Elşad Həsənov: "Mən hesab edirəm ki, sülh müqaviləsinin imzalanmasında əsas maneə bu deyil, Ermənistanın düzgün aparmadığı siyasətidir"
Ermənistanın xarici işlər naziri Ararat Mirzoyanın Kiprə işgüzar səfəri Kiprin diplomatik nümayəndəlikləri rəhbərlərinin illik konfransında iştirakı ilə başlayıb. Kiprin xarici işlər nazirinin dəvəti ilə keçirilən tədbirdə 50-yə yaxın səfir, eləcə də Xarici İşlər Nazirliyinin rəhbərliyi iştirak edib.
Nazir Mirzoyan giriş nitqi ilə çıxış edib, daha sonra o, iştirakçıları maraqlandıran bir sıra sualları cavablandırıb.
Ermənistan xarici siyasət idarəsinin rəhbəri xarici siyasət prioritetləri, onların həyata keçirilməsi istiqamətində atılan addımlar, islahatlar, beynəlxalq tərəfdaşlarla əməkdaşlıq barədə məlumat verib. Ararat Mirzoyan regional xarakter daşıyan mövcud çağırışları da qeyd edib. Qonşularla münasibətlərin normallaşdırılması proseslərinə, o cümlədən Azərbaycanla sülh müqaviləsinin yekunlaşdırılması istiqamətində göstərilən səylərə və onun bağlanmasının vacibliyinə də toxunulub.
Bundan əlavə, nazir bildirib ki, sərhəd insidentlərinə və silahlara nəzarət mexanizmlərinin yaradılmasına dair təklifləri ilə bağlı proses daha da inkişaf etdirilib, ancaq bu məsələ ilə bağlı Azərbaycandan hələ cavab almamışıq, onlar hələ də qüvvədədir.
Azərbaycan sərhəd insidentlərinə nəzarət mexanizminin yaradılmasına niyə müsbət cavab verməlidir? Bu, Ermənistanın sülh danışıqlarından yayınmaq üçün növbəti bəhanəsi ola bilərmi? Bundan əlavə, Mirzoyanın bu bəyanatları səsləndirdiyi auditoriya da maraqlıdır. O niyə məhz Kipr diplomatlarının qarşısında çıxış etməlidir?
Siyasi şərhçi Elşad Həsənov "Bakı-Xəbər"ə açıqlamasında bildirdi ki, Ermənistanla Kipr arasında münasibətlər son zamanlar yaxınlaşmağa başlayıb: "Bir-birinə dost deyirlər. Səbəb odur ki, Ermənistan uzun illər Azərbaycan torpaqlarını işğal altında saxlayıb. Onların dostluqlarının əsas mənbəyi "düşmənimin dostu mənim düşmənimdir " tezisidir. Yəni Azərbaycanla münasibətlər onsuz da aydındır. Erməni siyasiləri Kiprlə Türkiyə arasındakı münasibətlərin gərgin olmasından da istifadə etməyə çalışırlar. Belə bir diplomatik korpusun rəhbərləri hər dövlətin özündə illik tədbirlər keçirirlər, həmin səfirlərə dövlət öz tapşırıqlarını verir və onlara bu istiqamətdə fəaliyyət sürməyi tapşırırlar. Bu bizdə də olur. Ancaq indiyə kimi rast gəlməmişəm ki, hər hansı dövlətin xarici işlər naziri gəlsin, həmin yığıncaqda iştirak etsin. Bu bir ilkdir. Kiprin xarici işlər nazirinin diplomatik missiyası rəhbərlərinin illik konfransında 50 nəfər xaricdə çalışan diplomatik korpusun rəhbəri iştirak edib. Onların qarşısında həm Kiprin xarici işlər naziri, həm də Ermənistan xarici işlər naziri çıxış edib və Ermənistanın prioritetlərini elan edib. Xüsusilə də Azərbaycana yönəlik zərərli fikirlərini həmin diplomatların beyninə yeridib. Məqsəd odur ki, onlar təmsil etdikləri ölkələrdə həmin ideyaları yaysınlar. Azərbaycanı sülh danışıqlarına gəlməyən ölkə kimi göstərməyə çalışırlar. Əksinə, məlumatlı diplomatlar, insanlar bilirlər ki, müharibə bitəndən sonra sülh müqaviləsini 5 prinsip üzrə Azərbaycan hazırlayıb verdi. Ancaq onların yenidən irəli sürdüyü sərhəd mexanizmi nəzarəti haqqında olan ideyaları gülməlidir. Çünki onlar özləri öz sərhədlərinə nəzarət edə bilmirlər. Çünki tam vahid ordu komandanlığı yoxdur. Bizə qarşı olan təxribatlarda göstərdilər ki, bunu edən ordu yox, könüllü qüvvələrdir. Son dövrdə sərhəddə atəşkəsin pozulması, Kəlbəcər istiqamətində helikopterlərin olması haqqında verdiyimiz məlumatları Ermənistan tərəfi təkzib edir. Ona görə də onlar bərabər nəzarət mexanizmi üzərində dayanmağa çalışırlar. Təbii ki, biz onların bu istəklərini də yerinə yetirə bilərik, ancaq düşünürəm ki, bunu etsək, bizə qarşı olan ittihamları da kəsiləcək. Ancaq mən hesab edirəm ki, sülh müqaviləsinin imzalanmasında əsas maneə bu deyil, Ermənistanın düzgün aparmadığı siyasətidir. Yaxşı olardı ki, onlar öhdəliklərini yerinə yetirərdilər. Konstitusyanı dəyişməlidirlər və Zəngəzur dəhlizini açmalıdırlar".
Məhəmmədəli QƏRİBLİ
