Azər Həsrət: "Pauer açıq-aşkar şəkildə ermənilərə vəkillik edir"
ABŞ Beynəlxalq İnkişaf Agentliyinin (USAID) rəhbəri, ermənipərəst Samanta Pauer iyulun 10-da İrəvanda peyda olub və brifinq keçirib. S.Pauer yenə də öz ənənəsinə uyğun bəyanatlar verib və bildirib ki, Amerika Birləşmiş Ştatları Azərbaycanı Qarabağın "məcburi köçkün əhalisinin" "öz evlərinə təhlükəsiz qayıtması" hüququnu təmin etməyə çağırır.
USAİD-in rəhbəri Pauer qeyd edib ki, əvvəlki səfəri zamanı, 2023-cü ilin sentyabrında o, "Qarabağ ermənilərinin" Ermənistana necə "qaçdığını" görüb. Guya onları qovan varmış, onlar da qaçırmış. Azərbaycanın öz ərazisində suverenliyini təmin etməsi Paueri o qədər narahat edib ki, bu faktla barışmaq istəmir. Deyir ki, Azərbaycanın Qarabağdakı fəaliyyəti ABŞ Dövlət Departamenti tərəfindən araşdırılır, onlar hesabat hazırlayıb və sair. Anlamaq olmur ki, onlar nəyi araşdırırlar? Azərbaycan öz ərazilərində fəaliyyət həyata keçirir, öz torpaqlarında işlərini görür. Bundan ABŞ dövlət Departamenti, USAID niyə narahat olur ki?
Heç şübhəsiz bu, açıq-açığına və həyasızcasına Azərbaycanın daxili işinə müdaxilədir. Samantadan o brifinqdə soruşan olmadı ki, bəs Qarabağın ətrafında viran edilən 7 rayon, oradan qovulan vətəndaşların hüquqları necə olacaq?
Samanta deyir ki, ermənilərin Qarabağa qayıdışı hələ təmin olunmayıb, guya onlar Qarabağdan böyük zülm içində qaçıblar və sair. Demir ki, Azərbaycan onları qaytarmağa hazır olsa da, ermənilər özləri qayıtmaq istəmirlər.
S. Pauer öz erməni sevgisini gerçəklikdən və obyektivlikdən üstün tutaraq yenə də öz havasını çalır. Yenə də "Arsax" sancısı ilə yaşayır, guya ermənilərin geri qaytarılması vacib imiş. Erməniləri kim qovmuşdu ki, onlar gedirdlər? Guya ABŞ Dövlət Departamentində ermənilərlə bağlı sənədlər, müsahibələr var. "Biz bu yaxınlarda dərc edilmiş ən son hesabatlardan xəbərdarıq, onlarda çoxlu sənədləşdirilmiş sübutlar var, son illərdə, o cümlədən ötən ilin sentyabrında baş verənləri yaşamış bir çox ailə ilə müsahibələr var", - deyə Samanta Pauer bildirib. Pauer qondarma hesabatlardan danışır. Bizim də əlimizdə kifayət qədər faktlar var ki, ermənilər Qarabağdan könüllü köçüb gediblər.
"Tərəflər sülh yolunu axtarmaqda ikən Samanta Pauer öz dövlətinin siyasətinə zidd olaraq iki xalq arasında uçrumun dərinləşdirilməsinə əlavə "töhfə" verməyə çalışdı"
Siyasi şərhçi Azər Həsərət "Bakı-Xəbər"ə açıqlamasında bildirdi ki, S.Pauerin Ermənistana səfərini, onun orada verdiyi açıqlamaları yaxından izləyir. "Təbiidir ki, mümkün olduqca informasiya əldə etməyə çalışıram. Diqqətimi çəkən odur ki, bu qadın öz işini bir kənara buraxıb Azərbaycan dövlətinə xəyanət etmiş, Azərbaycan torpaqlarını bölməyə çalışmış və nəticədə də başlarına bu işlər gəlmiş ermənilərin vəkili qismində çıxış edir. Əslinə qalanda onun işi demokratiya, insan haqları və sair məsələlərdə ABŞ-ın maliyyə yardımlarını təmin etməkdir. Amma baxıram ki, o gəlir və İrəvanda Qarabağdan gəlmiş ermənilərin iş yerlərinə gedir, orada Azərbaycan qutabını ermənicə verdikləri adla bişirməklə məşğul olurlar, Pauer də onlara qoşulub qutab bişirir, bunun "erməni bişmişi" olduğunu sanki o da təsdiqləyir. Yəni məsələyə dəxli olmayan işlər görür. Bu tərəfdən də, Qarabağdan getmiş ermənilərin evlərinə qayıtması haqqında danışır. Danışa bilər. Heç nə demirik. Ancaq bunu deyərkən 700 mindən çox azərbaycanlının hələ də Qarabağa - öz evlərinə qayıda bilməməsini dilə belə gətirmir. Ondan savayı, aşağı-yuxarı 250 min nəfərdən çox azərbaycanlının Ermənistan adlanan Qərbi Azərbaycan torpaqlarına hələ də qayıda bilməməsini dilinə gətirmir. Yəni nəzərə alsaq ki, doğru-yalan rəqəmlərə görə Qarabağı 100 min erməni tərk edib, 100 min erməninin dərdini çəkən Pauer necə ola bilir ki, indiki Ermənistan ərazisindən, öz ata-baba torpaqlarından zorla qovulmuş, deportasiya edilmiş 250 min azərbaycanlının məsələsini heç zaman yada salmır? Bu məsələ haqda danışmır. Səbəb nədir? Pauer açıq-aşkar şəkildə ermənilərə vəkillik edir. Özü də bu onun indiki vəzifədə vəkilliyi deyil. Samanta Pauer həmişə ermənilərin tərəfində olub. Biz demirik tərəf tutmasın, tuta bilər. Amma o, ədalət hissini büsbütün unudub, yaddan çıxarıb"-deyən A.Həsrət bildirdi ki, o, haqsız, ədalətsiz yerə ermənilərin tərəfindən çıxış edir.
Qeyd olunan hesabata gəlincə, A.Həsrət bildirdi ki, hələ o hesabat açıqlanmayıb və Pauerin açıqlanmayan hesabata istinad etməsi normal görsənmir. "Onun yayılmamış hesabata istinad etməsi bir dövlət etikası məsələsində də qüsurlu birisi olduğunun göstəricisidir. Ona görə də düşünürəm ki, ABŞ artıq bu qadınla yollarını ayırmalıdır. USAID rəhbəri iki xalq arasında sülhyaratma proseslərinə davamlı şəkildə əngəl olmağa çalışır. ABŞ Dövlət Departamenti səviyyəsində, ABŞ dövlət katibi səviyyəsində tərəfləri bir araya gətirməyə çalışır.
NATO zirvəsində iştrak etmək üçün iyulun 10-da ABŞ-a səfərə getmiş Azərbaycanın xarici işlər naziri, Ermənistan xarici işlər naziri və ABŞ dövlət katibinin birgə üçlü görüşü keçirilib. Tərəflər sülh yolunu axtarmaqda ikən Samanta Pauer öz dövlətinin siyasətinə zidd olaraq iki xalq arasında uçrumun dərinləşdirilməsinə əlavə "töhfə" verməyə çalışdı".
A.Həsrətin fikrincə, bu səbəbdən də ABŞ artıq bu qadını yerində oturtmalıdır ki, iki xalq arasında yaradıla biləcək sülhə mane ola bilməsin.
İradə SARIYEVA
