Ramil Məmmədli: “Çox güman ki, ABŞ Çin faktoruna görə bununla tranzit qovşağına nəzarət etmək istəyir”
ABŞ Ordusu Material Komandanlığı Almaniyanın Dülmen şəhərindəki hərbi bazadan yüzlərlə hərbi texnika və nəqliyyatı Gürcüstan vasitəsilə Ermənistandakı Zar hərbi bazasının poliqonlarına daşımağı planlaşdırır.
ABŞ Dövlət Satınalma Portalında göstərilən məlumata görə, ümumilikdə 151 ədəd hərbi texnikanın (nəqliyyat, generatorlar, xüsusi konteynerlər və s.) Ermənistana transferinin iyulun 16-dan avqustun 7-dək aparılması, avqustun 21-dən sentyabrın 20-dək isə yenidən Almaniyaya qaytarılması nəzərdə tutulur. Almaniyanın Dülmen şəhərində ABŞ Ordusunun 405-ci Sahə Dəstək Briqadası yerləşir. Transferə dair müqavilədə bir məqam maraq doğurur. Bildirilir ki, "diplomatik icazələrlə bağlı çətinliklər səbəbi ilə" texnika Rusiya, Türkiyə və ya Azərbaycan ərazisi ilə daşına bilməz.
Hərbi mütəxəssislər "Russia Today" telekanalına açıqlamada Vaşinqtonun bu addımını "Pentaqon"la Ermənistan Ordusu arasında keçirilməsi mümkün birgə təlimlərlə əlaqələndirirlər. Hərbi elmlər doktoru Konstantin Sivkovun sözlərinə görə, ABŞ qoşunlarının Ermənistanda fəaliyyətini artırması Vaşinqtonun Zaqafqaziyada təsirini gücləndirmək məqsədindən xəbər verir.
Məsələnin ən diqqət çəkən məqamı odur ki, Pentaqon bunu inkar etmir. O cümlədən, ümumiyyətlə şərh etmir. Bununla bağlı erməni mediasının sorğusuna Pentaqondan belə cavab verilib: “ABŞ Ermənistanla münasibətlərimizi yüksək qiymətləndirir. Müdafiə Nazirliyi əməliyyat təhlükəsizliyi baxımından daşınan hərbi texnikanın hərəkətini şərh etmir”.
O cümlədən, Ermənistan Müdafiə Nazirliyi də məsələni şərh etməyib.
Maraqlıdır, ümumilikdə 151 ədəd hərbi texnikanın Ermənistana köçürülməsində məqsəd nədir?
“Birləşmiş Ştatlar Ermənistan ərazisindən İrana qarşı kəşfiyyat məqsədləri üçün istifadə edəcək”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında bildirdi ki, bunda ABŞ-ın bir neçə məqsədi ola bilər: “Əvvəla, bəli, Birləşmiş Ştatlar Avropada hərbi kontingentin sayını azaldır. Məqsəd odur ki, ABŞ əvvəlki illərdə olduğu kimi Avropanın təhlükəsizliyinə böyük resurslar xərcləmək istəmir. Prezident Donald Tramp açıq deyir ki, Avropa təhlükəsizliyini təmin etmək istəyirsə, zəhmət çəksin pul xərcləsin. Əvvəl belə idi ki, NATO çərçivəsində müdafiə və təhlükəsizliklə bağlı xərclərin böyük hissəsini ABŞ öz üzərinə götürürdü. Avropa ölkələri isə bununla bağlı xərcləri sosial məqsədlərə yönəldir. Düzdür, Tramp təkcə hərbi xərcləri azaltmaqla pula qənaət etmir. Digər addımlar da atır. Ancaq belə olan halda sözügedən hərbi texnika niyə Ermənistana yönəldilir? Burada bir neçə məqsəd ola bilər. Bir məqsəd onunla bağlıdır ki, Ermənistan Cənubi Qafqazın önəmli tranzit halqasıdır. Əvvəl-axır Zəngəzur dəhlizi açılacaq və bu, qaçılmazdır. Çox güman ki, ABŞ Çin faktoruna görə Ermənistana yerləşməklə sözügedən tranzit qovşağına nəzarət etmək istəyir. Vaşinqton yaxşı bilir ki, Azərbaycan müstəqil siyasət yeritdiyi üçün hansısa ölkənin ordusunu öz ərazisində yerləşdirməz. Gürcüstan da ərazilərinin bir hissəsini itirdiyindən və Rusiya amilinə görə buna getməz. Yalnız Ermənistan buna gedər. Çünki ermənilər tarixən kiminsə marioneti olmağa meylli olublar. Ola bilər ki, nəyinsə müqabilində Tramp Ermənistanla bağlı Putinlə anlaşıb. ABŞ hərbi texnikasının Ermənistana daşınmasının ikinci səbəbi İran amili ilə bağlı ola bilər. Biz Trampın İranla bağlı radikal mövqe sərgilədiyini unutmamalıyıq. Vaşinqton fərqindədir ki, Azərbaycan İrana qarşı platsdarm rolunda çıxış etməyəcək. Ən azından ona görə ki, İranda milyonlarla soydaşımız yaşayır. Bu səbəbdən ABŞ xristian ölkəsi olaraq Ermənistanı seçib. Çox güman ki, ABŞ Ermənistan ərazisindən İrana qarşı kəşfiyyat məqsədləri üçün istifadə edəcək. Baxın, Ermənistan kimi kiçik ölkədə ABŞ-ın ən böyük səfirliklərindən biri yerləşir. Bəlli məsələdir ki, bunun arxasında müəyyən məqsədlər dayanır”.
Vidadi ORDAHALLI
