"Yalan məlumatların ifşası: Dezinformasiyaya qarşı mübarizə" mövzusunda keçirilən 2-ci Şuşa Qlobal Media Forumunda diqqət mərkəzində yer alan məsələlərdən biri də dezinformasiya, şər-böhtan kampaniyası oldu. Qeyd edək ki, Azərbaycan da mütəmadi olaraq bu problemlə üzləşir. Avropa Parlamentində, Avropa Şurası Paralament Assambleyasında, bir sıra digər qurumlarda, müəyyən ölkələrdə bu gün də ölkəmizə qarşı dezinformasiyalar davam edir.
Bütün bunlara Azərbaycanın yanaşmasına və müqavimətinə prezident İlham Əliyev "Berliner Zeitung" qəzetinin nümayəndəsi Holqer Fridrixin sualına cavab verərkən geniş şəkildə toxundu. Azərbaycanla bağlı natamam, qeyri-dəqiq və manipulyasiya edilmiş hesabatlara, onların haradan qaynaqlanmasına dövlət başçısı belə cavab verdi: "Təəssüf ki, bu, Qərbdən qaynaqlanır və bu, bizim gündəlik həyatımızın bir hissəsinə çevrilib. Əvvəllər biz təəccüblənirdik, sonra məyus olurduq, indi isə buna çox biganə yanaşırıq. Bizim üçün fərq etməz, çünki burada əsas qərar sahibi Azərbaycan xalqıdır və hökumətin fəaliyyəti məhz xalqın mənafeyi naminədir. Əlbəttə, biz istərdik ki, Azərbaycanda və regionda baş verən hadisələr obyektiv şəkildə işıqlandırılsın. Bu, müəyyən dezinformasiya sayəsində obyektiv deyilsə, eybi yoxdur. Ancaq bu, məqsədyönlü şəkildə edilirsə, bu, Azərbaycanı nüfuzdan salmağa yönəlibsə, əlbəttə, biz sual veririk ki, bu, nədən baş verir, bu, niyə belə olmalıdır?... Sovet İttifaqının süqutundan sonra Qərbdə və keçmiş sovet respublikalarının çoxunda belə bir fikir var idi ki, irəli getməyin və mövcudluğunu təmin etməyin yeganə yolu böyük ölkələrin diktəsi altında yaşamaqdır. Biz fərqli yol seçdik. Bu, asan deyildi. Bizim ölkədə sabitliyi pozmaq səyləri oldu. 2000-ci illərin əvvəllərində narıncı inqilablar, rəngli inqilablar cəhdləri olurdu. Eyni zamanda, bizim seçimimiz Azərbaycanın satellit ölkəyə, "proksi" ölkəyə, vassal, qul ölkəyə çevrilməsinin qarşısını aldı və bu da əlbəttə ki, bizim xalqımızın çox dəhşətli dərəcədə əziyyət çəkməsinə imkan vermədi. Biz de-fakto və de-yure müstəqilliyi seçdik. Müstəqil xarici siyasət, özünü təmin edən iqtisadiyyat, tərəfdaşlarımızla, - o ölkələrlə ki, onlar bizimlə əməkdaşlığa can atırdı, - səmərəli əməkdaşlıq. Əlbəttə ki, daxili potensialımıza söykənirdik. Eyni zamanda, biz region ölkələri ilə də sıx əlaqələr qurduq. Bu, bizə imkan verdi ki, iqtisadi problemlərin böyük əksəriyyətini həll edək və biz öz üzərimizdə çalışdıq, diqqətimizi xalqımıza, ölkəmizə yönəltdik və dedi-qodulara, Avropa Parlamentində və ya Avropa Şurasında kiminsə hansısa bəyanatına məhəl qoymadıq, fikir vermədik. Biz onlara tamamilə biganə yanaşırıq". Proseslər də göstərir ki, Azərbaycana qərəzli yanaşan dairələr daha çox özlərinə ziyan vururlar. Məsələn, Avropa Şurası Parlament Assambleyası (AŞPA) buna konkret misal kimi göstərilə bilər. Xatırladaq ki, bu il yanvarın 24-də Azərbaycan nümayəndə heyətinin AŞPA-dakı səsvermə hüququ məhdudlaşdırılıb və səlahiyyətləri sual altına alınıb. Azərbaycan nümayəndə heyəti öz növbəsində bu qərardan öncə qurumda mövcud olan dözülməz irqçilik, Azərbaycanofobiya və İslamofobiya mühiti fonunda əməkdaşlığı və təşkilatda iştirakını qeyri-müəyyən müddətə dayandırmaq qərarına gəlib. Faktdır ki, AŞPA Azərbaycana qarşı qərəzi erməni lobbisindən qidalanan Azərbaycanofobiya və islamofobiya təfəkkürlü avropalı deputatların korrupsiya və rüşvətxor əməllərinin təzahürüdür.
