Bəhruz Quliyev: “Ermənistanı silahlandırmaq yenidən Cənubi Qafqazı alovlandırmaq cəhdidir”
Avropa İttifaqının Ermənistana əlavə hərbi yardım paketi elan etdiyi məlum olub. Fransanın rəhbərlik etdiyi təşəbbüs çərçivəsində Ermənistana hərbi texnika və sursat veriləcək, yardım paketləri genişləndiriləcək. İrəvan isə “növbəti müharibəyə hazırlaşmaq” üçün PUA almağa başlayıb.
Avropa İttifaqının mərkəzi qurumlarının yerləşdiyi Belçikanın paytaxtı Brüsseldəki “EU Reporter” nəşrinin əldə etdiyi məlumata görə, Aİ Ermənistanı silahlandırmaq üçün layihə müəyyənləşdirib. Layihəyə Fransa rəhbərlik edir. Paris Hindistan və Yunanıstanla birlikdə İrəvanı silahlandıracaq 3 ölkə arasında olduğu halda, Ermənistan bu dəfə Avropa Sülh Quruculuğu Fondu (APF) tərəfindən sursat yardımı alacaq. Hazırda İrəvana 10 milyon avroluq hərbi yardım göstərilir və bunun genişləndiriləcəyi bildirilir.
Görünən odur ki, Avroittifaq Ermənistanın silahlandırılmasını daha da intensivləşdirir.
“Xüsusilə Fransanın bu prosesdə liderlik etməsi regionda balansı dəyişdirə biləcək ciddi bir geosiyasi hadisədir”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, pilitoloq Bəhruz Quliyevin fikrincə, bu, regionda balansı dəyişdirə biləcək ciddi bir geosiyasi hadisədir: “Məlum olduğu kimi, Avropa İttifaqı (Aİ) Ermənistanı silahlandırmaq istiqamətində addımlar atmağı planlaşdırır. Xüsusilə Fransanın bu prosesdə liderlik etməsi regionda balansı dəyişdirə biləcək ciddi bir geosiyasi hadisədir. Bu yardımın genişləndirilməsi və Avropa Sülh Quruculuğu Fondu (APF) vasitəsilə həyata keçirilməsi Aİ-nin Ermənistanla bağlı yeni strateji yanaşma formalaşdırdığını göstərir. Sözügedən məsələdə Paris uzun müddətdir Ermənistanı dəstəkləyən əsas Qərb ölkələrindən biridir. Son illərdə Fransa-Ermənistan hərbi əməkdaşlığı artıb. Fransanın bu məsələdə aktivliyi, həm də Azərbaycanla münasibətlərindəki gərginliklə əlaqələndirilir”.
Politoloq B.Quliyev hesab edir ki, Avropa İttifaqı, xüsusilə Ukrayna müharibəsindən sonra öz təhlükəsizlik siyasətini yenidən formalaşdırmağa çalışır: “İlk növbədə ehtimal olunur ki, Ermənistanın silahlandırılması, Rusiyanın təsirindən çıxarılmasına da xidmət edir. Amma bu, eyni zamanda Cənubi Qafqazda yeni gərginliklərə səbəb olub, yeni münaqişə ocağının yaranmasına da xidmət edə bilər. Azərbaycana gəldikdə isə, rəsmi Bakı bu cür silahlanma proseslərini diqqətlə izləyir və regionda balansın pozulmasına qarşı adekvat cavab verəcəyini bildirib. Azərbaycan sülh tərəfdarı olub və bu gün də mövqeyi bəllidir. Lakin Ermənistanı silahlandırmaq yenidən Cənubi Qafqazı alovlandırmaq cəhdidir. Bu isə nə tərəfdaşlığa, nə müttəfiqliyə, nə də qonşuluq siyasətinə uyğundur. Hesab edirəm ki, Aİ həqiqətən sülh, əminamanlıq tərəfdarıdırsa təxribatçı əməllərindən vaz keçməlidir. Aİ-nin bu cür davranışı Cənubi Qafqazda yeni bir mərhələnin başlandığını göstərir. Bu isə Azərbaycanın diplomatik və hərbi hazırlığını artırmasını, balansın qorunması üçün müttəfiqləri ilə daha sıx əməkdaşlıq etməsini zərurətə çevirir”.
Vidadi ORDAHALLI
