Fransanın paytaxtı Parisdə keçirilən Yay Olimpiya Oyunlarının açılış mərasimi, bir çox çatışmazlıqlarla yanaşı, həm də təxribatla yadda qaldı. Qeyd edək ki, Fransanın dövlətə məxsus milli televiziyası olan "France2" telekanalının müxbiri Azərbaycan və Ermənistan idmançılarının paraddan keçidi zamanı ayrıseçkilik nümayiş etdirərək Azərbaycanı Ermənistanla toqquşmalarda ittiham edib.
Eyni zamanda Ermənistanı Fransanın dostu adlandırıb və qeyd edib ki, bu il erməni xalqı üçün "Dağlıq Qarabağ"ın Azərbaycan ordusu tərəfindən süqutu kimi yadda qalıb.
Səslənən fikirlər bilavasitə Emmanuel Makron iqtidarının mövqeyini əks etdirir. Azərbaycanın buna səssiz qalması, təbii ki, mümkün deyil. Artıq Gənclər və İdman Nazirliyi ilə Milli Olimpiya Komitəsi Paris Olimpiadasında Azərbaycana qarşı təxribatla bağlı bəyanat yayıb. Burada qeyd edilir ki, baş verənlər faktiki olaraq Olimpiya Xartiyasının Əsas Prinsiplərinin pozulmasıdır. Olayla ilgili Beynəlxalq Olimpiya Komitəsinə rəsmi olaraq etiraz məktubu göndərilib. Ümumiyyətlə, Parisdə keçirilən yarış çoxsaylı qüsurlarla diqqəti cəlb edir. Məsələn, təhlükəsizlikdən tutmuş təmizliyə qədər geniş diapozaonda çoxsaylı problemlər qeydə alınır. Fransa oyunlarla bağlı mühacirləri Parisdən zorla çıxarıb. Parisdə yarışların və açılış mərasiminin keçiriləcəyi ərazilərdən evsiz və qeydiyyatsız insanlar şəhər ətrafına zorla köçürülüb. Bu zaman həmin insanların yeni yerdə yaşamaları, özlərini təmin etmələri üçün heç bir addım atılmayıb. Yolların bəziləri bağlandığından nəqliyyatda xaos, avtomobil qıtlığı yaranıb. Dəmir yollarında ard-arda törədilən yanğın hadisələri isə ölkədə təhlüksəziliklə bağlı ciddi problem olduğunu göstərir. Nəməlum şəxslər Kurtlan, Arrase, Lamorvil dəmir yolu infrastrukturlarında, həmçinin Myört və Mozel departamentlərində yanğın törədiblər. İnsident nəticəsində, nəqliyyat xətlərində ciddi problemlər yaşanıb. Bununla yanaşı, Paris olimpiadasında triatlonçuların yarışı öncəsi ikinci üzgüçülük məşqi ləğv edilib. Buna səbəb Sena çayında suyun keyfiyyətinin qənaətbəxş olmamasıdır. Olimpiadanın Təşkilat Komitəsi, Beynəlxalq Triatlon Federasiyası və yerli hakimiyyət orqanları suyun keyfiyyətinə kifayət qədər zəmanət vermədiyi üçün triatlon yarışının üzgüçülük hissəsinin ləğv edilməsi barədə qərar qəbul olunub. Fransa mətbuatı da oyunları tənqid edib, ekspertlər bunu hökumətin dəyişməsi və formalaşmış hakim koalisiyanın olmaması ilə əlaqələndiriblər. Fransız idmançılar şikayət edirlər ki, Olimpiya kəndindən idman obyektlərinə gedən yol çox vaxt aparır və bəzən iki saata qədər davam edir. Nəqliyyat işçiləri Fransa hökumətinin vəd etdiyi Olimpiya mükafatı adlanan pulun ödənilməsini tələb edirlər. 2024-cü il Olimpiadası ilə əlaqədar şirkətlər tətil edənlərin sayını kəskin azaldıb, uçuşların sayının artması səbəbindən qalan işçilərin iş yükü də kəskin artıb. Buna görə də həmkarlar ittifaqları maaşların artırılmasını tələb edib. Səlahiyyətlilər 1900 avro ödəniləcəyini vəd etsələr də, indiyədək sözlərinin üstündə durmayıblar. Zibilyığanlar da təkcə 1900 avroluq Olimpiya mükafatı deyil, həm də maaşların 400 avro artırılmasını tələb edərək işlərini tərk etməyə hazırdırlar. Kommunal xidmət işçiləri öz tələblərini turist axını ilə əlaqədar iş yükünün kəskin artması ilə əsaslandırırlar. "L'Equipe" qəzetinin məlumatına görə, Parisdəki Olimpiya kəndinin əsas restoranında bəzi qida məhsullarının çatışmazlığı aşkar edilib. İdmançıların özləri səhər yeməyi zamanı yumurta və qızardılmış ətin kifayət qədər olmamasından bu nəşrə şikayət ediblər. Onlar bəzi məhsulların yenidən gətirilməsi sürətindən də narazıdırlar.