AŞPA ölkəmizlə bağlı bu addımı birmənalı qarşılanmamaqla yanaşı, Azərbaycana qarşı qərəzin son həddə çatdığını bir daha ortaya qoydu. Səbəblərə diqqət yetirdikdə, hələ də çoxsaylı suallar yaranır. Guya Azərbaycan qurumun qarşısında götürdüyü öhdəlikləri yerinə yetirmir, eyni zamanda, Avropa Şurası ilə əməkdaşlıqda maraqlı deyil. Reallıq budur ki, bu gün AŞPA Fransanın əlində oyuncağa çevrilib. Fransa bu təşkilatdan bir siyasi alət kimi istifadə edərək Azərbaycana qarşı əks təbliğat kampaniyası həyata keçirir. AŞPA-nın bu addımı Fransanın tarixi zəfərimizdən sonra Azərbaycana qarşı açıq müstəviyə keçən qərəzli kampaniyasının davamıdır. Amma belə yanaşma indi AŞPA-nın özünə daha çox ziyan vurur.
Hələ ilin əvvəlində AŞPA narazılıq edirdi ki, Azərbaycan qurumu fevralda keçirilmiş növbədənkənar prezident seçkilərini izləməyə dəvət etməyib. Halbuki, bu, sıra azərbaycanın özü hüququdur ki, kimi istəyirsə onu dəvət etsin. Belə qərəzli yanaşmasına görə, Azərbaycan sentyabrın 1-də keçiriləcək Milli Məclisə növbədənkənar seçkiləri də müşahidə etmək üçün AŞPA-ya dəvət göndərməyib. Bu barədə "report"a diplomatik mənbə məlumat verib. Bildirilib ki, buna əsas səbəb Avropa Şurası və onun Parlament Assambleyasının artıq neçə ildir Azərbaycana qarşı qərəzli və ikili standartlara əsaslanan siyasət yürütməsidir. Mənbə onu da diqqətə çatdırıb ki, AŞPA müşahidəçi missiyasının seçkilərdə iştirakı yalnız Azərbaycan nümayəndə heyətinin mandatının tanınmasından sonra müzakirə oluna bilər.
Qeyd edək ki, Milli Məclisə sentyabrın 1-də keçiriləcək növbədənkənar seçkilərlə əlaqədar Azərbaycanın dəvət göndərdiyi beynəlxalq təşkilatların siyahısı məlum olub. Xarici İşlər Nazirliyi tərəfindən seçkiləri izləmək üçün 7 beynəlxalq təşkilata dəvət göndərilib. Bunlar ATƏT DTİHB, Müstəqil Dövlətlər Birliyi, İslam Əməkdaşlıq Təşkilatı, GUAM, Qoşulmama Hərəkatı Gənclər Təşkilatı, Şanxay Əməkdaşlıq Təşkilatı və Türk Dövlətləri Təşkilatıdır. Milli Məclis tərəfindən isə 13 beynəlxalq təşkilata dəvət göndərilib. Bunlar arasında ATӘT RA, MDB PA, TÜRKPA, İslam Əməkdaşlığı Təşkilatı Parlament İttifaqı, Qara Dəniz İqtisadi Əməkdaşlıq Təşkilatı Parlament Məclisi, GUAM PA, Asiya Parlament Assambleyası, Pan-Afrika Parlamenti, İqtisadi Əməkdaşlıq Təşkilatının Parlament Assambleyası, Cənub-Şərqi Asiya Dövlətləri Assosiasiyasının Parlamentlərarası Assambleyası, Ərəb Parlamenti, Beynəlxalq Parlamentarilər Konqresi, Asiya Siyasi Partiyaları Beynəlxalq Konfransı yer alır. Amma öz günahı üzündən AŞPA burda yer almır. Bu fonda qurum Azərbaycanla bağlı siyasətində korrektə etməsə, şübhəsiz ki, daha çox özünə zərər edəcək.
Nahid SALAYEV
