İstanbulda kütləvi həbslər çevriliş adlandırıldı, Ədliyyə naziri hədələdi...
İstanbul Böyükşəhər Bələdiyyəsinin sədri Əkrəm İmamoğlu terror təşkilatına yardım ittihamı ilə saxlanılıb. Səhər saatlarında keçirilən əməliyyatda, aralarında İstanbul Böyükşəhər Bələdiyyə sədrinin müşaviri Murat Ongun, Beylikdüzü bələdiyyə başçısı Murat Çalık, Şişli bələdiyyə başçısı Resul Emrah Şahan və müğənni Ercan Saatçının da olduğu 100-dən çox adam saxlanıb.
Saxlanılan şəxslər arasında 10 iyun 2024-cü ildə ikinci dəfə yayıma başlayan CNBC-e-nin də daxil olduğu İlbak Holdinqin ortaqlarından Mustafa İlbak, İdarə Heyətinin sədri Murat İlbak, İlbak ailəsindən olan Yusuf İlbak və Ali İlbak da var. Bundan başqa, CNBC-e kanalının rəhbəri Servet Yıldırım da saxlanıb.
Qalmaqallı həbslərlə bağlı açıqlama verən Türkiynə ədliyyə naziri Yılmaz Tunc İmamoğlu, Şişli və Beylikdüzü bələdiyyə sədrləri də daxil olmaqla 106 nəfər haqqında həbs qərarı çıxarıldığını, 80-dən çox adamın ifadə vermək üçün polis bölməsinə aparıldığını bildirib.
CHP İstanbul İl sədri Özgür Çelik məsələ ilə bağlı açıqlamasında məhkəmə sistemini təhdid edib: "Hazırda Vətən Polis İdarəsi 360 dərəcə mühasirəyə alınıb. Bura gəlmək üçün polislərlə uzun-uzadı söhbət etməli oldum. Açıq-aşkar çevriliş edilir. Təhlükəsizlik qüvvələrini bu cinayətə şərik edirlər. Valiyə zəng etdim. Bu çevrilişdir, bürokratiya bu işdə alət olmamalıdır. Bu cinayəti edənlər mühakimə olunacaqlar. Polislərə bu əmrləri verənlər açıq şəkildə cinayət işləyirlər. Bu cinayəti törətməsinlər. Heç bir məmur bu cinayəti işləməməlidir. Onlar tarix qarşısında mühakimə olunacaqlar. Valinin şərhlərini burada paylaşmaq istəmirəm, ancaq məhkəmə prosesi ilə bağlı bir tərif etdi. Mən ona bunun çevriliş olduğunu dedim”.
CHP Beykoz rayon Gənclik Qolunun keçmiş sədri Burak Saldıroğlu isə X hesabından insanları küçəyə çıxmağa çağırıb. "İstanbul Valiliyi artıq hökmsüzdür... Ankara hökuməti artıq hökmsüzdür. Bu gün harda olursa olsun, qapınızın önünə çıxın və müqavimət göstərin, haqlarınız və 100 illik qazanclarınız üçün müqavimət göstərin... Küçələrə çıxın" - Saldıroğlu paylaşımında bildirib.
Ədliyyə naziri Tunç isə CHP-çilərin çevriliş açıqlamalarını və “küçələrə çıxın” çağırışlarını sərt tənqid edib. “Baş Prokurorluğun apardığı iki araşdırma var. Heç bir qrupa imtiyaz verilə bilməz. İstintaq məxfidir. Bu məxfilik son dərəcə vacibdir. İstintaqın məzmununu bilmədən dəyərləndirmə aparmaq düzgün deyil. Müxtəlif tərəflərə çəkmək, çevriliş kimi ifadələr işlətmək düzgün deyil. İnsanları küçəyə çağırmaq yol verilməsi yolverilməzdir. Müdafiənin ediləcəyi yer küçələr deyil, məhkəmə binasıdır” – deyə nazir Tunç bildirib.
Ədliyyə naziri əməliyyatın prezidentlə əlaqələndirilməsini də sərt tənqid edib: “Ədliyyə orqanlarının başlatdığı araşdırmaları prezidentimizlə əlaqələndirmək ədəbsizlik və lovğalıqdır. Məhkəmə heç kimdən əmr, göstəriş almır. Məhkəmə üzvlərini təhdid etmək heç vaxt qəbuledilməzdir. Məhkəmə qərarı hamı üçün məcburidir”.
TAHİR
