Bakı fransız və holland müstəmləkəçiliyinə qarşı mübarizənin əsas mərkəzinə çevrilir...
Məhərrəm Zülfüqarlı: "BTQ-nin Niderland koloniyalarına dəstək verməsi müsbət haldır və hesab edirəm ki, biz bunun uğurlu nəticəsinə şahidlik edəcəyik"
Günümüzdə hələ də başqa xalqları və kiçik ölkələri öz müstəmləkəsi altında saxlamağı davam etdirən Qərb dövlətləri mövcuddur. "Demokratiya" və "insan haqları"nı əlində bayraq edən Fransa, Niderland (Hollandiya) kimi ölkələr müstəmləkəçilik siyasətini dayandırmaq istəmirlər.
Bilirik ki, Hollandiya əsrlər uzunu İndoneziya, Seylon, Şimali Amerika ərazilərini əsarətdə saxlayıb və hazırda da koloniyaları qalır.
Bakı Təşəbbüs Qrupu Niderlandın koloniyalarına dəstək verməyə başlayıb. Bu barədə Bakı Təşəbbüs Qrupunun (BTQ) icraçı direktoru Abbas Abbasov Şuşada keçirilən II Qlobal Media Forumu çərçivəsində Bakı Təşəbbüs Qrupunun paralel tədbirində deyib.
O məlumat verib ki, BTQ bundan sonra da həmin istiqamətdə fəaliyyəti davam etdirəcək, koloniyaların müstəqillik mübarizəsinə dəstək göstərəcək.
İndiyə qədər Bakı Təşəbbüs Qrupu tərəfindən fransız kolonyalarına dəstək verilməsi əsas məsələlərdən biri idi, təbii ki, yenə də bu istiqamətdə proses davam edir. Bura bir ölkə də əlavə olunub. İndi Bakı Təşəbbüs Qrupu Niderlandın da müstəmləkələrinin azad olunmasına dəstək verməyə başlayıb. Bu yeni səhifədir və nə kimi perspektiv vəd edir?
"Biz beynəlxalq hüquqa söykənərək bu addımı atırıq, yəni burada Azərbaycanın atdığı addımlar tamamilə qanunidir"
Tarix elmləri doktoru, professor Məhərrəm Zülfüqarlı "Bakı-Xəbər"ə şərhində bildirdi ki, müstəmləkəçilik siyasəti daim tənqid olunan siyasət olub. "Bu siyasət Avropa ölkələri tərəfindən orta əsrlərdən başlayıb. Rusiyanın isə işğalçılıq siyasəti Kiyev Rus Dövləti yaranandan - IX əsrdən başlayıb. Zaman-zaman Azərbaycan üzərinə gəliblər, Şirvanşahlar, Salarilər dövlətinə qarşı işğalçı yürüşlər ediblər. Stepan Razinin rəhbərlik etdiyi quldur dəstələri Azərbaycan üzərinə basqınlar ediblər, ölkəmizi talamaqla məşğul olublar. Amma işğalçı rusların əraziləri tutub o ərazilərdə oturması isə əsasən XVI əsrdən - IV İvanın vaxtından başlayıb. Volqaboyu əraziləri, Sibir, Kazan və Həştərxan xanlıqlarını, sonra isə Qafqazı, Orta Asiyanı və digər əraziləri işğal ediblər.
Müstəmləkə siyasəti odur ki, əraziləri işğal edib əhalini kölə vəziyyətinə salırlar, həmin ərazilərin sərvətlərindən istədikləri kimi istifadə edirlər və sair. Qərb ölkləri də daim insan haqlarından, humanizmdən danışdıqları bir vaxtda XXI əsrdə hələ də bunların müstəmləkələri qalmaqdadır, hələ də müstəmləkə siyasətləri davam etməkdədir. Sual oluna bilər ki, Azərbaycan buna niyə indi diqqət edir? Əvvəllər məgər biz bunu görmürdük? Görürdük, sadəcə bizim böyük problemlərimiz vardı, həmişə torpaqlarımızı azad etmək uğrunda mübarizə aparırdıq, diqqətimiz də əsasən Azərbaycanın ərazi bütövlüyünü bərpa etməyə yönəlmişdi. Lakin 44 günlük müharibədə qazandığımız böyük Zəfərdən, 23 saatlıq antiterror tədbirləri ilə ərazi bütövlüyümüzü təmin etdikdən sonra baxdıq ki, Qərb ölkələri, xüsusən də Fransa, ona müttəfiq olan bir sıra Avropa ölkələri, o cümlədən də Niderland ermənipərəst siyasət yürüdür. Erməniyönlü siyasət yürütməklə ermənilərin guya pozulmuş hüquqlarını müdafiə etməyə cəhd edirlər, "millətlərin öz müqəddəratını təyin etmək" hüququnu ortaya atırlar. Bəli, bu zaman Azərbaycan tərəfi onlara öz yerini göstərməyi lazım bildi. Azərbaycan bunlara bildirir ki, millətlərin öz müqəddəratını təyin etmək hüququnu doğrudan da müdafiə edirsizsə, onda niyə müstəmləkələrə azadlıq vermirsiniz? Müstəmləkələri soymaqla, oradakı əhalinin hüquqlarını pozmaqla, o ərazilərin sərvətlərini istədikləri kimi istifadə etməklə məşğuldurlar. Biz öz ərazi bütövlüyümüzü bərpa etmişik, o ölkələr isə özlərindən minlərlə kilomert aralıda müstəmləkələr saxlayırlar. Necə ola bilir ki, siz özünüzdən çox-çox uzaqlarda yerləşən əraziləri, yerli xalqları öz müstəmləkəniz altında saxlayırsınız, sərvətlərini istismar edirsiz, amma Azərbaycan öz ərazi bütövlüyünü bərpa etdiyi üçün siz buna düşmən münasibət bəsləyirsiniz? Demək istəyirəm ki, Azərbaycan artıq güclü dövlət kimi öz hüquqlarını müdafiə edə bilir və beynəlxalq hüquqa söykənərək də bunların layiqli cavabını verir".
