Azər Həsrət: "...Avropa Şurasına qarşı da eyni davranış..."
Yunanıstanın İctimai Televiziyasının "Sərhədlər" siyasi-analitik proqramında Ermənistanın bu ölkədəki səfiri Tiqran Mkrtçyanın müsahibəsi yayımlanıb. Səfir Ermənistan və Azərbaycan arasında münasibətlərin normallaşması prosesinə və uzunmüddətli münaqişənin gələcəyinə yanaşmaları təqdim edib.
Səfirin fikirləri öz yerində, bunu müzakirə etmək istəmirik. Burada diqqətimizi çəkən əsas məqam İctimai Televiziyanın aparıcısının, əslində telekanalın özünün Azərbaycana qərəzli münasibətidir. Proqram müəllifləri bütün prinsipləri pozaraq iddia ediblər ki, guya on ay əvvəl Qarabağda "tarixin ən faciəli və qanlı səhifələri yazılıb".
Azərbaycanın 2023-cü ilin sentyabrında Qarabağda keçirdiyi lokal antiterror tədbirlərinin mahiyyətini kökündən təhrif edən televiziya əməkdaşları hətta "muxtar Dağlıq Qarabağ" ifadəsini səsləndirməkdən də çəkinməyiblər. Bu isə bütövlükdə həm beynəlxalq hüquqa ziddir, həm də Azərbaycanın ərazi bütövlüyünün təhrif edilməsidir ki, bunu da Yunanıstanın İctimai Televiziyası ifadə edib.
Heç bir məsuliyyət hiss etmədən və dünyanın gözünün içinə ağ yalan püskürərək bu televiziyanın proqram müəllifləri iddia ediblər ki, guya Azərbaycan Qarabağa "hücum edib" və "Arsaxın müdafiə ordusu dağılmaq məcburiyyətində qalıb, yüzminlərlə erməni əsilli dinc sakin məcbiri köçkün düşüb". "Bu, XXI əsrin əhalinin yerdəyişməsinin ən faciəli hekayələrindən biridir". Bunu proqram müəllifləri iddia ediblər.
Səfirin dedikləri başqa, Yunanıstanın İctimai İeleviziyasının özünün əlavə şərhlər verməsi, Azərbaycanın Qarabağın tarixində "ən qanlı səhifəni yazdığını" iddia etməsi, ölkəmizə qarşı qərəz püskürməsi beynəlxalq qurumların da diqqətindən yayınmamalıdır. Təsəvvür edin ki, televiziya səfirdən daha aqressiv şəkildə Azərbaycanın üstünə yeriyir. Bütün bunları da Avropa Şurasının gözünün qabağında edir. Halbuki, ictimai televiziyaların hər cür siyasi ambisyadan uzaq olması Avropa Şurasının normalarından biridir. Avropa Şurası bu məsələyə nəzarət etməlidir. Bu şəxsi televiziya deyil ki, çıxıb öz mövqeyini ifadə etsin. Bu, ictimai televiziyadır və bu ictimai televiziya hər siyasi və geosiyasi ambisiyalardan uzaq olmalıdır. Bu, Avropa Şurasının qaydasıdır. Amma görün, Avropa Şurasının qaydaları nə dərəcədə pozulur, Yunanıstanın ictimai televiziyası Avropa Şurasının qaydalarını vecinə də almır, ağzına gələni danışır.
"Türk düşmənliyi məsələsində yunanlarla ermənilər çəkici bir zindana vururlar"
Siyasi şərhçi Azər Həsrət "Bakı-Xəbər"ə bildirdi ki, Yunanıstanın Azərbaycana münasibəti üzdə dost münasibəti kimi görünsə də, onlar pərdə arxasında ermənilərlə eyni qabdan yeyirlər. "Yəni ermənilərlə eyni cür davranırlar. Bu baxımdan, o görsəniş təsadüfi deyil. Bir məqamı xatırladım, əvvəlki illərdə də Yunanıstan, NATO üzvü olmasına baxmayaraq, Kollektiv Təhlüksəzlik Müqaviləsi Təşkilatının üzvü olan Ermənistanla hətta hərbi sahədə işbirliyi haqqında sənədlər də imzalayıb. Təsəvvür edirsizmi? Yəni NATO-ya qarşı da belə davranmışdılar, Avropa Şurasına qarşı da eyni davranış göstərmişdilər, indi də elə davranırlar, Avropa Birliyinə qarşı da həmçinin. Onlar antiazərbaycan, antitürk fəaliyyəti həyata keçirirlər. Bu da təsadüfi deyil. Mən əvvəlki illərdə də bir fikri səsləndirmişdim ki, Azərbaycan Yunanıstanın bu ikili oyunlarına son qoymaq üçün Quzey Kıbrıs Türk Cumhuriyyətinin tanınması üçün hərəkət etməlidir. Yəni artıq biz Yunanıstana birmənalı şəkildə göstərməliyik ki, onların bu ikili oyunlarını görürük və ona uyğun da cavab veririk. Nə etməliyik? Bundan sonrakı mərhələlərdə Quzey Kıbrıs Türk Cumhuriyyətinin tanınması ilə bağlı məsələləri bir qədər sürətləndirmək lazımdır. Artıq ikili oynamaq, yaxud diplomatiya dili ilə danışmaq, yaxud hansısa başqa səbəblərdən nisbətən yumşaq davranmaq zamanı keçib"-deyə A.Həsrət bildirdi.
A.Həsrətin sözlərinə görə, üstəlik də nəzərə almaq lazımdır ki, Yunanıstan həm də Azərbaycan qazından asılı bir dövlətdir. "Bütün bunları nəzərə almayaraq bizə qarşı bu cür addımlar atırlar. Ümumiyyətlə, Yunanıstan özünü elə Ermənistan kimi aparır. Yunanlar da siyasi təbliğat müstəvisində özlərini ermənilər kimi aparır. İndi biz nəyi qoyub nəyi axtarırıq, onlardan nə gözləyirik? Əlbəttə, dəyişən deyillər. Türk düşmənliyi həm yunanlarda, həm də ermənilərdə çox yüksəkdir. Türk düşmənliyi məsələsində yunanlarla ermənilər çəkici bir zindana vururlar. Ona görə də biz vaxtımızı itirmədən daha sərt, daha verimli qərarlar almalıyıq".
A.Həsrətin fikrincə, bu mənada onlara ən layiqli cavabımız Quzey Kıbrıs Türk Cumhuriyyətini tanınmasını tezləşdirməyimiz olar ki, onlar da öz yerlərini bilərlər. O hesab edir ki, Azərbaycan Quzey Kıbrıs Türk Cumhuriyyətinin tanınması işində fəaliyyətini sürətləndirməlidir.
İradə SARIYEVA
