Amid Əliyev: "Balanslaşdırılmış xarici siyasət və sabit enerji axınını təmin etməsi bir sıra Qərb mənbələrində fikir transformasiyasına səbəb oldu"
Azərbaycan Prezidenti İlham Əliyev iyulun 20-də "Yalan məlumatların ifşası: Dezinformasiyaya qarşı mübarizə" mövzusunda 2-ci Şuşa Qlobal Media Forumunda çıxışında deyib ki, biz Azərbaycanda və regionda baş verən hadisələrin obyektiv şəkildə işıqlandırılmasında maraqlıyıq. Bu sahədə müəyyən dezinformasiyalara rast gəlindiyini vurğulayan dövlət başçısı qeyd edib ki, vaxt keçdikcə Qərbdə siyasi dairələrdə reallıq daha çox üzə çıxır və Azərbaycana bərabər tərəfdaş kimi yanaşılır.
Qərbin Azərbaycana münasibətinin dəyişməsinə hansı amillər təsir etdi?
Siyasi şərhçi Amid Əliyev "Bakı-Xəbər"ə açıqlamasında bildirdi ki, II Şuşa Qlobal Media Forumunda çıxış edən ölkə başçısı bir sıra mühüm məsələlər üzrə vacib mesajlar verdi: "Bunların sırasında, xüsusilə Qərbin Azərbaycana yanaşması və dezinformasiya eləcə də ikili standartlar haqqında fikirlər adaha çox diqqəti cəlb edir.
Ona görə ki, bu gün dünya ümumilikdə qeyri-ədalətsiz yanaşma və ikili standartlardan əziyyət çəkir. Azərbaycan isə son 30 il ərzində bu siyasətin bariz qurbanı olub. Belə ki, keçən müddət ərzində Azərbaycan dünya ictimaiyyətinə, birliyinə və beynəlxalq təşkilatlar sisteminə anlatmağa çalışdı ki, işğala məruz qalan Azərbaycandır, 20% torpaq itirən Azərbaycandır, 1 milyondan artıq qaçqını olan Azərbaycandır, işğalçı isə Ermənistan. Lakin 2020-ci ilin sentyabr ayınadək dünya birliyi bu həqiqəti qəbul etmədi və daha çox ikili standartlara uyğun qiymətləndirmə sistemi tətbiq etdi.
Bu illər ərzində artıq fəaliyyətsiz qalan ATƏT-in Minsk qrupu saysız-hesabsız səfərləri nəticəsində ancaq Azərbaycanın güzəştə getməli olduğunu, bu proseslə barışmalı olduğunu və Ermənistana yardım edilməsinin vacib olması istiqamətində birtərəfli siyasət yürütdü. Nəticədə isə Azərbaycan təkbaşına BMT nizamnaməsinin 51 ci maddəsinə uyğun olaraq məsləni həll edib, yeni geosiyasi reallıq yaratdı.
Bundan sonra da Azərbaycan qarşı dezinformasiya müharibəsi və hətta etnik təmizləmə, müharibə cinayətlərinin törədilməsi və ermənilərin zorla köçürülməsi kimi böhtan ittihamlar səsləndirilməyə başlandı. Lakin son 3-4 il ərzində Azərbaycanın dayanıqlı sülh gündəliyinə sadiq qalması, müxtəlif vektorlu əməkdaşlıq platformalarını təklif etməsi, balanslaşdırılmış xarici siyasət və sabit enerji axınını təmin etməsi bir sıra Qərb mənbələrində fikir transformasiyasına səbəb oldu.
İndi Azərbaycan artıq bölgədə sülhün, təhlükəsizliyin təminatçısı olmaqla yanaşı Avropanın enerji tədarükçüsüdür. Orta Asiya və Ərəb dövlətləri liqası arasında birləşdirici körpü rolunu oynayan Azərbaycanın mövqeyi hazırda həqiqətləri inandırmaq yox, onları real olaraq icra etməyə yönəlib.
Qloballaşan dünyada dinlərin və mədəniyyətlərin inteqrasiya etdiyi bir dövrdə Azərbaycan Qafqazda əsl mulikultural mərkəzə çevrilib. Monoetnik Ermənistandan fərqli olaraq Azərbaycanda etnik xəritə daha rəngarəng və qarşılıqlı etimad və hörmət mühiti formalaşıb.
Bu illər ərzində keçirilən beynəlxalq səviyyəli dinlər və mədəniyyətlərarası forumlar, xarici KİV ninin nümayəndələri ilə birbaşa təmaslar və ən əsası Qarabağda erməni vəhşiliyinin vizual olaraq dünyayay göstərilməsi bütün daşları yerinə qoya bildi.
İndiki məqamda dünyanın aparıcı siyasi və iqtisadi forumlarına dəvət alan Azərbaycan qalib dövlət olmaqla yanaşı, haqq-ədalətin müdafiəçisi kimi də qəbul edilir. Azərbaycan real olaraq ictimai-siyasi həyatın bütün sferalarında etibarlı tərəfdaş kimi qəbul edilir. Hətta Azərbaycanın iştirak etmədiyi beynəlxalq tədbirlərdə belə onun hüququnu müdafiə edən tərəfdaşları bunu böyük məmnuniyyətlə edirlər".
Məhəmmədəli QƏRİBLİ
