Arzuman Abdulkərimov: "COP29 kimi ciddi tədbirə ev sahibliyi edəcək ölkəmiz bu məsələdə prinsipial mövqe tutur"
Prezident İlham Əliyev Şuşada keçirilən qlobal media Forumunda Frans Keyn adlı jurnalistin "COP29-la bağlı tədbirlərin mediada işıqlandırılmasını necə görürsünüz və Sizin yanaşmanız necə olacaqdır? Çünki böyük ehtimalla, bu tədbir Qərb mediası tərəfindən qərəzli şəkildə işıqlandırılacaqdır"-sualına belə cavab verib:
"Mən səmimi desəm, bundan əvvəl iqlim məsələləri ilə o qədər də dərindən məşğul olmurdum. Ancaq indi mən anladım ki, inkişaf edən və inkişaf etmiş ölkələr arasında çox böyük qeyri-səmimiyyət, qarşılıqlı ittiham var. Hansı ölkə planetimizə daha çox ziyan vurubdur, məsuliyyətli ölkə kimdir və onları bir növ məsuliyyətə cəlb etmək və cəzalandırmaq cəhdləri var. Biz bunu geridə qoymalıyıq. Bu, bizə heç bir nəticə verməyəcəkdir. Biz inkişafda olan kiçik ada ölkələri ilə əməkdaşlıq edirik. Bizim COP29 çərçivəsində bununla bağlı tədbirimiz olacaqdır və orada ittifaq ölkələri də iştirak edəcək. Biz ittifaq ölkələri ilə birgə fond yaradacağıq ki, inkişafda olan həmin kiçik ada ölkələrinə kömək edək. Çünki bu vəziyyət onların mövcudluğuna təhlükədir. Yəni, biz müxtəlif istiqamətdə irəliləyirik. Hesab edirəm ki, biz Birləşmiş Ərəb Əmirliklərinin COP28-in ev sahibi kimi təcrübəsindən istifadə edəcəyik və onun üzərindən işimizi aparacağıq. Ancaq ondan qabaq COP-a Misir ev sahibliyi edibdir. Onların da neft və qazı var. Bizdən sonra da Braziliya ev sahibliyi edəcək. Yenə də neft və qaz ölkəsidir. Bu, onu göstərir ki, bu ölkələr enerji təhlükəsizliyi baxımından özlərini çox rahat hiss edən ölkələrdir. Onlar məsuliyyət nümayiş etdirirlər. Onlar yaşıl texnologiyaya, yaşıl keçidə sərmayə qoyur, töhfə verirlər. Xanım Rebekka qeyd etdiyi kimi, yaşıl həmrəylik mövzusu müzakirə ediləcəkdir. Bu il Azərbaycanda "Yaşıl dünya naminə həmrəylik ili" elan edilib. Ümid edirəm ki, uğurlu tədbir kimi onun yaxşı nəticələri olacaq. Bütün dostlarımızı noyabrda bizimlə birlikdə olmağa dəvət edirəm".
Göründüyü kimi, Prezident bu yanaşması ilə Şuşadan dünyaya mühüm mesaj verir ki, iqlim məsələlərinə görə dünyanın inkişaf etmiş və etməyən ölkələri arasında dərin ziddiyyət var.
Prezidentin toxunduğu bu vacib məqamı necə şərh etmək olar?
Siyasi şərhçi Arzuman Abdulkərimov "Bakı-Xəbər"ə açıqlamasında bildirdi ki,
Ondan sonrakı hadisələr göstərdi ki, doğrudan da ölkə başçısının toxunduğu bu mövzu hazırda gündəlikdə duran önəmli məsələlərdən biridir: "Ölkə başçısının qaldırdığı bu məsələ lokal xarakter yox, bəşəri mahiyyət daşıyır. Cənab Prezident bundan əvvəl də bənzər təşəbbüslərlə çıxış edib.
Pandemiya elan olunduğu gündən Prezident İlham Əliyevin yeni növ koronavirus infeksiyasına qarşı səmərəli mübarizənin təmin olunması üçün beynəlxalq platformaların yaradılması təşəbbüsünü irəli sürdü. Onun bu addımı dünyada böyük rəğbətlə qarşılandı. Qoşulmama Hərəkatının Sədri kimi Prezident İlham Əliyevin COVİD-19 pandemiyası ilə mübarizə məqsədilə BMT Baş Assambleyasının xüsusi sessiyasının keçirilməsi barədə təşəbbüsünün 130-a qədər dövlət tərəfindən dəstəklənməsi beynəlxalq ictimaiyyət tərəfindən ölkəmizə olan böyük etimadın növbəti təzahürü idi. BMT Baş Assambleyasının xüsusi sessiyasında pandemiyaya qarşı mübarizədə beynəlxalq əməkdaşlığın həyata keçirilməsi yönündə müzakirələrin aparılması və qarşıya qoyulan problemlərin həlli istiqamətində görülən işlər böyük əhəmiyyət daşıdı. Bir sözlə, Prezident İlham Əliyevin bəşəriyyət üçün əhəmiyyətli olan təşəbbüsünün dəstəklənməsi bir daha Azərbaycanın bəşəri problemlərin həllində çevik fəaliyyəti ilə seçilən ölkə olduğunu təsdiqləyib. Bundan əlavə, Prezident vaksin millətçiliyi, vaksinlərin ədalətsiz bölüşdürülməsinə də kəskin etiraz etdi. Bunun nəticəsində vaksinlərin kasıb ölkələrə də çatdırılması təmin edildi. Eyni zamanda, COVID dönəmində biz 30-dan çox ölkəyə maddi və humanitar yardım göstərdik. İqlim dəyişikliyi ilə bağlı məsələ də bəşəri problemdir. Eyni mənzərə ekologiya və iqlim mövzularına yanaşmada yaşanır. İnkişaf etmiş ölkəıər maksimum dərəcədə məsuliyyəti başqalarının üstünə atmaq istəyir. COP29 kimi ciddi tədbirə ev sahibliyi edəcək ölkəmiz bu məsələdə prinsipial mövqe tutur. Bu haqsızlıqla bağlı da dünyaya ciddi mesajlar vermiş olur".
Məhəmmədəli QƏRİBLİ
