Qasım Hacıyev: "Bu mesajın böyük mənası var və Ermənistan rəhbərliyi bunun ciddiliyini və vacibliyini anlamalıdır, Qərbi azərbaycanlıların geri qayıdışı istiqamətində addım atmalıdır"
"...Mən əminəm ki, həmin gün mütləq gələcək. Burada biz, əlbəttə ki, Ermənistan rəhbərliyinin siyasi iradəsinə, bəyan etdiyi demokratiya və qanunun aliliyi prinsiplərinə sadiqliyinə ümid bəsləyirik. Biz onlardan açıq-aydın bəyanat gözləyirik ki, bugünkü Ermənistan ərazisindən, Qərbi Azərbaycandan qovulmuş azərbaycanlılar, yaxud oradan didərgin salınanların övladları və nəsilləri öz tarixi torpaqlarına necə qayıda və həmin yerlərə gedə bilərlər, yaxud həmin torpaqlarda necə yaşaya bilərlər. Üstəlik, bizdə olan kifayət qədər mötəbər məlumatlara görə, azərbaycanlıların yaşadığı kəndlərin 90 faizində indi həyat yoxdur, yəni həmin yerlər boşdur, oralar Füzuli, Ağdam və digər yerlər, habelə bütün digər Azərbaycan kəndləri 30 il ərzində dağıdıldığı kimi yerlə-yeksan edilib. Orada bəzi kəndlərdə isə erməni əhalisi məskunlaşıb. Ona görə də mən çox inanıram ki, həmin gün mütləq gələcək. Mən bu barədə dəfələrlə danışanda, təbii ki, erməni diasporunun nəzarətində olan beynəlxalq müstəvilərdə məni az qala işğalçı fikirlərə düşməkdə ittiham etməyə başladılar. Mən dedim ki, biz oraya tanklarla yox, avtomobillərlə gələcəyik. Mən bunu indi də deyirəm. Düşünürəm ki, bu mesaj, bugünkü erməni rejiminin sponsorlarının, xüsusən Parisdə və digər Qərb paytaxtlarındakıların onlara çox aydın şəkildə çatdırmalı olduğu ismarışlardan biridir".
Bu fikirləri Prezident İlham Əliyev iyulun 20-də "Yalan məlumatların ifşası: Dezinformasiyaya qarşı mübarizə" mövzusunda 2-ci Şuşa Qlobal Media Forumda Maksim Şevçenkonun "Sovet İttifaqının süqutundan sonra 300 minə yaxın azərbaycanlı Qərbi Azərbaycandan, indiki Ermənistan ərazisindən qovulub. Sualım belədir, biz azərbaycanlıların öz Vətənlərinə, heç olmasa, qonaq kimi gələ bildiyi günü görə biləcəyik? Bu prosesdə hər hansı irəliləyiş olacaqmı? Azərbaycanlılar öz Vətənlərini - Qərbi Azərbaycanı görəcəklərmi"sualını cavablandırarkən deyib.
"Ermənistan nəhayət ki, xaricdə oturan ağalarının sözündən çıxmalıdır, müstəqil davranış göstərib azərbaycanlıları geri qaytarmalıdır"
AMEA-nın Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev "Bakı-Xəbər"ə şərhində bildirdi ki, artıq Qərbi azərbaycanlıların geri qayıdışı məsələsi təkcə bizi deyil, başqalarını da düşündürür: "Maksim Şevçenkonun verdiyi suala Azərbaycan Prezidenti çox nikbin cavab verdi və bildirdi ki, mütləq o gün gələcək, Qərbi azərbaycanlılar öz yurdlarına qayıdacaqlar. Bu mesajın böyük mənası var və Ermənistan rəhbərliyi bunun ciddiliyini və vacibliyini anlamalıdır, Qərbi azərbaycanlıların geri qayıdışı istiqamətində addım atmalıdır. Bütün dünya ermənilərin etnik təmizləmə və deportasiya cinayətlərindən xəbərdardır. Dünya bilir ki, Qərbi azərbaycanlılar öz evlərindən qovulublar, zorla çıxarılıblar".
Q.Hacıyevin sözlərinə görə, uzun illərdir ermənilərin bu cinayətlərini onlara havadarlıq edən məlum dövlətlər, beynəlxalq siyasi mərkəzlər riyakarcasına ört-basdır etməyə çalışsalar da, yenə də dünya bundan xəbərsiz qalmayıb. İndiki Ermənistan ərazisinin erməni torpağı olmadığını qeyd edən Q.Hacıyev bildirdi ki, bəzi jurnalstlər, alimlər, yazıçılar, siyasətçilər bunu bildikləri halda ermənilərin maraqlarını müdafiə etməkdən qalmırlar. O torpaqların nə tarixi, nə hüquqi, nə də digər baxımdan ermənilərə aidiyyatı olmadığı halda vaxtilə onların ora yerləşdirildiyini deyən Q.Hacıyev hesab edir ki, Ermənistan dövləti azərbaycanlıların, yerli əhalinin geri qayıdışını təmin etməlidir. "Ermənistan nəhayət ki, xaricdə oturan ağalarının sözündən çıxmalıdır, müstəqil davranış göstərib azərbaycanlıları geri qaytarmalıdır. Cənubi Qafqazda sülhün, din və yanaşı yaşamağın bir yolu da bu məsələdən keçir ki, Ermənistan öz üzərinə düşən öhtəlikləri yerinə yetirsin, Qərbi azərbaycanlıların geri qayıdışını və onların dinc, təhlükəsiz yaşayışını təmin etsin".
