İlyas Hüseynov: "Oksfordda görüşdən imtina da, şübhəsiz ki, ümumi sülhlə bağlı nikbinliyə zərbə vurdu"
"...Mətn üzərində danışıqlar davam edir. Deyə bilmərəm ki, xarici işlər nazirləri növbəti görüşü nə zaman keçirəcək. Bu gün mən daha az nikbinəm. Çünki bildiyiniz kimi, baş nazir Paşinyan mənimlə Britaniyada görüşməkdən imtina etdi. Bu, Britaniya Hökumətinin təşəbbüsü idi. Təklif o idi ki, bizim aramızda belə bir görüş keçirilsin, həmin Oksford tədbiri çərçivəsində. Ermənistan tərəfi bu təklifi rədd etdi. Biz buna çox təəccübləndik, çünki dörd ay bundan əvvəl Kansler Şolts Münhen şəhərində bənzər bir görüş təşkil etdi. O, görüşdə iştirak edirdi, 5-6 dəqiqə ərzində bizimlə bir yerdə oldu, sonra otağı tərk etdi. Detallar bu idi. Belə bir format düşünülmüşdü ki, o, giriş sözündən sonra otağı tərk etsin. Beləliklə, görüşümüz ikitərəfli qaydada davam etdi. Britaniya Hökuməti də eyni təklifi verdi. Görüşdə Britaniyanın Baş naziri iştirak edəcəkdi və sonra çıxacaqdı. Baş nazir Paşinyan bundan imtina etdi. Yəni o mənimlə danışmaq istəmirsə, hansı sülh sazişindən söhbət gedə bilər? O, Britaniyanın Baş naziri ilə danışmaq istəmirsə, Londona və Oksforda niyə səfər edirdi? Yəni bir sıra məsələlərdə çox ciddi ziddiyyət var. Ancaq biz baxacağıq, dediyim kimi, mən Londondan dünən qayıtmışam. Bir istiqamət mətndir - sülh sazişinin mətni, digəri isə, əlbəttə ki, dediyim kimi, Ermənistan konstitusiyasıdır". Bu fikirləri Prezident İlham Əliyev iyulun 20-də "Yalan məlumatların ifşası: Dezinformasiyaya qarşı mübarizə" mövzusunda 2-ci Şuşa Qlobal Media Forumunda Türkiyənin "Haber Global" televiziyasının aparıcısı Saynur Tezenin "Hazırkı vəziyyət, sülh sazişi ilə bağlı vəziyyət nədən ibarətdir? Sizcə sülh sazişi nə zaman imzalanacaq" sualına cavab olaraq bildirib.
"Paşinyan sülhdə maraqlı deyil, yaxud ayrı-ayrı geosiyasi mərkəzlərin sifarişlərini yerinə yetirir, öz müstəqil xarici siyasəti yoxdur"
Politoloq İlyas Hüseynov "Bakı-Xəbər"ə şərhində bildirdi ki, Azərbaycanla Ermənistan arasında sülh prosesi Ermənistanın davranışları səbəbindən getdikcə dalana dirənir: "Londonda Böyük Britaniyanın yeni Baş nazirinin təşəbbüsü ilə görüşün keçirilməsindən Ermənistanın imtina etməsi də göstərir ki, Paşinyan sülhdə maraqlı deyil, yaxud ayrı-ayrı geosiyasi mərkəzlərin sifarişlərini yerinə yetirir, öz müstəqil xarici siyasəti yoxdur. Bu görüş nəticəsində Azərbaycanın tələbləri bir daha bəyan olunacaqdı, bu da Ermənistan tərəfindən mütləq icra edilməli idi. Ermənistan isə bu tələbləri icra etməkdə prosesi uzadır və çalışır ki, maksimal dərəcədə sülh müqaviləsinin imzalanmasından boyun qaçırsın. Digər tərəfdən, Xarici İşlər nazirlikləri, hansı ki sülh müqaviləsinin mətninin razılaşdırılması ilə məşğuldur, onların da görüşləri təxirə salına bilər".
İ.Hüseynovun sözlərinə görə, Qərbin Ermənistana yardımları, "Sülh Fondunun" 10 milyon, Avropa İttifaqı ilə Ermənistan arasında viza rejiminin sadələşdirilməsi istiqamətində danışıqların başlanması, şübhəsiz ki, ümumi sülh və təhlükəsizlik prosesinə mənfi təsir göstərən amildir. "Burada Qərb Rusiyanın maraqlarına zərbə vurmaq, geopolitik ambisiyaları icra etmək niyyətləri güdür. Bütün bunlar Ermənistanda revanşizmə dəstək hərəkatı kimi anlaşılır. Belə olan halda Azərbaycanla sülh müqaviləsinin imzalanması ertələnir, onda müəyyən tormozlanma yaranır. Digər tərəfdən, Oksfordda görüşdən imtina da şübhəsiz ki, ümumi sülhlə bağlı nikbinliyə zərbə vurdu. Başqa bir tərəfdən, COP29-da iştirakla bağlı Azərbaycan tərəfi rəsmi şəkildə Ermənistana təklif göndərib və Ermənistan tərəf hələ də bu təklifə cavab verməyib. Bunun özü də, əlbəttə, onu göstərir ki, Ermənistan ayrı-ayrı geomərkəzlərlə razılaşdıraraq bu dəvətə cavab vermək məqsədləri güdür"-deyə İ.Hüseynov qeyd etdi.
İradə SARIYEVA
