Azərbaycan xalqı bütün tarixi dövrlərdə öz humanistliyi, əzilənlərə dayaq olmaq, kömək durmaq keyfiyyətləri ilə seçilib. Xalqımız hər zaman haqqın, ədalətin tərəfində, haqsızın qarşısında durmağı bacarıb. Bu, tarixin sınağından çıxmış bir aksiomadır.
Bu gün dünyanın istənilən nöqtəsində bir əzilən xalq varsa, Azərbaycan xalqı, dövləti onun köməyinə yetişib.
Uzun illərdir ki, Fransa adlı irticaçı, işğalçı dövlət dünyanın ayrı-ayrı nöqtələrindəki əraziləri, xalqları öz əsarəti altında saxlayır. Fransanın müstəmləkəçilik tarixi qanla yazılıb və günümüzdə də belədir.
Bu gün Fransanın Yeni Kaledoniyada həyata keçirdiyi irticaçı tədbirlər onu göstərir ki, bu dövlət qanlı əllərini başqa xalqların yaxasından çəkmək istəmir.
Bilirik ki, Yeni Kaledoniyada və başqa kiçik dənizaşırı ərazilərdə Fransa zülmünə məruz qalan xalqlar, dövlətlər var, təəssüf ki, "demokratiya", "insan haqları" kimi məsələlərdən başqa dövlətlərə dərs keçən iri dövlətlər buna səssiz qalır, beynəlxalq qurumların heç tükü də tərpənmir.
Azərbaycan isə, hər zaman olduğu kimi, yenə də zülmə qarşı mübarizədə ön cəbhədə dayanır.
Azərbaycan dövləti və ictiamiyyəti, qeyri-hökumət təşkilatları Fransanın kiçik ada dövlətləri xalqlarına etdiyi zülmlərə biganə qalmır.
Bildiyimiz kimi, ölkəmizdə Fransa müstəmləkəçiliyinə qarşı mübarizə aparmaq məqsədilə Bakı Təşəbbüs Qrupu (BTQ) adlı təşkilat yaradılıb. Təşkilatın özünün də bəyan etdiyi kimi, məqsəd hansısa dövlətin siyasətinə qarışmaq deyil, Fransa müstəmləkəçiliyinə qarşı mübarizə aparmaq və bu ölkənin işğalı, tapdağı altında olan xalqlara, ərazilərə dəstək olmaqdır.
Fransa müstəmləkəçiliyinə qarşı ictimai mübarizə
Bakı Təşəbbüs Qrupunun yaradılması barədə qərar 6 iyul 2023-cü ildə Qoşulmama Hərəkatının Əlaqələndirmə Ofisinin Nazirlər Toplantısı çərçivəsində Bakıda keçirilmiş dəyirmi masa zamanı verilib. Tədbir zamanı Martinika, Qayana, Yeni Kaledoniya, Fransız Polineziyası, Uollis və Futuna, Solomon adalarının nümayəndələri çıxış ediblər. Təşkilatın ofisi 21 oktyabr 2023-cü ildə Bakıda yerləşən "Winter Park Plaza"da açılıb.
Qrupun məqsədi müstəmləkəçilikdə olan dünyanın müxtəlif bölgələrində yerləşən xalqların azadlıq uğrunda apardıqları mübarizəyə dəstək verməkdir. 22 sentyabr 2023-cü ildə qrup tərəfindən BMT-də "Dekolonizasiya: Sakit inqilab" mövzusunda konfrans keçirmişdir. 20 oktyabr 2023-cü ildə qrupun təşəbbüsü ilə 14 ölkənin, Fransanın müstəmləkə altında saxladığı dənizaşırı ərazilərin, həmçinin Korsikanın təmsilçilərinin iştirak etdiyi "Neokolonializm: İnsan hüquqlarının pozulması və ədalətsizlik" adlı beynəlxalq konfrans baş tutmuşdur. 21 noyabr 2023-cü ildə Bakı Təşəbbüs Qrupunun təşkilatçılığı ilə "Dekolonizasiya: Qadınların gücləndirilməsi və inkişaf" mövzusunda konfrans keçirilmişdir.
20 iyun 2024-cü ildə qrupun təşəbbüsü ilə BMT-nin Nyu-Yorkdakı mənzil-qərargahında "Müstəqilliyə və fundamental azadlıqlara doğru: Müstəmləkəçiliyə son qoyulmasında C24 Komitəsinin rolu" adlı beynəlxalq konfrans keçirilmişdir. Konfransda Fransa və Niderlandın müstəmləkəsi olan 8 ərazidən nümayəndələr iştirak ediblər.
Bakı Təşəbbüs Qrupu aşağıdakı müstəmləkə ərazilərin dekolonizasiyasını dəstəkləyir, həmin ərazilərin nümayəndələri ilə əməkdaşlıq edir. Bundan əlavə, Komor adaları, Haiti kimi keçmiş Fransa müstəmləkələri də Bakı Təşəbbüs qrupu tərəfindən keçirilən tədbirlərdə iştirak edirlər.
