Sahib Məmmədov: "Seçki Məcəlləsinin 75.2. maddəsində göstərilir ki..."
"Hələ seçkiqabağı təşviqat başlamayıb, media orqanları bunu nəzərə almalıdır". Bunu Mərkəzi Seçki Komissiyasının iclasında MSK sədri Məzahir Pənahov bildirib.
MSK sədri qeyd edib ki, qeydə alınmış namizədlər belə hallara yol verməməlidir.
"Belə hallar olsa, MSK araşdıraraq, hətta həmin şəxsin namizədliyini də ləğv edə bilər", - o əlavə edib.
Qeyd edək ki, Prezident İlham Əliyev iyunun 28-də VI çağırış Milli Məclisin buraxılması və Milli Məclisə növbədənkənar seçkilərin təyin edilməsi haqqında sərəncam imzalayıb. Sərəncamla altıncı çağırış Milli Məclis buraxılıb və sentyabrın 1-nə növbədənkənar seçkilər təyin edilib.
Seçkidə namizədliyini vermiş, ya namizədliyi artıq qeydə alınmış, yaxud imza vərəqəsi götürmüş şəxslərdən tam başqa, qeyri-seçki, seçki ilə əlaqəsi olmayan məsələlərlə, tutalım, beynəlxalq münasibətlər, iqtisadi və sair mövzularla bağlı bu cür adamlardan müsahibə, şərh almaq, fikir öyrənmək qanuna nə dərəcədə uyğundur? Doğrudanmı, bu qanunla qadağandır? Seçki Məcəlləsinin hansı maddələri ilə bu tənzimlənir? Hansısa bir şəxs, qəzetimizin eksperti seçkidə namizədliyini veribsə, ondan qeyri - seçki mövzusunda açıqlama, müsahibə götürmək qanunidir, yoxsa qanunsuzdur? Seçki təbliğat kampaniyası başlamazdan əvvəl onlardan müsahibə almaq olar, yoxsa olmaz? Söhbət seçki təbliğat kampaniyası başlamazdan əvvəlki mərhələdən gedir. Avqustun 9-da seçki təbliğat kampaniyası başlayacaq. Söhbət isə indiki mərhələdən, təbliğat kampaniyası başlayana qədərki dövrdən gedir. Bu cür adamlardan müsahibə almaq, mətbuata çıxarmaq, yazısını, məqaləsini çap etmək, tam başqa məsələlərlə bağlı danışdırmaq qanunidir, yoxsa qanunsuzdur? Qanunsuzdursa, seçki Məcəlləsinin hansı maddəsi ilə tənzimlənir?
"Şəxslər namizədlikləri qeydə alındığı vaxtdan təbliğat-təşviqat başlayana qədər müsahibə verməkdən çəkinməlidirlər"
Əmək Hüquqlarının Müdafiəsi Liqasının sədri Sahib Məmmədov "Bakı-Xəbər"ə şərhində bildirdi ki, sosial şəbəkələr çıxandan sonra bu məsələləri tənimləmək mümkün deyil, tutalım, kimsə sosial şəbəkədə nəsə paylaşır, nəsə yazır və sair. O qeyd etdi ki, əslində burada dəqiq bir sərhəd yoxdur. S.Məmmədovun sözlərinə görə, kütləvi informasiya vasitələri, xüsusən də televizyalar məhdidiyyət qoyublar. "Artıq MSK sədri Məzahir Pənahov da bildirib ki, belə hallar var, biz bunu görürük və tədbir görəcəyik. Xəbərdarlıq etdi. İstənilən halda, təbliğat-təşviqat kampaniyası başlayana qədər namizədliyini vermiş şəxslər çəkinməlidir. Ya da onların verdiyi xəbərlər elə xəbərlər olmalıdır ki, bu onların təşviqinə yönəlməməlidir, yəni biliyini, savadını nümayiş etdirməməlidir və sair. Seçki qaydalarına görə, şəxsin namizədliyi qeydə alındığı andan təbliğat-təşviqat kampaniyası başlayana qədər onlar mətbuatda çıxış etməməlidir. Bu olmaz".
S.Məmmədov qeyd etdi ki, namizədliyi qeydə alınmış şəxslərin qeyri-seçki mövzusunda da danışması, müsahibə verməsi, şərh verməsi doğru deyil. "Tutalım, siz onlarla beynəlxalq mövzuda danışırsınız, onun potensialını dərhal seçici qiymətləndirir ki, demək bu adam beynəlxalq mövzunu çox gözəl bilir. Yaxud hüquqdan danışdırırsıza, deyirlər ki, bu hüququ, qanunvericilik sistemini yaxşı bilir. Yaxud digər bir mövzuda danışdırırsınıza, şərh verirsə, istər-istəməz yenə də özünü tanıntdırır. Yəni burada sərhədi müəyyən etmək çətindir. Ona görə də birdəfəlik deyiblər ki, şəxslərin namizədlikləri qeydə alındığı vaxtdan təbliğat-təşviqat başlayana qədər müsahibə verməkdən çəkinməlidirlər.
Belə deyək, sosial şəbəkələrdə bu qaydalar onsuz da pozulur".
Təbliğat-təşviqat kampaniyasının başlandığı günə qədər namizədliyi qeydə alınmış şəxslərdən müsahibə almaq qanunsuzdursa, bu, seçki Məcəlləsinin hansı maddəsi ilə tənzimlənir?
S.Məmmədov bildirdi ki, Seçki Məcəlləsində qeydiyyata alınmış namizədlər haqqında tələblər var.
"Seçki Məcəlləsinin 75.2. maddəsində göstərilir ki, seçkiqabağı təşviqat səsvermə gününə 23 gün qalmış başlayır və səsvermənin başlanmasına 24 saat qalmış dayandırılır. Yəni bu o deməkdir ki, bundan əvvəl də, sonra da olmaz. Deməli, səsvermə gününə 23 gün, səsvermənin başlanmasına 24 saat qalana qədər aparılan bütün təşviqat qanunsuzdur".
S.Məmmədov bildirdi ki, MSK-nın namizədlərə bu çağırışı qanunidir.
İradə SARIYEVA
