Şəmsəddin Əliyev: "Görünür, həmin adamlar bu işdə yenilik etmək istəyir ki, öz yaxalarını kənara çəkə bilsinlər"
Bakı şəhəri Səbail Rayon Məhkəməsində Azərbaycan Respublikasının vətəndaşı Bağırov Akif Əlimirzə oğlunun barəsində həbs qətimkan tədbiri seçilib. İşin hallarından görünür ki, akademik Ziya Bünyadovun qətlinə görə ömürlük azadlıqdan məhrum etmə cəzasına məhkum edilmiş Zeynalov Mahir Nurhüseyn oğlunun azadlığa buraxılmasına nail olmaq üçün xarici xüsusi xidmət orqanının tapşırığı ilə Bağırov Akif Əlimirzə oğluna külli miqdarda pul vəsaiti göndərilib.
Akif Bağırov bu istiqamətdə yollar axtarmaq üçün həmin vəsaitləri məsuliyyətə cəlb edilmiş digər Azərbaycan Respublikası vətəndaşına verib və bu vəsaitlər Dövlət Təhlükəsizliyi Xidmətində başlanılmış cinayət işi çərçivəsində həyata keçirilmiş tədbirlər zamanı aşkar edilərək sübut qismində götürülüb.
Səbail Rayon Məhkəməsinin qərarı ilə Akif Bağırov barəsində 4 ay müddətinə həbs qətimkan tədbiri seçilib.
İş burasındadır ki, Ziya Bünyadovun qatillərinin arasında həqiqətən də Mahir Zeynalov adlı adam var. Akademik Ziya Bünyadovun qətlə yetirilməsindən 27 il ötür. Ötən müddət ərzində qətllə bağlı müxtəlif versiyalar səslənib.
Hazırda Qobustan Qapalı Həbsxanasında qətldə birbaşa iştirak etmiş şəxslərdən biri - Nizami Nağıyev ömürlük məhkumluq həyatı yaşayır. Onu və Qabil Babayevi hadisə yerinə aparan Mahir Zeynalov da onunla bərabər ömürlük həbsdədir.
Ziya Bünyadovu qətlə yetirən dəstə barəsində Ağır Cinayətlərə Dair İşlər üzrə Məhkəmə (indiki Bakı Ağır Cinayətlər Məhkəməsi) 21 fevral 2001-ci il tarixli hökm çıxarıb. Hökmə görə, dəstə üzvləri 1997-ci ilin yanvarında Bakıda yığıncaq keçiriblər.
Yığıncaqda Nizami Nağıyev, Cavanşir Aslanov, Mahir Zeynalov, Qalib Babayev, Tariyel Ramazanov, "Nəsrullah" adlı şəxs iştirak edib və akademik Ziya Bünyadovun xidməti, siyasi fəaliyyətinə son qoymaq qərarlaşdırılıb. Qətlin həyata keçirilməsi planı qurulub, dəstə üzvlərinin hər birinin rolu öz aralarında bölüşdürülüb. Yığıncaqda akademikin İran müctəhidləri tərəfindən ölümünə "fətva" verildiyi vurğulanıb. Bildirilib ki, Ziya Bünyadov islam tarixinin tərcüməsində guya kobud səhvlərə yol verib. Hökmdə bildirilib ki, Nizami Nağıyev, Mahir Zeynalov, Xanlar Cabbarov, Maarif Əliyev, Rövşən Həsənov, Qədir Abbasov, Rizvan Məmmədov, Qalib Babayev Tariyel Ramiz oğlu Ramazanov istintaqa məlum olmayan, özlərini İran İslam Respublikası vətəndaşları kimi təqdim edən "Məhəmməd" və "Nəsrullah" adlı şəxslərin 1993-cü ildə Azərbaycanda, o cümlədən Bakı şəhərində İslam dininin müdafiəsi pərdəsi altında ağır və xüsusilə ağır cinayətlər törədilməsi məqsədilə yaratdıqları "Vilayəti Əl-Fəqih Hizbullah" adlı cinayətkar birliyə qəbul olunublar. 1993-cü ildən 2000-ci ilin oktyabrınadək orada iştirak ediblər. 21 fevral 1997-ci il saat 16 radələrində dəstə 2 qrupa ayrılıb. Tapança-pulemyotla silahlanmış Tariyel Ramazanov və Cavanşir Aslanov akademik Ziya Bünyadovun evə qayıtma vaxtını mobil telefon vasitəsilə 2-ci qrupa məlumat verib. Nizami Nağıyev bıçaqla, Qalib Babayev isə tapança ilə silahlanıb Mahir Zeynalovla birlikdə avtomaşınla akademik Ziya Bünyadovun yaşadığı binanın yaxınlığında növbəti zəngi gözləyiblər.
