Bədrəddin Quliyev: "Siyasi baxımdan Makrona basqılar olacaq və onu Roma Papasından, bütün xristian dünyasından üzr istəməyə məcbur edəcəklər"
Parisdə keçirilən 33-cü Yay Olimpiya Oyunlarının açılış mərasimində İsa peyğənbər və 12 həvarisinin qadın obrazında təqdim edilməsi, bütövlükdə bu performans sözün həqiqi mənasında xristian dünyasını çalxaladı. Olay Fransa hökumətinə, xüsusən də prezident Emmanuel Makrona qarşı qəzəbi alovlandırdı.
Başda Roma Katolik kilsəsi olmaqla, Fransa kilsəsi də, digər xristian kilsə mərkəzləri də buna görə Fransa hökumətindən narazı qaldılar. Xristian peyğəmbərin təhqir edilməsi onu göstərdi ki, Allahsız Makron üçün müqəddəs heç nə yoxdur. Makronun aqnostik olduğu, Allaha, peyğənbərə inanmadığı barədə deyilənlər məhz bu məsələ ilə bir daha sübut olundu.
Bu olaydan sonra Makronun kilsə məhkəməsi tərəfindən cəzalandırımalı olduğu barədə də danışılır. Belə fikirlər var ki, Makron və onun hökuməti İsa peyğəmbərə qarşı təhqir səhnələrinə görə mütləq mənada Roma Papasından, xristian dünyasından üzr istəməlidir. Yəni üzr istəməsə Makrona olanlar olacaq.
Başda Roma katolik kilsəsi olmaqla, xristian ictimaiyyəti İsa peyğəmbərin Fransada təhqir edilməsinə görə Makronu üzr istəməyə məcbur edə bilərmi? Olimpiyadan sonra onun qarşısına belə bir tələb qoyula bilərmi ki, sən üzr istəməlisən?
Bir sıra ekspertlər bildirir ki, ola bilsin, artıq Makrona lazımı mesajları çatdırıblar və kilsə onu üzr istəməyə məcbur edəcək. Çünki Makronun üzr istəməkdən başqa çarəsi yoxdur. Bəzi ilahiyyatçılara görə, məhz buna görə Makron və onun hökuməti kilsə institutları tərəfindən beynəlxalq məhkəməyə də verilə bilər. Yəni Makron çıxıb üzr istəməsə, xristian dünyasından əfv diləməsə axırı yaxşı olmayacaq.
Bir prezidentin öz dininin banisi barədə bu cür təhqirlərin meydana çıxmasına rəvac verməsi onun əsl simasını göstərir.
"Bütün bunlara görə Makron cavab verməli olacaq"
Müstəqil siyasətçi Bədrəddin Quliyev "Bakı-Xəbər"ə bildirdi ki, Fransada keçirilən olimpiya oyunları faktiki olaraq fransız cəmiyyətinin, bu ölkənin rəhbərliyinin əsl simasını ifşa edib. "Fransa və fransızlar barəsində indiyə qədər şişirdilmiş obraz yaradılıb, bu ölkə Avropanın əsas mədəniyyət və demokratiya daşıyıcısı kimi qələmə verilirdi. Amma Olimpiya Oyunları zamanı Fransada mədəniyyətin və dini dəyərlərin aşındığı ortaya çıxıb. Qədim Fransadan heç bir şeyin qalmadığı ortadadır. Dövlətlərə, xalqlara, mədəniyyətlərə, öz dininə və başqa dinlərə münasibətin hansı səviyyədə olduğu bir daha dünyaya göstərildi. Makron arvadından çox asılıdır, özündən yaşca böyük olan arvadı mənşəcə yəhudidir və Makronun əlindən tutub aparır. Makron bir uşağa bənzəyir. Onun özünün hakimiyyətə gətirilməsi, bütün sistem "yevangelikan" sistemi ilə bağlıdır. Onun katolik kilsəsinə bağlılığı, demək olar ki, yoxdur. Makronun qulluq etdiyi din və sistem var. Onların gələcəkdə bir inanca sahib olmaqları məsələsi var, o istiqamətdə işlərini aparırlar.
Bu məsələ Avropa Birliyinin daxilində də narazlıq yaradır. Ümumiyyətlə, Makron hökuməti Vatikanla əlaqələri üzmək üzrədir. Onu katoliklik qətiyyən maraqlandırmır, öz qulluq etdiyi sistemi irəlilətmək üçün hər cür çirkin əmələ əl atır.
Amma məsələ burasındadır ki, siyasi baxımdan Makrona basqılar olacaq və onu Roma Papasından, bütün xristian dünyasından üzr istəməyə məcbur edəcəklər. Çünki onun bu davranışı xristian dünyasını silkələyib və ayıldıb. Xristian dünyası anlayır ki, Makron xristianlığı parçalamaq, onun təməl prinsiplərini laxlatmaq istəyir. Əlbəttə, bütün bunlara görə Makron cavab verməli olacaq"-deyə B.Quliyev bildirdi.
Siyasi ekspertin sözlərinə görə, hətta Makronun beynəlxalq məhkəməyə verilməsi məsələsi də gündəmə gətirilə bilər, çünki onun hərəkətlərini xristian dünyası bağışlamaz: "Makronun Olimpiya Oyunlarının açılış mərasimində bu cür hallara rəvac verməsi xristian aləmində, katolik dünyasında gedən böyük proseslərə təsir etdi. İkinci tərəfdən, super dövlətlər də Makronun bu hərəkətini təqdir etmədilər. Makronun ortaya çıxardığı çürümüş, mədəni dəyərləri olmayan bir sistem oldu və öz mədəni dəyərləri olmayan sistemdən də hər şey gözləmək olar".
B.Quliyev qeyd etdi ki, açılış mərasimində Azərbaycanın hədəfə alınması, ardınca İsa peyğəmbərin təhqir olunması, Çinin bayrağı ilə bağlı yaşanan olay, Makronun özünün fitə basılması kimi halların baş verməsi Fransa cəmiyyətinin də aşındığını göstərir. O hesab edir ki, Makron müasir dünyaya, dövlətlərə XVIII əsr baxışı ilə baxmağa çalışır və bu da onun naşılığını göstərir.
B.Quliyev əlavə etdi ki, Makronun bu siyasəti fransızların yeni dünya düzənində bu cür simasız formada yer tutmasının, üzə çıxmasının məntiqi nəticəsidir.
İradə SARIYEVA
