Aqil Ələsgər: "Bu bir növ Avropanın, Qərbin silahlıdır"
"Avropa Komissiyası bizə qanunsuz məxfi sövdələşmə təklif etdi. Onların təklifinə görə, əgər biz söz azadlığına sakitcə senzura qoysaq, bizi cərimələməyəcəklər". Bu barədə "Tesla"nın qurucusu və X sosial şəbəkəsinin sahibi İlon Maskın sosial şəbəkə paylaşımında bildirilir.
İlon Mask digər sosial platformaların bu razılaşmanı qəbul etdiyini bildirib. "Ancaq X sosial şəbəkəsi qəbul etmədi" - deyə İlon Mask yazıb.
Maskın açıqlamasından açıq görsənir ki, Avropa Birliyi Feysbuk və başqa platformalarla sövdələşməyə gedib. Çünki Azərbaycanda Fransa əleyhinə olan yazıları Feysbuk dərhal silir, bunun səbəbi barədə də heç bir açıqlama da verilmir. Bunun gizli sövdələşmə əsasında baş verdiyi açıq görünür.
Ekspertlər də qeyd edir ki, Avropa Birliyi ölkələri sosial şəbəkələri Azərbaycana qarşı yönəldir.
"Sosial şəbəkələrdə nəinki Fransa əleyhinə yazıların silindiyini görürük, hətta Azərbaycan dövlətinin uğurlarını əks etdirən paylaşımlar edəndə belə Feysbuk bunları ya "feyk xəbər", ya başqa bir ad altında bloklayır, senzura tətbiq edir"
"Yeni Çağ" media qrupunun rəhbəri Aqil Ələsgər "Bakı-Xəbər"ə şərhində "bir neçə gün əvvəl Səlcuq Bayraqdar çox gözəl bir paylaşım etmişdi ki, dünyanı bir əldə birləşən sosial mediadan və digər buxovlardan xilas etmək lazımdır. Çünki bu gün faktiki olaraq istər Feysbuk, istər adı "X" olan tvitter, istərsə də digər sosial şəbəkələrin yaradılmasında, qurulmasında əsas məqsəd insanları öz nəzarətlərində saxlamaq olub. Amalları başdan bəri bütün insanların fəaliyyətini, psixologiyasını sosial şəbəkələrə bağlanmış müxtəlif cihazlarla müəyyənləşdirmək və onlar vasitəsilə insanlara yön verməkdən ibarətdir. Yəni bu baxımdan Feysbukun, yaxud digər sosial şəbəkələrin Fransa, Avropa Birliyi, ABŞ-ın xüsusi kəşfiyyat orqanı ilə əlaqələri heç də təəccüblü görsənməməlidir. İlon Maskın dediyi məsələyə gəlincə, onunla bağlı bunu demək olar ki, əlbəttə, biz də görürük. Məsələn, sosial şəbəkələrdə nəinki Fransa əleyhinə yazıların silindiyini görürük, hətta Azərbaycan dövlətinin uğurlarını əks etdirən paylaşımlar edəndə belə Feysbuk bunları ya "feyk xəbər", ya başqa bir ad altında bloklayır, senzura tətbiq edir. Yəni açıq şəkildə görünür ki, sosial şəbəkələr təkcə Azərbaycana qarşı deyil, bütövlükdə Türk dünyasına qərəzli münasibət göstərir. Fələstində baş verən bu zülmü paylaşdıqda, Qərbin hansısa ədalətsizliyi ilə bağlı etiraz bildirildikdə anında Feysbukdan xəbərdarlıq gəlir, müxtəlif cəzalar təbiq olunur"-deyə bildirdi.
A.Ələsgərin sözlərinə görə, bu baxımdan, Feysbuk və "X"-ı çıxmaq şərti ilə digər sosial şəbəkələr, çox təəssüflər olsun ki, Qərbin boyunduruğuna çevrilib. "O sosial şəbəkələr Qərbin müstəmləkə zonaları rolunda insanları ora yığır və onları yönləndirməyə, manqurtlaşdırmağa, dəyərlərdən uzaqlaşdırmağa çalışırlar. Başqa-başqa xalqların mentalitetində, xüsusilə Şərq xalqarının mentaliteində olmayan məsələləri aşılayırlar. Yəni bu bir növ Avropanın, Qərbin bir silahlıdır. Təbii ki, biz də bu silahdan onlara qarşı istifadə etməyə çalışmalıyıq. Təbii ki, bu da çox çətindir. Səbəb odur ki, hər şey onların öz əllərimdədir. Biz onların bazarında, evlərində oturub sadəcə onlarla dava edirik"-deyə A.Ələsgər əlavə etdi.
İradə SARIYEVA
