Sahil Kərimli: “Bu təklifdə söhbət ən azı 6 ölkədən - Azərbaycan, Ermənistan, Gürcüstan, İran, Türkiyə və Rusiyadan gedir”
Ətrafımızda baş verən böhranlardan regionumuzun qorunması vacib məsələdir. Təəssüflər ki, onilliklər ərzində Cənubi Qafqaz qarşıdurma və düşmənçilik bölgəsi olub. Hazırda nisbətən sakit dövrdəyik və biz diqqətimizi buna yönəltməliyik.
Bu sözləri Prezident İlham Əliyev “Euronews” televiziyasına müsahibəsində deyib.
“Biz növbəti hərbi qarşıdurmanı istisna edəcək əhatəli təhlükəsizlik mexanizmləri yaratmalıyıq və Sovet dövründə olduğu kimi qonşuluq şəraitində yaşamağa çalışmalıyıq”, - deyə Prezident Əliyev əlavə edib.
Burda prezident Cənubi Qafqaz regionunda növbəti münaqişələrin yaranma ehtimalını istisna edəcək təhlükəlilik mexanizmlərinin yaranmasından danışır. Bu nə kimi hallarda mümkün ola bilər?
Nəzərə alsaq ki, bu təhlükəsizlik mexanizmi ən azından 6 dövlətə aiddir və bunun əhəmiyyəti nə qədər böyükdür. Söhbət ən azı 6 dövlətin - Azərbaycan, Ermənistan, Gürcüstan, İran, Rusiya və Türkiyənin təhlükəsizliyinin təminatından gedir.
Bir az da kənara çıxanda say çoxalar, bura Türkmənistan və başqa Mərkəzi Asiya ölkələri əlavə oluna bilər. Amma hazırda söhbət konkret ən azı 6 ölkədən gedir.
“Belə bir təhlükəsizlik mexanizminin hazırlanması və tətbiq edilməsi gələcəkdə bölgəmiz üçün sülh və təhülkəsizliyin təmin olunmasına ciddi töhfələr verəcək”
Siyasi ekspert Sahil Kərimli “Bakı-Xəbər”ə şərhində bildirdi ki, yeniləşən dünyada, tamamilə yeni düzənin yarandığı qlobal miqyaslı proseslərdə ilk növbədə bölgələrin təhlükəsizliyi böyük əhəmiyyət daşıyan mövzulardan biridir. “Bu gün dünyada hər bir ölkənin prioritet məsələsi təhlükəsizlik, təhlükəsizlik və yenə də təhlükəsizlikdir. Çünki dünyada baş verən müharibələr, qanlı toqquşmalar, hərbi təxribatlar və digər mənfi tendensiyalar bu gün hər bir ölkənin milli təhlükəsizliyinin qorunmasını gündəmə gətirir. Bu baxımdan, Azərbaycan da dünyada sülhə və təhlükəsizliyə çox böyük, əvəzsiz töhfələr vermiş bir ölkə kimi, eyni zamanda da öz milli təhlükəsizliyini qorumaq, bu istiqamətdə çox ciddi addımlar atmaq məcburiyyətindədir. Məlumdur ki, həm regionumuzda, həm Cənubi Qafqazın özündə hələ təhlükəsizlik və daimi sülh tamamilə oturuşmayıb. Bu istiqamətdə də ciddi problemlər var. İstər Ermənistanla Azərbaycan arasında sülh müqaviləsinin imzalanmaması, eyni zamanda bölgədə yerləşən digər ölkələrin, İranla ABŞ-ın qarşıdurması, Gürcüstan və Avropa İttifaqı arasında yaranan gərginlik, həmçinin Rusiya-Ukrayna müharibəsi. Yəni bölgənin ümumi xəritəsinə baxsaq bu gün təhlükəsizlik əsas müzakirə mövzularındandır. Bu baxımdan, Azərbaycan Prezidentinin yeni təhlükəsizlik mexanizminin yaradılması ilə bağlı təklifləri günümüz üçün çox böyük əhəmiyyət daşıyır. Prezident İlham Əliyevin belə bir təkliflə çıxış etməsi həm bölgə ölkələri, həm də Azərbaycanın özü üçün çox böyük önəm daşıyır. Bu təklifdə söhbət ən azı 6 ölkədən - Azərbaycan, Ermənistan, Gürcüstan, İran, Türkiyə və Rusiyadan gedir. Belə bir təhlükəsizlik mexanizminin hazırlanması və tətbiq edilməsi gələcəkdə bölgəmiz üçün sülh və təhülkəsizliyin təmin olunmasına ciddi töhfələr verəcək”.
S.Kərimlinin fikrincə, bu baxımdan, Azərbaycan həm dünyaya, həm də bölgəyə, region ölkələrinə sülh və təhlükəsizlik istiqamətində mühüm çağırışlar edir, eyni zamanda da bu yöndə öz əvəzsiz töhfələrini vermiş olur.
İradə SARIYEVA