BTQ-nin həyata keçirdiyi bütün bu işlər Azərbaycan ictimaiyyəti tərəfindən də yükək dəyərləndirilir və təqdir edilir. Fransa müstəmləkəçiliyinə qarşı mübarizədə Azərbaycan xalqı ilə Azərbaycan dövlətinin maraqları uzlaşır. Dövlət və ictimai maraqların çuğlaşdığı bir məsələ olan Fransa müstəmləkəsi ilə mübarizənin uğurla nəticələnəcəyi şübhəsizdir.
"Bu məsələdə dövlətimizlə ictimaiyyətimizin maraqları üst-üstə düşür"
Ekspertlər bildirir ki, Azərbaycanda dövlət və ictimai maraqlar məsələsində uzlaşma mövcuddur. Ekspertlər qeyd edir ki, çox az sayda dövlət tapıla bilər ki, yürütdüyü siyasət vətəndaşlar, ictimaiyyət tərəfindən dəstəklə, razılıqla qarşılansın. Ekspertlər deyir ki, Frasanın müstəmləkəçilik, irticaçı siyasətinə qarşı mübarizə Azərbaycan dövləti və ictimaiyyətinin mövqeyi tamailə üst-üstə düşür.
Bu mənada, Bakı Təşəbbüs Qrupunun fəaliyyəti ictimaiyyətimiz tərəfindən müsbət qarşılanır.
Bu sahədə dövlət və ictimai maraqların uzlaşması nə ilə bağlıdır?
Müasir İnkişaf Birliyinin sədri, siyasi şərhçi Mübariz Göyüşlü "Bakı-Xəbər"ə bildirdi ki, XXI əsrdə, internetin, texnologiyaların belə sürətlə inkişaf etdiyi müasir dövrdə müstəmləkəçiliyin bütün təzahürləri nəinki Azərbaycan dövləti, eləcə də ictimaiyyətimiz, xalqımız tərəfindən qəbuledilməyən, pislənilən bir məsələdir. "Azərbaycan ictimaiyyəti heç bir zaman müstəmləkəçilik siyasətini qəbul edə bilməz. Mütərəqqi düşüncəli xalq, dünyada müstəmləkəçiliyin fəsadlarını görən hər bir dövlət bunun əleyhinə olmalıdır. Ümumiyyətlə, müstəmləkəçilik çox ağır bir prosesdir. Fransa müstəmləkəçiliyi isə dünya tarixdə ən ağır müstəmləkəçilik üsuludur, metodudur. Çünki Fransanın müstəmləkəçilik siyasəti yeni deyil, bu ölkə tarixən qəddar müstəmləkəçilik siyasəti yürüdüb, bu işgəncələrlə, edamlarla, soyqırımlarla, faciələrlə müşayiət olunub. Bu gün də bu irticaçı siyasət davam edir. BTQ bu məsələ ilə bağlı çalışmalar həyata keçirir. Bu addımlar Azərbaycan ictimaiyyəti tərəfindən də təqdir olunur. Çünki təqdirəlayiq addımlar atılır. Fransa müstəmləkə altında saxladığı və bu gün də ağır işgəncə siyasəti ilə idarə etdiyi xalqların haqq səsini BTQ dünyaya çatdırır. O xalqların Fransa müstəmləkəçiliyindən azad olması üçün addımlar atır, onların bu və digər formada qarşılaşdıqları çətinliklərlə, problemlərlə bağlı dünya ictimaiyyətini məlumatlandırır, bu xalqların haqlı azadlı mübarizəsinə yaxından dəstək verir. Bu mənada təbii ki, bu məsələdə dövlətimizlə ictimaiyyətimizin maraqları üst-üstə düşür. Azərbaycan xalqı, bütövlükdə türk, islam toplumu daim haqqın yanında olub, əzilənə kömək çıxıb, dəstək verib. Bu gün də belədir. Baxmayaraq ki, Fransa BMT Təhlükəsizlik Şurasının üzvlərindən biridir, özünü böyük dövlət adlandırır. Bu bizi qorxuzmur. Ədalət məsələsi bizim üçün çox önəmlidir və ədalət də o xalqların müstəmləkəçilik buxovundan azad olunmasından, müstəqilliklərinə qovuşmasından, yaxşı yaşamasından ibarətdir. Çünki o xalqların azad olmağa, özgür yaşamağa, dünyada öz yerlərini tutmağa haqqı var. Bu ədalətli yanaşmadır, biz də bu yanaşmanı dövlət və ictimaiyyət olaraq müdafiə edirik. Bu da Fransanın daxili işlərinə qarışmaq deyil. Belə bir məsələ, müstəmləkəçilik siyasəti Fransanın daxili işi ola bilməz. Bu bütün mütərəqqi bəşəriyyəti narahat edir, o cümlədən də, Azərbaycan dövlətini və Azərbaycan xalqını. Ona görə də biz əzilən xalqların haqq səsiyik, olmaqda da davam edəcəyik" - deyə M.Göyüşlü vurğuladı.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