M.Zülfüqarlı bildirdi ki, müstəmləkə saxlayan ölkələr isə bu suallara cavab vermək iqtidarında deyillər, çünki bunların məqsədi sömürgəçilik siyasətini davam etdirməkdir, işğalçı, talançı siyasətlə məşğuldurlar. XXI əsr üçün bunun yaramaz bir siyasət olduğunu deyən M.Zülfüqarlı hesab edir ki, ATQ-nin bu gün Niderlanın müstəmləkə siyasətini ifşa etmək istiqamətində həyata keçirdiyi işlər tamamilə beynəlxalq prinsiplərə söykənir. "Artıq Azərbaycanda kolonializm siyasətinə qarşı böyük bir mübarizə başlayıb. Niderland da koloniya siyasəti yürüdən Qərb dövləti kimi başqa xalqları, əraziləri əsarət altında saxlayır, sömürgəçilik siyasəti yürüdür. Müsbət haldır ki, müstəmləkəçilik siyasəti ilə mübarizənin mərkəzi Azərbaycandır. BTQ-nin Niderland koloniyalarına dəstək verməsi müsbət haldır və hesab edirəm ki, biz bunun uğurlu nəticəsinə şahidlik edəcəyik. BTQ-nin Niderland koloniyalarına dəstək verməsi müsbət haldır və hesab edirəm ki, biz bunun uğurlu nəticəsinə şahidlik edəcəyik. Biz beynəlxalq hüquqa söykənərək bu addımı atırıq, yəni burada Azərbaycanın atdığı addımlar tamamilə qanunidir"-deyə M.Zülfüqarlı bildirdi.
O vurğuladı ki, keçən əsrin 60-cı illərində Afrika ölkələri müstəmləkədən azad olundu, o zaman SSRİ öz siyasətinə uyğun şəkildə buna dəstək verirdi, imperalizmi tənqid edirdi. "Halbuki, özü müstəmləkə dövləti idi. SSRİ ərazisində olan 100-dən artıq xalqa qarşı ruslaşdırma siyasəti yeridirdi. Amma buna baxmayaraq, özünü humanist göstərərək Afrika dövlətlərinin müstəmləkədən azad edilməsinə dəstək göstərir, hüquqlarını müdafiə edirdi. Amma indiki zamanda biz tamamilə fərqli siyasət yürüdürük. Biz nə SSRİ kimi başqasının ərazisini işğal edirik, nə başqa xalqları istismar edib onları əsarət altına salırıq, sadəcə, 30 ildən artıq bir dövr ərazində pozulmuş hüquqlarımızı müdafiə edirik. Bundan sonra da hüquqlarımızın müdafiəsi uğrunda mübarizəmizi davam etdirəcəyik. Qərbi Azərbaycandan qovulmuş 300 mindən artıq azərbaycanlının dədə-baba torpaqlarına qayıtmasını təmin edəcəyik, bundan başqa, azad ərazilərdə məskunlaşmanı davam etdirəcəyik. Yəni bizim siyasətimiz Azərbaycan xalqının, Azərbaycan dövlətinin beynəlxalq hüquqa söykənən hüquqlarını müdafiə etməkdir. Buna qarşı çıxanlara da layiqli cavablarını veririk. Çünki Niderland, Fransa kimi dövlətlərin nöqsanlarını demədikcə, bunlar özünü güclü dövlət hesab edərək başqalarının üstünə ayaq açırlar. Azərbaycan artıq o dövlətlərdən deyil ki, nədənsə çəkinə, kiməsə xoş gəlmək üçün tənqidi fikirlərini söyləməyə, öz hüquqlarını müdafiə edə bilməyə. Artıq o dövrlər çoxdan keçib. Ola bilərdi ki, keçən əsrin 80-ci illərində, 90-cı illərin əvvəllərində belə olsun. Amma indi Azərbaycan güclü dövlətdir, onun Türkiyə, Pakistan kimi müttəfiqi var, Türk dünyası kimi böyük qardaşları var. Hətta Macarıstan kimi böyük bir müttəfiqimiz də mövcuddur. O NATO-nun və Avropa Şurasının, Avropa Birliyinin üzvüdür. Ona görə də Azərbaycan olaraq daim öz mövqelərimizi müdafuiə etməyə davam edəcəyik. Azərbaycanın haqq işinə ögey münasibət bəsləyənlərin, ikili standatlarla yanaşanların isə layiqli cavabını verəcəyik"-deyə M.Zülfüqarlı bildirdi.
İradə SARIYEVA
