Elşən Əliyev: "Bütün bunların fonunda Makronun bu tədbirə 11 milyard vəsait ayırması, xalqın mənafeyinə zidd olaraq, onun özünüreklam marağına xidmət edir"
Fransa prezidenti Emmanuel Makron Parisdə keçirilən Yay Olimpiya Oyunlarının açılış mərasimində tamaşaçılar tərəfindən fitə basılıb. Bu barədə Fransanın "Vətənpərvərlər" partiyasının lideri Florian Filippo "X" sosial şəbəkəsində yazıb.
Siyasətçi qeyd edib ki, auditoriya Makronun gəlişindən açıq-aydın narazılığını ifadə edib, buna görə də o, çaşıb qalıb.
Filippo öz paylaşımına Fransa liderinin çıxışı zamanı fit və qışqırıqların eşidildiyi qısa videonu əlavə edib. Onun sözlərinə görə, bu fraqment efirdə kəsilib.
Xatırladaq ki, iyulun 26-da Parisdə Olimpiya Oyunlarının açılışı olub.
Makronun Oimpiya Oyunlarına 11 milyard avro pul xərclədiyi bildirilir. Ölkədə böyük sosial narazılıqlar var, əhalinin alıcılığı düşüb, dövlət pensiyaçıların cibinə girib. Təqaüd yaşı qaldırılıb, müstəmləkələr ayağa qalxıb.
Belə durumda olan Makron bu cür bahalı Olimpiya Oyunları keçirməklə hansı məqsədləri güdür?
İqtisadçı Elşən Əliyev "Bakı-Xəbər"ə açıqlamasında bildirdi ki, Fransa Milli Statistika və İqtisadi Tədqiqatlar İnstitutunun son məlumatlarına əsasən, Makronun təşəbbüsü ilə keçirilən növbədənkənar parlament seçkilərindən sonra iyul ayında ölkə sənayesi gözlənilmədən aşağı düşüb. Beləliklə, Fransa artan təhlükəsizlik narahatlıqları fonunda dünyanın ən böyük idman tədbirinə ev sahibliyi edir. Makron vəziyyətdən çıxış yolunu böyük şirkətlərlə bağlı görüntü verməkdə görür. O, bu həftə istefa verən hökumətinin Oyunların sonuna qədər yerində qalacağını bildirib. Makronun keçirdiyi investisiya sammitində "Tesla"nın sahibi İlon Mask, LVMH şirkətinin rəhbəri Bernard Arno, həmçinin "Coca-Cola", "Samsung", "TikTok" və digər şirkətlərin rəhbərləri də iştirak edib. Xatırladaq ki, Makronun müşaviri ötən həftə jurnalistlərə deyib ki, Prezident sammitdən siyasi böhran qorxusunu aradan qaldırmaq üçün istifadə edəcək.
Fransanın gərgin siyasi mənzərəsi fonunda keçirilən Paris Olimpiya Oyunları etirazların katalizatoru kimi çıxış etmək potensialına malikdir. Seçkilərdə dominant qüvvə kimi ortaya çıxan solçu ittifaq tərəfdarlarını sərt və hədsiz hesab edə biləcəkləri geniş təhlükəsizlik tədbirlərinə qarşı səfərbər etmək fürsətindən istifadə edə bilər. Parisdə bu məhdudiyyətlərlə daha da kəskinləşən mövcud siyasi gərginlik qeyri-sabit mühit yaradır.
Oyunların ona lider kimi yüksəlməyə kömək edəcəyinə ümid edən Makron indi reallıqla üzləşir və görür ki, kütlə onu fitə basır".
Ekspertin sözlərinə görə, Fransa Olimpiadası Yay Olimpiya Oyunları tarixində ən biabırçı idman tədbiri olaraq tarixə düşdü: "Beynəlxalq idman yarışının keçirildiyi günlərdə baş verən hadisələr, britaniyalı iştirakçıların qida azlığı və keyfiyyətsiz qida səbəbindən yeməkdən imtina etmələri, səfalət həddində yaşayan və evi olmayan əhalinin küçələrdən qovulması, dövlət qurumlarına kütləvi hücumlar, diskriminasiya siyasəti, dini baxış və inanclarına görə müsəlmanların təqiblərə məruz qalması, qadın idmançıların hicab taxmasına qarşı qadağalar, papaq taxılması tələbi, ölkə miqyasında xaotik durum Parisin olan-qalan nüfuzunu da yerlə bir etdi. Bütün bunların fonunda Makronun bu tədbirə 11 milyard vəsait ayırması, xalqın mənafeyinə zidd olaraq, onun özünüreklam marağına xidmət edir".
Məhəmmədəli QƏRİBLİ