Bu gün bir sıra beynəlxalq təşkilatların, hətta bəzi dövlətlərin Qarabağdan könüllü köçüb getmiş ermənilərlə bağlı Azərbaycana çağırışını absurd sayan Q.Hacıyev bildirdi ki, ermənilərin onlara aid olmayan Qarabağa qayıdışını istəyənlər mütləq şəkildə azərbaycanlıların öz tarixi yirdlarına, boş qalmış ev-eşiklərinə qayıtması məsələsini də tələb kimi Paşinyan hökumətinin qarşısına qoymalıdır. Q.Hacıyevin bildirdiyinə görə, ermənilər Qarabağda yaşadığı dövrdə heç zaman rahat dayanmayıb, separatzimlə məşğul olub, azərbaycanlılara qarşı hər cür cinayət törədiblər, onlar bunu xaricdəki maliyyə dəstəkçilərinin, sponsorlarının hesabına ediblər. Q.Hacıyev bildirdi ki, ermənilər Qarabağa qayıtsalar onların burada dinc dayanacağına, yenidən bizə qarşı əllərinə silah götürüb vuruşmaycaqlarına, torpaq iddiasına düşməyəcəklərinə nə Ermənistan, nə də onların xaricdəki ağaları təminat verə bilər. "Ermənilər nə Qarabağda, nə də Ermənistanda yerli əhali deyil, hamı bilir ki, onlar bizim torpaqlara, bütövlükdə Cənubi Qafqaza XIX əsrin əvvəllərində köçürülüb məskunlaşdırılıb. Ermənilərin tarixi vətəni Qafqazda deyil, gedib başqa coğrafiyalarda özlərinə vətən axtarsınlar. Amma azərbaycanlılar indi Ermənistan adlanan ölkənin yerli sakinləridir. Ora bizim tarixi torpağımızdır.
Qərbi azərbaycanlıların geri qayıdışı mütləqdir. Bu gün ermənilərin Qarabağa qayıdışı barədə çağırış etməyə vaxt itirməkdənsə, bütün dünya öz ata – baba torpaqlarından, qədim ərazilərimizdən zorla qovulan yüzminlərlə Qərbi azərbaycanlının öz tarixi vətənlərinə qayıdışını aktuallaşdırmalıdır, bu məsələ müzakirə olunmalıdır. Beynəlxalq tribunalardan Ermənistana çağırışlar edilməlidir ki, azərbaycanlıları geri qaytarın.
Bunu tələb etməyə Azərbaycan dövlətinin, Azərbaycan xalqının çox böyük haqqı var. Ermənilər haqsız olaraq Qarabağa qayıtmağı tələb edirlər, amma azərbaycanlılar öz haqqları çatdığı torpaqlara, evlərinə qayıtmalıdır. Bütün dünya da bunu dəstəkləməlidir. Çünki bu qədər haqsızlıq ola bilməz. XX əsrdə yüzminlərlə azərbaycanlının indiki Ermənistandan deportasiyası çox acı insan faciələrinə səbəb oldu. Evlərindən qovulan azərbaycanlıların tapdalanmış hüquqalarının bərpasına dünya dəstək göstərməlidir. Ermənistanda onların qayıtmasına şərait yaradılmalıdır, revanşizmdən əl çəkilməlidir. Azərbaycanlılar hər zaman sülh, dinc yaşayış tərəfdarı olub, bu gün də o cürdür. Soydaşlarımızın istəyi öz ata-baba evlərinə qayıtmaqdır, ermənilər kimi əsassız iddialarda deyillər".
Q.Hacıyev bildirdi ki, ermənilər də qayıtmaq istəyirlərsə, bizim torpaqlarda yaşamaq arzusundadırlasa, revanşizmdən, separatzimdən imtina etməli, Azərbaycan vətəndaşları kimi, dövlətimizin qanunlarına tabe olub yaşamaıldırlar, əks halda mümkün deyil. "Hesab edirəm ki, Qərbi azərbaycanlıların öz ata-baba yurdlarına "Böyük Qayıdışı" çox əhəmiyyətlidir. Paşinyan həqiqətən də sülh istəyirsə azərbaycanlıların qayıdışına yönəlik addımlar atsın"-deyə Q.Hacıyev bildirdi.
İradə SARIYEVA
