və mənəvi dəstək verir, burada da beynəlxalq hüquqa zidd heç nə yoxdur.
O, məqaləsində iddia edir ki, Azərbaycan rəhbərliyi Qarabağdan ərazicə 3 dəfə böyük Yeni Kalendoniyaya dəstək verir, ərazinin ölçüsünün bura nə dəxli var? Əsas odur ki, prinsip, qanun və beynəlxalq hüquq var. Əgər bu gün Fransa müstəmləkə siyasəti yeridirsə, öz müstəmləkələrində insan haqlarını pozursa, o ərazinin böyük və ya kiçik olmasının məsələyə dəxli yoxdur. İkincisi, Azərbaycan Prezidentinin Qərbi Azərbaycan termininə irad tutmağa çalışırlar. Yəqin onlar indiyə qədər yuxuda olublar, gerçəkliklərdən xəbərləri yoxdur ki, Ermənistanın gerbində Ağrı dağının şəkli var, qonşu Türkiyəyə ərazi iddiası edirlər. İndiyə qədər o politoloq və onun kimiləri kar və kor idilər ki, belə bir halın olduğunu görmürdülər? Azərbaycan Prezidenti Qərbi Azərbaycan terminini tarixi ərazilərimiz kimi qeyd edir. Biz BMT prinsiplərinə uyğun olaraq heç bir dövlətə ərazi iddiası etmirik, heç bir dövlətə hansısa təcavüz etmirik, sadəcə olaraq, biz öz tarixi ərazilərimizi qeyd edirik"-deyə M.Zülfüqarlı qeyd etdi.
M.Zülfüqarlının sözlərinə görə, istər ABŞ-dan, istərsə də başqa ölkələrdən olan bu kimi təhlilçilərin, politoloqların Azərbaycan, Azərbaycan Prezidenti barədə absurd fikirləri ölkəmizin uğurlarını həzm edə bilməməkdən irəli gəlir. O qeyd etdi ki, azad ərazilərdə aparılan tikinti-quruculuq, bərpa işləri, əhalinin öz doğma torpaqlarında məskunlaşdırılması, eyni zamanda Azərbaycanın iqtisadi sahədə əldə etdiyi uğurlar o cür adamları narahat edir. Azərbaycan qazının Avropaya nəql edilməsi, Avropanın Azərbaycan qazından asılı olması kimi amillərin də bu cür insanları narahat etdiyini deyən M.Zülfüqarlıya görə, belə qüvvələr və onların bağlı olduğu ermənipərəst mərkəzlər bizim uğurlardan narahat olurlar. M.Zülfüqarlı əlavə etdi ki, Fransa müstəmləkəçiliyinə qarşı Yeni Kalendoniyanın mübarizəsinə Azərbaycan dövləti də, Azərbaycan xalqı da mənəvi dəstək verir, ölkəmiz onların haqq işinə siyasi baxımdan yardım edir, burada heç bir maliyyə vəsaiti müzakirə mövzusu ola bilməz. Azərbaycan qazının satışından gələn vəsaitin öz ölkəmizin daxilinə yönəldiyini deyən müsahibimiz hesab edir ki, ölkəmizin inkişafı o mərkəzləri, o şəxsləri çox narahat edir, çünki güclü Azərbaycan onlara sərf etmir. "Bizim dövlət iqtisadi cəhətdən güclənir və biz regionun lider dövlətiyik. Cənubi Qafqazda maraqlı olan qüvvələrin qol-qanad açmasına imkan vermirik. Bu da onların xoşuna gəlmir, bu cür sifarişli yazılarla bizi hədəfə alırlar. Biz beynəlxalq hüquqa söykənib kanak xalqına dəstək veririk, bu, mənəvi və siyasi dəstəkdir"-deyə M.Zülfüqarlı əlavə etdi.
İradə SARIYEVA