Axşamüstü saat 6 radələrində Tariyel Ramazanov akademik Ziya Bünyadovun evinə gəlməsi barədə Mahir Zeynalova məlumat verib. O, kənar şəxslər barədə işarə vermək məqsədilə avtomaşında qalıb, Qalib Babayev binanın tinində, Nizami Nağıyev isə 3-cü girişin qarşısında mövqe tutub. Akademik Ziya Bünyadovun mənzilinə tək getməsi barədə Qalib Babayevin işarəsindən sonra Nizami Nağıyev binanın 3-cü girişinə daxil olaraq gözləyib. 1-ci və 2-ci mərtəbələrin arasındakı meydançada Ziya Bünyadovun arxa tərəfinə keçib və onun sağ və sol qabırğaaltı, qarın nahiyələrinə, sol əlin arxa bayır səthinə 5 dəfə ardıcıl zərbə vurub. Həmin vaxt hadisə yerinə Qalib Babayev də özünü çatdırıb və "Makarov" markalı səsboğucusu olan tapançadan Ziya Bünyadovun sifətinin sağ yanaq nahiyəsinə və boynuna atəş açıb. Akademikin həyatına son qoyan hər 2 şəxs Mahir Zeynalovla birgə avtomobillə hadisə yerindən qaçıb.
3 il sonra dəstə üzvlərindən Nizami Nağıyev və Mahir Zeynalov tutulub. Nizami Nağıyev qətldən 5 ay sonra Gömrük Komitəsinə işə düzəlib, tutularkən də gömrük inspektoru olub. Atası Adil Nağıyev həmin vaxt Abşeron Rayon İcra Hakimiyyətinin başçısı vəzifəsini daşıyıb.
Çox maraqlıdır ki, üstündən 27 il keçməsinə baxmayaraq, hələ də Ziya Bünyadovun işində maraqlı olan dairələr var. Belə çıxır ki, ya bu iş tam araşdırılmayıb, ya da hansısa dairələr rüşvət müqabilində kimlərisə prosesdən kənarlaşdırmaq istəyir. Bu işlə bağlı külli miqdarda pul xərcləmək hansı dairələrin marağında ola bilər və niyə məhz Mahir Zeynalovu azadlığa çıxarmaq istəyirlər?
Hüquqşunas Şəmsəddin Əliyev "Bakı-Xəbər"ə açıqlamasında bildirdi ki, xüsusilə ağır bir cinayətin, cəmiyyətdə, ölkənin hüdudlarından kənarda belə çox tanınan akademik Ziya Bünyadovun qətli ilə bağlı məsələnin yenidən gündəmə gəlməsi sosial ədələtin bərpası istiqamətində aparılan ciddi prosesual addımlardan biridir: "Burada işin faktiki hallarında yeniliklər var. Zamanında bununla bağlı atılmalı olan prosesual addımlar atılmadığına görə, indi artıq buna ehtiyac var və müvafiq orqanların həyata keçirdiyi araşdırmalar nətisində həqiqət aciz görkəmdən çıxacaq, öz təsdiqini tapacaq. Son on il ərzində Respublika Daxili İşlər Nazirliyi mütəşəkkil dəstə tərəfindən törədilən cinayətlərin qarşısını alır. Təxminən il ərzində 300 - ə yaxın belə mütəşəkkil dəstə ifşa olunur, zərərsizləşdirilir. Ancaq bütün bunlara baxmayaraq, Azərbaycana qarşı qısqanclıq zəmnində yanaşanlar var. Cinayətkarlıqla mübarizədə Azərbaycan dövlətinin siyasətinin formalaşmasında iştirak edən dövlət mühafizə orqanlarının fəaliyyətinə mane olanlar tapılır. Ölkə daxilində də dəstək olduğuna görə, bu mübarizədə çətinliklər yaranır. Bu baxımdan, müəyyən mərkəzi icra hakimiyyəti orqanı kimi, Dövlət Təhlükəsizlik Xidmətinin bu sahədə keçirdiyi tədbirlər öz bəhrəsini göstərəcək. Sadəcə, məhkəmənin dörd aylıq həbs - qətmkan qərarına hörmətlə yanaşmaq və gözləmək lazımdır. Düşünürəm ki, yeni, aşılmış hallara kimi həyata keçirilən prosessual araşdırmalar haqqın və ədalətin üzə çıxmasına, cinayətkarların kim olmasına aydınlıq gətirə bilər. Ziya Bünyadovun işi ilə bağlı cinayətdəaqq əli olanlardan heç də hamısı həbs edilməyib. Onların arasında axtarışda olanlar da var. Görünür, həmin adamlar bu işdə yenilik etmək istəyir ki, öz yaxalarını kənara çəkə bilsinlər".
Məhəmmədəli QƏRİBLİ
