Yeganə Hacıyeva: "Alman həkimin edamı ilə bağlı məsələ viza qərarının ləğvinə səbəb olmayacaq, ancaq Avropa ölkələrindən çox az sayda adamın gəlişi ilə nəticələnəcək"
Avropanın daha 37 ölkəsinin vətəndaşları Belarusa vizasız gedə biləcəklər. Qanun iyulun 19-dan qüvvəyə minib. Bu ölkələrdən gələn müsafirlər vizasız 30 gün ərzində ölkə ərazisində qala bilər.
Qeyd edək ki, sənədə görə, onlar Belarus ərazisindən tranzit ölkə kimi istifadə edərək digər dövlətlərin, o cümlədən Rusiyanın ərazisinə keçə bilərlər.
Çox maraqlıdır ki, Belarusun bu addımı ölkədə alman həkimə qarşı ölüm hökmünün çıxarılması dönəminə təsadüf edir. Qərb mediası xəbər verir ki, Belarusda məhkəmə alman həkimə ölüm hökmü çıxarıb. Hüquq müdafiəçiləri bildiriblər ki, əvvəllər o, terrorizmdə və muzdlu fəaliyyətdə təqsirli bilinib.
Belarusun aparıcı fəal təşkilatlarından biri olan Viasna açıqlamasında 30 yaşlı Riko Krigerin iyun ayında qapalı keçirilən məhkəmə prosesində altı cinayətdə təqsirli bilindiyini bəyan edib. Təşkilat bildirib ki, onu indi edam cəzası gözləyir.
İttihamlara səbəb olan şey hələ də qeyri-müəyyən olaraq qalır və ölkənin dövlət xəbər agentliyi öz hesabatında ittihamlarla bağlı əlavə təfərrüat dərc etməyib.
Belarus Avropada ölüm hökmünün hələ də icra olunduğu sonuncu ölkədir. Minsk israr edir ki, bu cəza xüsusilə ağır cinayətlərə, o cümlədən, dövlətə xəyanətə görə tətbiq edilir.
Alman həkimin edamı Belarusun viza ilə bağlı böyük planını poza bilərmi?
Siyasi şərhçi Yeganə Hacıyeva "Bakı-Xəbər"ə açıqlamasında bildirdi ki, Belarusun bu addımı atması ilə sadələşmiş viza rejiminə keçməsi hələ pandemiya dönəmindən bsşlayıb: "Həmin vaxt 70-ə yaxın ölkəyə Belarusda vizasız girmək və 5 gün ölkədə qalmaq icazəsi verildi. Bunu etdilər ki, həmin ölkələrin vətəndaşları sərbəst şəkildə gəlib Belarusda vaksin vurdura bilsinlər. Çünki Belarusun özü vaksin istehsal etmişdi. Həmin vaksinin daha çox satılması üçün bu addımı stimullaşdırdı. Hazırda isə ölkədə qalmaqla bağlı müddət və tranzit kimi istifadə etmək buna əlavə edilib. Buna baxmayaraq, Belarus viza rejiminə çox ciddi nəzarət edir. Hesab edir ki, onun daxilinə gələn hər bir avropalı stabilliyi pozmaq niyyəti güdə bilər. Bir vaxtlar Belarus hətta Rusiyadan gələn vaqnerçiləri belə İstanbula göndərmişdi. Belarusun liberallaşması heç də Avropa ilə dostlaşması anlamına gələ bilməz. Hazırda Belarusun əsas müxalifət lideri Avropadadır və ona ciddi dəstək verilir. Həmin ölkədəki insan haqları ilə bağlı vəziyyət ürəkaçan deyil. Hətta oradakı vəziyyət daha çox qapalı ölkələrlə eyniləşdirilir. Alman həkimlə bağlı məsələ də Avropanın diqqətindədir".
Ekspertin sözlərinə görə, insan haqlarının qorunmasında məhkəmə sisteminin şəffaflığı böyük önəm daşıyır: "Təbiidir ki, alman həkimin edamı ilə bağlı məsələ viza qərarının ləğvinə səbəb olmayacaq, ancaq Avropa ölkələrindən çox az sayda adamın gəlişi ilə nəticələnəcək".
Məhəmmədəli QƏRİBLİ
