Azər Həsrət: "COP29 ərəfəsində Ermənistan tərəfindən nə qədər kampaniya keçirilsə də, heç bir reaksiya olmayacaq"
Bu ilin payızında Azərbaycan çox mötəbər bir tədbirə ev sahibliyi edəcək. Söhbət COP29-dan gedir. Bu mötəbər tədbir noyabrın 11-dən 24-dək Bakıda keçiriləcək. Tədbirə dünyanın 5 qitəsindən 80 minə yaxın insanın qatılacağı gözlənilir. Ölkəmizdə keçiriləcək COP29 tədbiri bəzi ölkələri narahat edir.
Ermənistanda bəzi dairələr, erməni diasporu, Qərb ölkələrində Luis Okampo kimi irqçilər "Bakıda saxlanılan ermənilərin azad edilməsi" ilə bağlı hay-küy kampaniyasına başlayıblar. Ermənilər artıq COP29 ərəfəsində aktivləşib, onlar Azərbaycanda saxlanılan ermənilərin azad edilməsi ilə bağlı müxtəlif təşkilatlara müraciət edirlər. Ermənilərin COP29 tədbirindən fürsət kimi istifadə etdikləri bu kampaniya hansı nəticə verə bilər?
"Azərbaycanda həbsdə olan terroçuların nə kimi cinayət törətdikləri hər kəsə bəllidir, bu səbəbdən də onların apardığı təbliğat boşunadır"
Siyasi şərhçi Azər Həsrət "Bakı-Xəbər"ə açıqlamasında qeyd etdi ki, ermənilər bu kampaniyadan da əl çəkən deyil, onlar COP29-dan istifadə etmək istəyir: "Məlumat üçün deyim ki, ABŞ Dövlət Departamentinin gündəlik brifinqində də erməni yönümlü media təmsilçiləri məlum məsələni gündəmə gətirməyə çalışıblar. Onlar Azərbaycanın hərbi əsirlərini tutduğu haqda rəy formalaşdırmaq istəyirlər. Ancaq ABŞ Dövlət Departamentinin nümayəndəsi cavabında "hərbi əsir" ifadəsini işlətməyib, sadəcə ümumiləşdirilmiş şəkildə deyib ki, istənilən vəziyyətdə həbs edilən şəxslərə humanist münasibət göstərilməsinin tərəfindədir".
Həmsöhbətimiz qeyd etdi ki, COP29 ərəfəsində Ermənistan tərəfindən nə qədər kampaniya keçirilsə də heç bir reaksiya olmayacaq: "Azərbaycanda həbsdə olan terroçuların nə kimi cinayət törətdikləri hər kəsə bəllidir. Bununla bağlı faktlar, sübutlar var. Həmin cinayətkarlarla bağlı araşdırma aparılır. İstənilən xarici ölkə, beynəlxalq təşkilatlar həmin sübutlarla tanış ola bilər. Əlimizdə bu qədər fakt var, ermənilərin apardığı hər hansı bir təbliğat Azərbaycanın mövqeyinə təsir edə bilməz".
Ekspert hesab edir ki, ermənilərin apardığı kampaniyanın effekti yalnız onlar üçün ola bilər: "Biz bu mövzu ilə bağlı boş dayanmamalıyıq. Onlar deyirsə biz də cavab verməliyik. Ancaq bu işləri bacaran şəxslər daha aktiv fəaliyyət göstərməlidir. Dövlətimiz o insanların potensialını səfərbər etməlidir. Yəni hər bir işi cənab Prezident İlham Əliyev etməməlidir. Bu işləri bacaran insanların bütün potensialı səfərbər edilməlidir. Onlara imkan verilməlidir ki, erməni təbliğatına qarşı söz deyə bilsinlər. Təəssüflər olsun ki, bəzən bu potensialdan istifadə edilmədiyinin şahidi oluruq. Biz də öz üzərimizə düşən işi edirik, ancaq qarşımızda mütəşəkkil bir erməni təbliğat maşını var. Bizim onlara qarşı qoya bilməyimiz üçün səfərbər olmağımız vacibdir. Bu səbəbdən də hesab edirəm ki, COP29 ərəfəsində bu potensialımızı hərəkətə gətirməliyik ki, ermənilərə cavab verməzdən öncə öz təbliğatımızı qura bilək".
Günel CƏLİLOVA
