Xəyal Bəşirov: “Ermənilərin BMT-yə çağırışının heç bir təsiri olmayacaq, çünki o qurum artıq öz rəyini verib, Azərbaycana qarşı səsləndirilən ittihamların əsassız olduğunu bəyan edib”
Ağır cinayət törətməkdə təqsirləndirilən erməni əsilli şəxslərin Bakı məhkəməsinə Ermənistan və onun havadarları siyasi don geydirməyə, hüquqi məsələyə siyasi şəkil verməyə çalışırlar. Burda söhbət birbaşa hüquqi məsələ ilə bağlı olduğu halda ermənilər bunu siyasiləşdirir və özlərinə beynəlxalq təşkilatlarda havadarlar axtarırlar.
Bu günlərdə bir qrup erməni BMT-nin İrəvandakı ofisinin qarşısında aksiya keçirib və BMT-dən tələb ediblər ki, Bakıda mühakimə edilən şəxslərin məhkəməsinə nümayəndə göndərsin.
Aksiya keçirənlərin tələblərinin həddən artıq absurd olduğunu nəzərə alaraq onların iddialarını geniş işıqlandırmaq istəmirik. Çünki onlar Bakı məhkəməsinə qarşı uyğun olmayan fikirlər işlədiblər. Bircə onu deyək ki, ermənilərin iddiasına görə, BMT-nin və başqa beynəlxalq qurumların nümayəndələri erməni məhbuslara baş çəkməli və məhkəmədə iştirak etməlidirlər (?). Anlamırlar ki, bu siyasi məsələ deyil, birbaşa hüquqi prosesdir və burda da qərarı məhkəmə verir, siyasi təzyiq məhkəmənin qərarını dəyişə bilməz.
“Onlar bu məsələdə ölkəmizə siyasi təzyiq göstərilməsinə nail olmaq istəyirlər”
Məsələyə şərh verən Siyasi və Hüquqi Araşdırmalar Mərkəzinin rəhbəri Xəyal Bəşirov "Bakı-Xəbər"ə bildirdi ki, onlar həmişə hüquqi məsələni siyasiləşdirirlər. “Erməni tərəfi bütün məsələlərdə olduğu kimi, bu məsələdə də qeyri-səmimiliyini ortaya qoyur, eyni zamanda beynəlxalq ictimaiyyəti çaşdırmaq məqsədilə absurd görüntülər yaratmağa çalışır. Əslində, Azərbaycan tərəfi həmin o şəxslərlə bağlı həm ibtidai istintaq mərhələsində, həm də məhkəmə prosesində Cinayət Prosesual Qanunvericiliyinə zidd olmayan səviyyədə məlumatları paylaşır, həm Azərbaycan ictimiayyəti, həm beynəlxalq ictimaiyyət, həm də Ermənistan ictimaiyyəti bununla tanış olur. Həmin o şəxslər uzun illər Azərbaycan ərazilərində qanunsuz olanda, “rejim” formalaşdıranda, Azərbaycan xalqına və dövlətinə qarşı törədilən cinayətlərdə icraçı rolunda iştirak edəndə bu gün həmin o aksiyaları keçirənlər harda idilər, onlara niyə çağrışlar etmirdilər ki, bu əməllərdən çəkinin, günlərin birində törətdiyiniz bu cinayətlərə görə cavab verməli olacaqsınız? Təbii ki, o çağırışı etməyənlər indi o şəxslərlə bağlı beynəlxalq ictimaiyyətə yalan dolu məlumatlar verir, yanlış çağırışlar edirlər, bununla reytinq qazanmağa çalışırlar, eyni zamanda Azərbaycanın mövqeyini, nüfuzunu sarsıtmağa cəhd edirlər. Onlar bu məsələdə ölkəmizə siyasi təzyiq göstərilməsinə nail olmaq istəyirlər. Digər tərəfdən, Ermənistanda Azərbaycana qarşı bu dezinformasiyaları, bu absurd iddiaları yayanlar özləri, eləcə də Ermənistan hökuməti BMT-nin Təhlükəsizlik Şurasının qətnamələrini tapdaladılar, o sənədlərə hörmətsiz yanaşdılar. Ermənistan və bu cür absurd çağırışlar edən ermənilər BMT-nin 4 qətnaməsinə hörmətsiz yanaşdılar, amma bu gün həmin təşkilatdan mədət umurlar. O təşkilatın sənədlərini ayaq altına atan tərəf BMT-dən mədət uma bilməz. Ən azı, bu saxtakarlıqdır. O ki qaldı BMT-yə çağırış edənlərə, onlar unudurlar, ya yada salmaq istəmirlər ki, bir neçə gün əvvəl BMT-nin İnsan Hüquqları Şurasının Əsassız Həbslər üzrə İşçi Qrupu Ruben Vardanyanın işi ilə bağlı yekun rəy elan etdi və bu iddiaların rədd olunduğuna dair rəy dərc etdi və bununla da Azərbaycana qarşı səsləndirilən iddiaların əsassız olduğunu bir daha təsdiq etdi. İşçi Qrup bəyan etdi ki, Vardanyanın hüquqlarının pozulmasına dair səsləndirilən ittihamlar yalandır, əsassızdır, o, tərcüməçi ilə, vəkillə təmin edilib, yaxınları ilə əlaqə saxalaya bilir və sair. Bunu biz demirik, bunu BMT-nin mühüm təsisatlarından biri bəyan edib. Ermənilərin BMT-yə çağırışının heç bir təsiri olmayacaq, çünki o qurum artıq öz rəyini verib, Azərbaycana qarşı səsləndirilən ittihamların əsassız olduğunu bəyan edib”.
X.Bəşirov qeyd etdi ki, R.Vardanyan, A.Artunyunyan, Bako Saakyan və başqaları BMT-nin 4 qətnaməsini tapdayaraq Azərbaycan ərazisində qanunsuz əməllərlə məşğul olub, bütün fəaliyyətlərini bu sənədin tələblərinə əməl etməmək istiqamətində qurublar. “BMT-yə, onun qətnamələrinə hörmətsizlik edən və Azərbaycana qarşı cinayətlərini davam etdirən, bu gün məhkəmə qarşısına çıxarılan o şəxslər layiq olduqları cəzanı alacaqlar. Bunun başqa nəticəsi olmayacaq. Nə qədər aksiyalar keçirilsə də nəticə dəyişməyəcək. Bu əsassız iddialar, absurd fikirlər Azərbaycan dövlətini öz haqlı yolundan döndərə bilməz”-deyə X.Bəşirov qeyd etdi.
İradə SARIYEVA
