Qardaş Türkiyədə siyasi səhnədə baş verənlər dünya miqyasında da yaxından izlənilir. Söhbət İstanbul Böyük Şəhər Bələdiyyəsinin sədri Əkrəm İmamoğlunun saxlanılmasından gedir. Polis İmamoğlunu martın 19-u səhər tezdən evinə reyd zamanı saxlayıb.
“Anadolu” agentliyinin məlumatına görə, prokurorlar aralarında onun, o cümlədən iş adamları və jurnalistlərin də olduğu 100-ə yaxın şəxsin saxlanması barədə göstəriş verib. Onlara cinayətkar təşkilata rəhbərlik, üzvlük, hədə-qorxu ilə tələb etmə, rüşvət alma, şəxsi məlumatların qanunsuz əldə edilməsi və tender nəticələrinin saxtalaşdırılması maddələri ilə ittihamlar verilib. Prokurorluğun bildirdiyinə görə, Əkrəm İmamoğlu və bir çox başqa şəxslər iş adamlarını pul verməyə məcbur ediblər, haqsız qazanc əldə ediblər, cinayət fəaliyyətindən qazanılan vəsaitləri yuyublar. Hətta prokurorluq İmamoğlunu cinayətkar təşkilatın lideri adlandırır. İmamoğlunun özü tutulmazdan əvvəl X hesabında yazıb: “Xalqın iradəsi hədə-qorxu və ya qeyri-qanuni hərəkətlərlə boğula bilməz. Mən taleyimi təkcə İstanbulun 16 milyon əhalisinə deyil, həm də Türkiyənin 86 milyon vətəndaşına, bütün dünyada demokratiya və ədaləti dəstəkləyən hər kəsə tapşırıram. Əsas hüquq və azadlıqlar uğrunda mübarizəmdə əzmkaram”. Bir gün əvvəl, martın 18-də İstanbul Universiteti “açıq-aşkar səhv”i əsas gətirərək İmamoğlunun diplomunu ləğv edib. Medianin məlumatına görə, bu, onu prezident seçkisində iştirak imkanından məhrum edir, çünki namizədin universitet diplomu olmalıdır. İmamoğlu bu qərarı qanunsuz və akademik sistemə siyasi müdaxilə adlandırıb. Xatırladaq ki, Türkiyədə növbəti prezident seçkisi 2028-ci ilə təyin edilib. Müxalifətdə olan Cümhuriyyət Xalq Partiyası prezident seçkisinin erkən keçirilməsini tələb edir. Bu məqsədlə bir neçə gün sonra partiyanın namizədinin müəyyən edilməsi ilə bağlı seçki olmalı idi. Amma indi İmamoğlu “cinayət təşkilatı yaratmaq”, “PKK ilə birgə hərəkət etmək” və “korrupsiya” cinayətləri ilə ittiham olunur. Baş verənlər, gözlənildiyi kimi, Cümhuriyyət Xalq Partiyasının kəskin etirazlarına səbəb olub. Partiya sədri Özgür Özəl İstanbul qeyd edib ki, xalqın əvəzinə qərar vermək, xalqın iradəsini dəyişdirmək və ya bunun qarşısını almaq üçün güc tətbiq etmək çevrilişdir: “Hazırda xalqın növbəti prezidenti təyin etməsinə mane olacaq qüvvə var. Biz növbəti prezidentimizə qarşı çevriliş cəhdi ilə üz-üzəyik. Millətimiz öz dövlətini sevir, amma kimlərsə tərəfindən dövlət xalqın qarşısına çıxsa, xalq buna imkan verməz. Əsl güc xalqdır və sonda yenə də xalq qazanar. Sonda yenə millətin dediyi olacaq və Türkiyə qalib gələcək”. Ankara Böyükşəhər Bələdiyyəsinin sədri, Cümhuriyyət Xalq Partiyasından olan Mansur Yavaş da İmamoğlunun saxlanılmasına kəskin etiraz edib: “Bu ölkədə qanunun aliliyini, demokratiyanı və xalqın iradəsini müdafiə edən hər kəs bilməlidir ki, seçilmiş bələdiyyə sədrinə qarşı bu cəhdlər qəbuledilməzdir. Diplomun ləğvi, ardınca da İmamoğlunun evinin qarşısına toplaşan polis və onların komandasına qarşı həbs prosedurları... Bu mənzərə hüquqi dövlətə yaraşmaz. Saxlanma səbəbi bilinməsə də, daha əvvəl məhkəməyə gedib ifadə verən bələdiyyə sədrinin bu gün saxlanılması nəyin göstəricisidir? Həqiqətən ədalət axtarırsansa, ilk növbədə hüququn əsas prinsiplərinə əməl etməlisən. Bilinməlidir ki, millətin iradəsinə zidd heç bir müdaxilə cavabsız qalmır. Qeyri-qanuni üsullarla, təzyiq və təhdidlərlə həyata keçirilən bu təcrübələrdən ən böyük zərəri demokratiyamız görəcək. Amma biz susmayacağıq! Heç kim unutmasın: Əkrəm tək deyil!”.
