Şakir Ağayev: "Bu dövlət başçılarının Fransada keçirilən Olimpiya Oyunlarının açılışına gəlməməsi..."
Parisdə 33-cü Yay Olimpiya Oyunları başlayıb. Yay Olimpiya Oyunlarına ev sahibliyi edən Fransa açılış anındaca öz əsl simasını və yürütdüyü siyasəti tam çılpaqlığı ilə ortaya qoydu. Bu öz yerində. Maraqlıdır ki, Parisdə keçirilən 33-cü Yay Olimpiya Oyunlarının açılışına sanballı dövlət başçıları gəlmədi.
Məsələn, ABŞ, Britaniya, İtaliya, Çin kimi iri dövlətlərin başçıları açılış mərasiminə qatılmadılar. Bütün dünyanı birləşdirməyi, dostluğu və qırılmaz əlaqələri özündə ehtiva edən Olimpiya Oyunlarının açılışında iri dövlətlərin başçıılarının görsənməməsi belə düşünməyə əsas verir ki, onlar Olimpiya Oyunlarının Fransada keçirilməsini boykot ediblər.
Buna boykot demək olarmı?
Ekpertlər hesab edir ki, ümumiyyətlə, dünya dövlətləri başçıları səviyyəsində Makrona heç bir müsbət jest edilmədi və nüfuzlu dövlətlərin başçıları onu saya salmadı. Bir çox ekspertlər hesab edirlər ki, ABŞ, Britaniya, İtaliya, Çin kimi böyük dövlətlərin başçıları, əslində, bu oyunları boykot etdilər, bütün bunlar isə Makrona görə baş verdi. Makronun apardığı siyasətin Avropanın özündə də, digər dövlətlərdə də qıcıq yaratdığını deyən ekspertlərə görə, bu boykot da ondan qaynaqlanır.
"Bu, Fransaya və Makrona olan bir etinasızlıq, etibarsızlıq münasibətinin göstəricisidir"
"Novoye vremya" qəzetinin baş redaktoru Şakir Ağayev "Bakı-Xəbər"ə şərhində bildirdi ki, bunu daha çox Makron hökumətinə etimadsızlığın, etinasızlığın, etibarsızlığın örnəyi kimi dəyərləndirmək olar. "Bu dövlət başçılarının Fransada keçirilən Olimpiya Oyunlarının açılışına gəlməməsi onların Makrona, Fransaya münasibətlərinin rəmzidir. Təbii ki, Makronun son dövrlər sərgilədiyi davranışlar bu dövlətlər tərəfindən o qədər də qəbul edilmədiyinə görə gəlməyə bilərlər. Onlar bunun adına tam olaraq boykot deməyiblər, bu oyunlarda o ölkələrin idmançıları iştirak edir. Amma buna boykot yox, bir etinasıqlıq demək olar. Bu, Fransaya və Makrona olan bir etinasızlıq, etibarsızlıq münasibətinin göstəricisidir. Onlar bunu nümayiş etdirdilər"-deyə Ş.Ağayev bildirdi.
Ş.Ağayevin sözlərinə görə, ümumiyyətlə, Olimpiya Oyunlarının açlışında baş verən hallar, müşahidə edilən çatışmazlıqlar diqqətdən yayınmadı. Ş.Ağayev qeyd etdi ki, Makronun rəhbərlik etdiyi ölkədə keçirilən Oyunların açlışında göstərilən performanslar xristian aləmində Fransaya qarşı bir kin-kudurət yaradıb. "Təqdim edilən performans da xristian dünyasını kəskin şəkildə qıcıqlandırıb və Makrona qarşı kin-küdurətə səbəb olub. Eyni zamanda Azərbaycana qarşı sərgilənən münasibət, ermənilərə xüsusi rəğbətin göstərilməsi kimi məsələlər hamısı, təbii ki, Olimpiya Oyunlarını kölgədə qoyur. Deyim ki, düzü, indiyə qədər Olimpiya Oyunları belə sönük keçirilməyib, ona belə etinasız münasibət olmayıb. Bütün bunlar Makrona və Fransaya bir etinasızlığın nümunəsidir"-deyə Ş.Ağayev vurğuladı.
İradə SARIYEVA