Britaniyanın "Telegraf" qəzetinin yazdığına görə, Parisdə mehmanxana doluluğu ötən ilin müvafiq dövrü ilə müqayisədə aşağıdır. Həmçinin qeyd edilir ki, "Air France" aviaşirkətinin ilin üçüncü rübü üçün proqnozlaşdırdığı itkilər vətəndaşların azalan marağı və oyunlarin mərkəzinə çevriləcək məkanlara səyahət etmək istəməməsi ilə bağlıdır. "The Economist" nəşri də olimpiadanın parislilərə təsirindən yazıb. "Bəzi mağazalar və restoranlar sentyabr ayına qədər bağlıdır. Muzeylər son illərdə ən aşağı ziyarətçi saylarından birinə hazırlaşır. Hündür məftil hasarlar məhəllələri ayırır. Polis hər blokda dayanaraq kimlərin keçə biləcəyinə icazə verir. Paris COVID-19 səbəbilə artıq yaşanmış lokdaunu indi də hiss edir, sanki zombi hücumunu gözləyir. Olimpiada, şübhəsiz ki, maraqlı telekanal izləmə imkanı verəcək, lakin idman həvəskarları Parisdən uzaqda, rahat divanlarında yarışı izləyəcək qədər müdrikdir".Bu çatışmazlıqlar fonunda Azərbaycana qarşı təxribatçı mövqe Fransanın indiki hakimiyyətinin əsl simasını nümayiş etdirir. Beynəlxalq münasibətlər sahəsində amerikalı ekspert Piter Teys qeyd edir ki, Parisdə Yay Olimpiya Oyunlarının açılış mərasiminin canlı yayımı zamanı Azərbaycan komandasının ünvanına təxribat xarakterli ifadələr işlətdiyi üçün Fransanın müvafiq orqanları tərəfindən "France 2" telekanalına sanksiya tətbiq edilməlidir. Ekspert qeyd edib ki, telekanalın aparıcılarının Azərbaycan millisi ilə bağlı neqativ ifadələri reallığa uyğun gəlmir və Bakı ilə Paris arasında ikitərəfli münasibətlərin korlanmasına səbəb olacaq: "Parisdə təxribat xarakterli bəyanatlar müasir Avropa sivilizasiyasında yolverilməz olan dəhşətli presedentdir. Azərbaycan bütün Avropa ölkələri ilə tərəfdaşlıq edir və Parisdəki olimpiadada Bakıya qarşı bu cür qızışdırıcı bəyanatlar bizi Avropanın orta əsrlər tarixinin ən qaranlıq günlərinə qaytarır". Politoloq vurğulayıb ki, bu cür bəyanatlarla Fransa onsuz da sarsılmış imicini itirir. Ümumiyətlə isə, Paris Olimpiya Oyunları tarixdə ən bərbad formada təşkil olunan idman yarışı kimi qala bilər.
Ramil QULİYEV
