Əli Mustafa: "Bu dövlətlər konsulluq açmaqla Zəngəzur dəhlizinə nəzarət paketi əldə etmək istəyir"
ABŞ-nin Ermənistandakı səfirliyi bildirib ki, iyulun 11-də ABŞ səfirliyi Zəngəzur vilayətinin Qafan şəhərində ilk dəfə olaraq ABŞ-ın Müstəqillik Gününə həsr olunmuş bayram tədbiri keçirib. Təcrübədə ABŞ hər zaman ABŞ Müstəqilliyinin ildönümü ilə bağlı İrəvanda bayram qəbulu təşkil edib. Amma burada diqqəti çəkən odur ki, ilk dəfədir şənlik ziyafəti vilayətlərdə, Qafanda təşkil olunur.
O da məlumdur ki, İran Qafanda baş konsulluq açıb. Bununla bağlı İran səfiri elan edib ki, indi İran Qafandadır və Zəngəzur sakinləri təhlükəsizlik baxımından rahat ola bilərlər. Rusiya Qafanda baş konsulluq açmağı elan edib və konsulluğun 2024-cü ilin sonuna kimi açılacağına ümid etdiyini bildirib. Fransanın xarici işlər naziri Ketrin Kolonna da 2023-cü ilin yazında ölkəsinin Qafanda konsulluq açmaq niyyətini açıqlayıb.
Bu mənada ilk dəfədir ABŞ-ın rəsmi olaraq Qafanda diplomatik tədbir təşkil etməsi orada konsulluq açmaq istəyi ilə bağlı ola bilərmi? Nəyə görə orada belə bir tədbir keçirilib?
"Mümkündür ki, ABŞ da Qafanda konsulluq açmaq istəsin"
Sözügedən məsələni "Bakı-Xəbər"ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, Birləşmiş Ştatların belə bir istəyi ola bilər: "Mümkündür ki, ABŞ da Qafanda konsulluq açmaq istəsin. Fransa və Rusiyanın istəyi bəllidir. İran isə artıq onu gerçəkləşdirib. Bu, təbii ki, daha çox Zəngəzur dəhlizi ilə bağlıdır. Bu dövlətlər konsulluq açmaqla Zəngəzur dəhlizinə nəzarət paketi əldə etmək istəyir. O ki qaldı Birləşmiş Ştatların orada tədbir təşkil etməsinə, bu da təsadüfi deyil. Vaşinqton bununla sanki demək istəyir ki, erməni xalqına bir köynək yaxınam. Çünki indiyə qədər belə hal baş verməmişdi. Müstəqillik Gününə həsr olunmuş tədbirlər adətən paytaxtda təşkil olunurdu. Bu dəfə bunun Zəngəzurda təşkil olunması daha çox bir mesajdır. Yəni bu, daha çox, Zəngəzur dəhlizinə nəzarətlə bağlı bir mesajdır. Heç kəsə sirr deyil ki, ABŞ da var gücü ilə çalışır dəhlizə nəzarət etsin. Rusiya, İran da o iddiadadır. Ümumiyyətlə, biz bir sıra məsələlərdə ABŞ-la İranın qarşıdurma şəraitində olduğunu görürük. Ancaq bəzi məsələlərdə bu dövlətlər əməkdaşlıq edir. Hətta gizli işbirlikləri də var. İndi konkret olaraq, ola bilsin ki, Zəngəzur dəhlizi məsələsində bunlar vahid mövqedən çıxış edirlər. ABŞ da, İran da istəyir ki, Zəngəzur dəhlizi Ermənistanın nəzarətində olsun. Hansısa eksterritoriallıqdan söhbət getməsin. Ancaq ümumiyyətlə, nəzəri olaraq ABŞ-ın Ermənistanda hərbi baxımdan iştirakı İranın maraqlarına uyğun deyil. Tehran bunu açıq bəyan etməsə də, bu belədir. Bir sözlə, Birləşmiş Ştatlar bununla mən də varam demək istəyir".
Vidadi ORDAHALLI
