Sentyabr ayının 1-də Azərbaycanda növbədənkənar parlament seçkiləri keçiriləcək. Qeydiyyatda olan 26 siyasi partiyanın əksəriyyəti seçkilərdə iştirak etmək barədə qərar qəbul edib. Ancaq elə partiyalar var ki, qəribə taktika seçiblər.
Bəzi partiya sədrləri seçki mühitinin pis olmasını, digərləri isə başqa səbəbləri əsas gətirərək seçkidə iştirakdan imtina edir. Bu bir qədər məntiqsiz taktikaya bənzəyir. Əgər seçki mühiti yaxşıdırsa, niyə özünüz iştirak etmirsiniz, yox, sizi qane etmirsə, onda niyə özünüzü kənara çəkib partiya üzvlərinizin seçkidə iştirakını təmin edirsiniz?
Liderləri seçkidə iştirak etməyən, lakin təşkilatın digər üzvlərini namizəd kimi irəli sürən təsisatların adlarına diqqət edək.
VI çağırış parlamentdə 3 deputatla təmsil olunan Vətəndaş Həmrəyliyi Partiyasının (VHP) sədri Sabir Rüstəmxanlı bu seçkidə namizədliyini irəli sürməyəcək. Onun seçildiyi dairədən həyat yoldaşı Tənzilə Rüstəmxanlının namizədliyi irəli sürülüb.
"Ana Vətən" Partiyasının (AVP) sədri Fəzail Ağamalı da seçkilərdə namizəd olmayacaq. Onun əvəzinə həmin dairədən qızı Günay Ağamalı namizədliyini irəli sürəcək.
Müsavat Partiyasının sədri İsa Qəmbər də seçkidə iştirak etməyəcəyini bəyan edib. "Mən bu dəfə namizədliyimi irəli sürməyəcəyəm, Müsavat Partiyasının seçkilərdə iştirakına ümumi rəhbərlik edəcəyəm və namizədlərimizə dəstək verəcəm", - o deyib.
Azərbaycan Ümid Partiyasının (ÜMİD) sədri İqbal Ağazadə də seçkidə iştirak etməyən liderlər arasındadır. O qeyd edib ki, rəhbərlik etdiyi partiyanın İdarə Heyəti namizədlərin siyahısını hazırlayıb müvafiq qaydada təqdim etsə də, onun bu dəfə keçiriləcək seçkilərdə iştirak etməsinə ehtiyac görməyib.
Azərbaycan Xalq Cəbhəsi Partiyası (AXCP) seçkilərdə iştirak etməmək barədə qərar qəbul edib.
Azərbaycan Demokrat Partiyasının (ADP) sədri Sərdar Cəlaloğlu 3 saylı Şahbuz-Babək-Kəngərli seçki dairəsindən namizədliyini irəli sürsə də, sonra seçkidə iştirakdan imtina edib.
Müasir Musavat Partiyasının (MMP) sədri Hafiz Hacıyev isə növbədənkənar parlament seçkilərində iştirak etmək niyyətində olmadığını bildirib: "Seçkiyə hazırlıq çərçivəsində partiyadan 11 nəfərin namizədliyi irəli sürülüb. Onlardan bir neçəsinin sənədləri hazırlanaraq, müvafiq qaydada dairə seçki komissiyalarına təqdim olunub. Mən özüm isə seçkidə iştirak etmək niyyətində deyiləm".
Ədalət Partiyası seçkilərdə iştirak barədə qərar qəbul etsə də, partiyanın sədri İlyas İsmayılov seçkilərdə iştirak etməyəcək. Partiya hələlik 17 nəfərin namizədliyini irəli sürüb.
Haqq-Ədalət Partiyası (HƏP) seçkilərdə 9 namizədlə iştirak edəcək. Partiyanın sədri, sabiq səhiyyə naziri Əli İnsanov namizəd olmayacaq.
Əli Mustafa: "Bunu həmin liderlərin özündən soruşmaq lazımdır ki, seçki mühiti sizi qane etmirsə, niyə üzvlərinizi qabağa verirsiniz"
Müstəqil siyasətçi Əli Mustafa "Bakı-Xəbər"ə açıqlamasında bildirdi ki, belə bir qeyri-müəyyən vəziyyətə onun özü də şahidlik edir: "Real şansları görsələr, təbiidir ki, partiya sədrlərinin özləri iştirak edərlər. Yəqin bu şansların olmadığını gördükləri üçün marafondan imtina edirlər. Bütün bunların təməl səbəbi odur ki, daha yaxşı seçki mühiti lazımdır. Biz nə vaxt Azərbaycanda istədiyimiz seçki mühitini təmin edəcəyiksə, onda hamı seçkidə iştirakda maraqlı olacaq. Ən böyük problemimiz də məhz budur. Ancaq bu heç də bəzi partiyaların məntiqsiz davranışına haqq qazandırmır. Sualınız çox yaxşıdır. Bunu həmin liderlərin özündən soruşmaq lazımdır ki, seçki mühiti sizi qane etmirsə, niyə üzvlərinizi qabağa verirsiniz?"
Mirkazım Seyidov: "Sizi əmin edirəm ki, bu addımı atan partiya sədrləri qələbə ilə bağlı bir balaca işıq ucu görsəydilər, mütləq mənada prosesə qoşulardılar"
Digər müstəqil siyasətçi Mirkazım Seyidov isə "Bakı-Xəbər"ə açıqlamasında bildirdi ki, doğrudan da, olduqca qəribə yanaşmadır: "Partiya sədrlərinin bu davranışı partiyaların daxilindəki avtoritarlıqdan xəbər verir. Belə çıxır ki, partiyalar siyasi təsisat yox, dərnəklər kimi idarə olunur. Onlar bu addımları ilə özlərini məğlubiyyətdən sığortalayırlar. Yəni göstərmiş olurlar ki, seçkidə udmaq şansları yoxdur, sadəcə, formalizmə görə iştirak edirlər. Sizi əmin edirəm ki, bu addımı atan partiya sədrləri qələbə ilə bağlı bir balaca işıq üzü görsəydilər, mütləq mənada prosesə qoşulardılar. Onda heç üzvlərin iştirakına şərait yaratmazdılar. Heç də xoş olmayan tendensiyadır. Partiyaların zəifliyindən xəbər verir. Proporsional seçki sistemi bərpa olunsaydı, belə olmazdı. Onda partiya sədrlərinin özləri adlarını siyahıda ilk yerə yazdıracaqdılar".
Məhəmmədəli QƏRİBLİ
