Dünya mümkün böyük müharibə ilə təhlükəsi ilə üz-üzədir. Rusiya-Ukrayna müharibəsinin gündən-günə yayılma risqi müzakirə edildiyi bir vaxtda ABŞ-ın 2026-cı ildə Almaniyaya uzaqmənzilli raket yerləşdirmə planı Rusiya tərəfindən "Avropanı məhv edəcəyik" təhdidi ilə qarşılandı.
Rusiya prezidenti Vladimir Putin Amerikanın yüksək dəqiqlikli raket sistemlərinin Almaniya ərazisində yerləşdiriləcəyi təqdirdə, hazırlanması son mərhələdə olan sistemlərlə oxşar tədbirlər görəcəklərini açıqlayıb. Putin Rusiya Hərbi Dəniz Qüvvələrinin və onun silahlarının daim yeniləndiyini, gəmiləri yüksək texnologiyalı yeni nəsil avadanlıq və hipersəs raket sistemləri ilə təchiz etməyə və inkişaf etdirməyə davam edəcəklərini bildirib.
ABŞ və Almaniya hökumətlərinin Amerikanın uzaqmənzilli yüksək dəqiqlikli raket sistemlərini 2026-cı ildən etibarən Almaniya ərazisində yerləşdirmək planları ilə bağlı açıqlamalar verdiyini xatırladan Putin, Rusiyanın mühüm dövlət və hərbi obyektləri, inzibati və sənaye mərkəzləri, müdafiə infrastrukturunun bu raketlərin əhatə dairəsinə girəcəyini deyib.
Gələcəkdə nüvə başlıqları ilə təchiz oluna biləcək bu cür raketlərin bölgəmizdəki hədəflərə uçuş müddətinin təxminən 10 dəqiqə olacağını deyən Putin, bundan əvvəl ABŞ-ın təlimlər zamanı Danimarka və Filippinə "Typhon" raket sistemləri yerləşdirdiyini bildirib: "Əgər ABŞ belə planları həyata keçirsə, donanmamızın sahil qüvvələrinin imkanlarının artırılması da daxil olmaq orta və yaxın mənzilli hücum silahlarının yerləşdirilməsi ilə bağlı əvvəllər qəbul edilmiş birtərəfli moratoriumdan çəkiləcəyik. Bu gün belə sistemlərimizdən bəzilərinin hazırlanması son mərhələdədir...
Biz ABŞ və onun peyklərinin Avropada və dünyanın digər yerlərindəki hərəkətlərini nəzərə alaraq, bunları yerləşdirmək üçün oxşar addımlar atacağıq".
Rusiya strateji təyyarələrinin uçuşları ilə bağlı Vaşinqtonda gərginliyin artdığına diqqət çəkən Putin, Rusiya strateji raket təyyarələrinin Sovet İttifaqının dağılmasından bu yana Rusiya sərhədlərindən uzaqda hava patrulları həyata keçirmədiyini deyib.
"O zaman Rusiya buna gərək olmadığına inanırdı. Dünya dəyişmişdi, soyuq müharibə keçmişdə qalmışdı. Lakin ABŞ bu birtərəfli jestə cavab vermədi və bizim sərhədimizdə patrul uçuşlarına davam etdi. Buna görə də biz 2007-ci ildə yenidən belə uçuşlara başladıq. Bu tədbir ABŞ-ın strateji və kəşfiyyat təyyarələrinin Rusiyaya qarşı dünyanın həssas bölgələrində artan fəaliyyətinə cavabdır. Bu tədbir həm də Asiya-Sakit okean bölgəsində təhlükəsizliyin təmin edilməsinə yönəlib" - deyə Rusiya lideri bildirib.
TAHİR
