Şuşada keçirilən II Şuşa Qlobal Media Forumu başa çatıb. Bu tədbir dünya gündəminin də əsas müzakirə mövzularından birinə çevrilib. Forum zamanı xarici media təmsilçiləri Prezident İlham Əliyevə müxtəlif suallar ünvanlayıb.
Cordan Morqan adlı forum iştirakçısı Prezident İlham Əliyevə ünvanladığı sualda soruşub ki, Fələstin-İsrail münaqişəsi ilə bağlı Azərbaycanın mövqeyi nədən ibarətdir ki, Qəzza bölgəsində sülh təmin edilsin, ən azı atəşkəs təmin edilsin?
Prezident İ.Əliyev isə cavab olaraq qeyd edib ki, Ərəb Liqası daha fəal olmalıdır və münaqişəyə dair daha açıq mövqe ifadə etməlidir: "Bu, mənim Prezident olaraq mövqeyimdir ki, Ərəb Liqası bir təşkilat olaraq burada daha çox iştirak etməlidir. Bunun obyektiv səbəbləri var".
Maraqlıdır, Ərəb ölkələrinin Liqası necə fəal olmalıdır?
Azər Həsrət: "İlham Əliyev nəzakətli şəkildə dünyaya çatdırmaq istəyir ki, bu məsələdə hər şeydən öncə ərəb liqası dövlətləri hərəkətə keçməlidir"
Siyasi şərhçi Azər Həsrət "Bakı-Xəbər"ə şərhində bildirdi ki, İ.Əliyev vacib bir nöqtəyə toxunub: "Biz illərdir ərəb xalqlarının susqunluğuna diqqət edirik. Qardaş ölkə Türkiyə Fələstin məsələsi ilə bağlı dünyada ən fəal dəstəkçi rolunda çıxış edir. Fələstin ərəblərinin hüquqlarının qorunması istiqamətində ən öndə gedən dövlət Türkiyədir. Təbii ki, Azərbaycan dövləti də Türkiyə ilə bərabər fələstinlilərin hüquqlarının bərpa olunması istiqamətində öz üzərinə düşəni edir. Ölkə başçısı İlham Əliyevin xüsusi olaraq ərəb liqası məsələsinə diqqət etməsi təsadüfi deyil. Həqiqətən də İsrail-Fələstin münasibətlərində ərəb dövlətlərinin, demək olar ki, əksəriyyəti susqunluq nümayiş etdirir. Öz milli, etnik kökdən gələn qardaşlarını müdafiə etmir, onların başına gələn hadisələrə biganə yanaşılır. Belə bir şəraitdə bir sıra qüvvələr Azərbaycanda, Türkiyədən və digər türk dövlətlərindən Fələstini müdafiə etməyi tələb edir. Bu tələb başadüşülən deyil. Nəzərə almaq lazımdır ki, fələstinlilər müsəlman olmaqla yanaşı, ərəbdirlər. Biz də müsəlmanıq, ancaq ərəb deyil, türkük. İslamda ümmət məsələsi var, biz bunu başa düşürük. Ancaq millət məsələsi də nəzərə alınmalıdır. Ərəblər öz qardaşlarına kömək etmədiyi təqdirdə, ərəb olmayanlardan bu köməyi tələb etmək doğru yanaşma deyil. Əslində, Prezident İlham Əliyev nəzakətli şəkildə, uyğun bir dildə dünyaya çatdırmaq istəyir ki, bu məsələdə hər şeydən öncə ərəb liqası dövlətləri hərəkətə keçməlidir. Yoxsa İrandakı fanatik çevrələr İsraillə münasibətlərə görə Azərbaycanın üzərinə gəlir, ərəbləri müdafiə etmədiz deyə bizi qınayırlar. Azərbaycan dövləti məlum məsələdə neytraldır, ancaq ədalətsiz deyil. Bizim dövlətimiz dəfələrlə bəyan edib ki, "ikidövlətli həll yolundan" yanayıq. Yəni Fələstin ərəbləri öz sərhədləri çərçivəsində, İsraildə eyni qaydada yaşamalıdır. Bundan ədalətli mövqe ola bilməz. Kimsə istəyir ki, biz gedib Qəzza bölgəsində vuruşaq, ancaq bilməlidirlər ki, bu bizim işimiz deyil. Bizdən öncə ərəblər Fələstinə sahib çıxmalıdır. Ondan sonra kimsə bizdən nəsə istəyə bilər. Bu səbəbdən də hesab edirəm ki, İlham Əliyevin cavabı təqdirəlayiqdir".
Mübariz Göyüşlü: "Qəzza məsələsində Ərəb dövlətləri Liqasına üzv olan ölkələr müsəlman ölkələri qədər fəallıq göstərmir"
Siyasi şərhçi Mübariz Göyüşlü qəzetimizə şərhində qeyd etdi ki, bu məsələdə Azərbaycan dövlətinin mövqeyi çox aydın, dəqiq və mükəmməldir: "Biz iki dövlətin hər prinsipini dəstəkləyirik. Tərəfləri daim atəşkəsə dəvət edirik, sülh çağırışları edirik. Nəzərə almaq lazımdır ki, Fələstin ərəb dövlətidir. Ərəb dövlətləri Liqası Fələstinin bu probleminin həllində aktiv mövqe göstərməlidir. Ərəb ölkələri bu məsələdə çox fəal olmalıdır. Məlum mövzu ilə bağlı Türkiyə, Pakistan və İran daha çox fəallıq göstərir. Azərbaycan bu məsələdə ədalətli mövqe nümayiş etdirir. Qəzza məsələsində Ərəb dövlətləri Liqasına üzv olan ölkələr qeyd etdiyim müsəlman ölkələri qədər fəallıq göstərmir. Hətta bəzi ərəb ölkələri İsraillə əməkdaşlıq edir. Təbii ki, bu dövlətin daxili işidir. Ancaq bir ərəb ölkəsinə qarşı bu cür hadisələr baş verirsə, digər ərəb ölkələri də öz səsini ucaltmalıdır. Bu mənada Prezident İlham Əliyev haqlı fikrini bildirib".
Günel CƏLİLOVA
