ABŞ Almaniyadan Ermənistana 151 hərbi texnika daşıyacaq - konkret tarix qoyuldu..
ABŞ Almaniyadakı bazalarından yüzlərlə texnika və nəqliyyat vasitələrini Ermənistandakı poliqonlara köçürmək niyyətindədir. RT-nin nəzərdən keçirdiyi sənədlərə əsasən, daşımaların Gürcüstan üzərindən həyata keçirilməsi planlaşdırılır. ABŞ dövlət satınalma portalının məlumatına görə, ABŞ Ordusu Material Komandanlığı Almaniyanın Dülmen şəhərindəki hərbi bazadan Ermənistandakı Zar bazasına texnika daşımağı planlaşdırır. İyulun 16-na planlaşdırılan transferin avqustun 7-dək davam edəcəyi gözlənilir. Nəqliyyat xidmətlərinin göstərilməsi üzrə tenderdə qeyd edildiyi kimi Almaniyaya qayıdış 2025-ci il avqustun 21-dən sentyabrın 20-dək nəzərdə tutulub. Müqavilə Ermənistanın Armavir poliqonundan Gürcüstanın Poti limanına avadanlığın daşınmasını da nəzərdə tutur. Ümumilikdə, nəqliyyat vasitələri, generatorlar və ixtisaslaşdırılmış konteynerlər də daxil olmaqla 151 ədəd texnikanın daşınması planlaşdırılır. Amerika hərbçiləri logistika ilə yanaşı, birbaşa Ermənistandakı poliqonda Afrika donuz taunu ilə mübarizə aparan maşınların yuyulması və dezinfeksiya edilməsi kimi xüsusi xidmətlər də sifariş edir. Müqavilə çərçivəsində səkkiz təcili yardım maşını da Ermənistana veriləcək. Lakin tenderdə bir şərt var: “diplomatik icazələrlə bağlı çətinliklər” səbəbindən avadanlıq Rusiya, Türkiyə və ya Azərbaycan ərazisi ilə daşına bilməz. Təchizatın köçürülməsi planlaşdırılan Dülmendə ABŞ ordusunun 405-ci Sahə Dəstək Briqadasının bölmələri yerləşir. Briqada Almaniya, Polşa, İtaliya, Hollandiya, Belçika və başqa yerlərdə arsenal və anbar bazaları şəbəkəsinə dəstək verən Avropa və Afrika teatrlarında ABŞ qüvvələri üçün əsas logistika operatorudur.
Öz növbəsində Pentaqon Ermənistana hərbi texnikanın ötürülməsi ilə bağlı məlumatı şərh etməkdən imtina edib. “ABŞ Ermənistanla münasibətlərimizi yüksək qiymətləndirir. Müdafiə Nazirliyi əməliyyat təhlükəsizliyi baxımından hərbi texnikanın hərəkətini şərh etmir”, - deyə ABŞ hərbi idarəsi “Armenpress” agentliyinin sorğusuna cavab olaraq bildirib.
Məlum olduğu kimi,2024-cü ilin əvvəlində ABŞ-Ermənistan birgə “Eagle Partner 2024” hərbi təlimləri keçirilib və həmin vaxtdan ABŞ ordusunun nümayəndəsi Ermənistan Müdafiə Nazirliyində fəaliyyətə başlayıb.
Surxay Əliyev