Əkrəm İmamoğlunun həbsindən sonra onun həyat yoldaşı Dilek İmamoğlu da mühüm açıqlamalar verib. "Terror ittihamı haqqında nə düşünürsünüz" sualına o belə cavab verib: "Belə şeyə ancaq gülmək olar. Belə bir şey mümkün deyil, ola bilməz. 20 gündür 3-5 nəfər sosial şəbəkələri alt-üst edir, bu tamamilə böhtandır. Bir-birimizdən, həmkarlarımızdan gizlədəcək heç nəyimiz yoxdur. Biz şəffafıq... Biz özümüzü millətimizə etibar edirik, çünki həyatımızı açıq-aşkar yaşayırıq. Bir ana kimi övladlarımı psixoloji cəhətdən güclü saxlamaq üçün məsuliyyət daşıyıram, amma Allaha şükür ki, övladlarım çox güclüdür”. Türkiyənin Millətçi Hərəkat Partiyasının rəhbəri Dövlət Baxçalı səslənən iddialara cavab verib: “Heç kəs ayrıseçkiliyə məruz qalmayacağı kimi, heç kimin də ideoloji, siyasi, iqtisadi üstünlüyü və ya imtiyazı yoxdur. İstanbul Böyükşəhər Bələdiyyə sədri ilə bağlı verilən məhkəmə qərarına səbr və sağlam düşüncə ilə yanaşmaq, qanunun verdiyi hər bir qərara hörmət etmək ortaq məsuliyyət olmalıdır. Heç kim toxunulmaz, əlçatmaz deyil. Ədalət və qanuna qarşı çıxmaq, hətta onu müzakirəyə açmaq iğtişaş və zorakılıq mühitinə dəvətdir. Qanuni bir tədbiri çevriliş adlandıraraq qaralamaq, hüquq axtarışı üçün küçələrə çıxmağa hazırlaşmaq dəli olmuş, ağıl və əxlaq səviyyəsini itirmiş siyasi fəsaddır. Mən Türkiyə məhkəmə sisteminə tam güvənirəm. Həm fərdi, həm də sosial müstəvidə zorakılığın qarşısının alınması bizim hər zaman həssas olduğumuz aktual mövzudur”.
Onu da qeyd edək ki, İstanbul Böyükşəhər Bələdiyyəsində korrupsiyaya qarşı əməliyyat fonunda daha bir neçə nəfər də saxlanıb. Saxlanılanlar arasında tanınmış adlar da var. Şişli Bələdiyyə sədri Rəsul Əmrah Şahan, Bəylikdüzü Bələdiyyə başçısı Mehmet Murad Çelik, tanınmış jurnalist İsmayıl Saymaz, KİPTAŞ-ın İdarə Heyətinin sədri Əli Qurd, İBB sədrinin müavini Mahir Polad və digərləri buna misaldır. “Financial Times” qəzeti yazır ki, İmamoğlu CHP-nin prezidentliyə namizədini müəyyən etmək üçün keçirəcəyi ilkin seçkilərdə yeganə namizəd olacaqdı: "Seçkilərin 2028-ci ildə keçirilməsi planlaşdırılır, lakin partiya namizədinin indi müəyyən edilməsinin CHP-nin parlamenti erkən seçki qərarı verməyə məcbur edəcəyini göstərir". ABŞ-ın aparıcı qəzetlərindən olan “Washington Post” tərəfindən isə İmamoğlunun ilk dəfə 2019-cu ildə İstanbul bələdiyyə başqanı seçildiyi və keçən il ikinci dəfə seçkilərdə qalib gəldiyi xatırladılıb. ABŞ-ın CNN telekanalı da İmamoğlunun saxlanılması xəbərinə “Ərdoğanın əsas rəqibi” prizmasından baxıb. Materialda tənqidçilərə istinad edərək bildirilib ki, həbslərin siyasi xarakterli olması da istisna deyil.
Samirə SƏFƏROVA
