Fikrət Yusifov: “Bir türk dövlətinin türk düşməni ilə belə yaxınlıq etməsinin izahı yoxdur”
Özbəkistan prezidenti Şavkat Mirziyoyev və Fransa prezidenti Emmanuel Makron strateji tərəfdaşlıq haqqında bəyannamə, həmçinin dəyəri 12 milyard avrodan çox olan bir sıra sazişlər imzalayıblar.
Özbəkistan prezidenti Şavkat Mirziyoyevin Fransaya dövlət səfəri zamanı Şavkat Mirziyoyev və Emmanuel Makron strateji tərəfdaşlığın yaradılmasına dair birgə bəyannamə imzalayıblar. Dövlət başçıları məhdud tərkibdə ikitərəfli münasibətlərin perspektivlərini müzakirə ediblər. Tərəflər, həmçinin, nadir faydalı qazıntıların hasilatı və emalı, enerji və infrastruktur sahəsində birgə layihələrin işlənməsi haqda da razılığa gəliblər. Bu layihələrə 12 milyard avrodan çox vəsait ayrılacaq.
Ötən il Özbəkistan və Fransa arasında ticarət dövriyyəsi ilk dəfə olaraq 1 milyard avronu keçib, birgə müəssisələrin sayı isə 4 dəfə artıb. Təhsil sahəsinə xüsusi diqqət yetirilir. İmzalanan müqaviləyə əsasən, Daşkənddə Özbəkistan-Fransa universiteti açılacaq. Birbaşa reyslərin sayı da artacaq ki, bu da biznes, turizm və mədəni əlaqələrin genişlənməsinə səbəb olacaq. Səfər zamanı 10-dan çox saziş imzalanıb.
Məlum olduğu kimi, son illər Fransa Azərbaycana qarşı düşmən münasibət sərgiləyir. Bu baxımdan Özbəkistanın Fransa ilə strateji tərəfdaşlıq sazişi imzalaması Azərbaycanla Özbəkistanın strateji tərəfdaşlığına kölgə salırmı? Çünki bir belə yaxınlıq və əməkdaşlıq Azərbaycanın mənafelərinə haradasa toxunur.
“Fransa artıq on illərdir ki, Türkiyə və Azərbaycana qarşı açıq düşmən münasibətindədir”
Sözügedən məsələyə aydınlıq gətirən sabiq maliyyə naziri, professor Fikrət Yusifov “Bakı-Xəbər”ə açıqlamasında buna bir neçə aspektdən yanaşdı: “Dünyanın düzəninin dəyişdiyi indiki dönəmdə, türkdilli dövlətlərin Türkiyə başda olmaqla Türk Birliyi yaratmaq uğrunda səylərinin ortada olduğu bir vaxtda bir türk dövlətinin türk düşməni ilə belə yaxınlıq etməsinin izahı yoxdur. Fransa artıq on illərdir ki, Türkiyə və Azərbaycana qarşı açıq düşmən münasibətindədir. Belə bir ölkəyə Özbəkistan kimi türk dövlətinin bu münasibəti, açıq desək hər birimizin ürəyini sıxacaq bir hadisədir. Biz başa düşürük ki, hər bir ölkənin biznes maraqları ola bilər. Ancaq baxın, Türkiyə illərdir Ermənistanla əlaqələri bərpa etmir və bunun Azərbaycan-Ermənistan münasibətlərinin tənzimlənməsi ilə bağlı olduğunu açıq bəyan edir. Türk birliyi üçün bu çox yaxşı bir nümunədir. Başqa bir misal. Müstəqillik illərində biz dəfələrlə şahidi olmuşuq ki, Türkiyənin olmadığı masada Azərbaycan, Azərbaycanın olmadığı masada isə Türkiyə bir-birini açıq müdafiə edib. Belə olmalıdır. Məgər Özbəkistan Almaniya ilə eyni münasibətləri qura bilməzdimi? Avropada bu gün sürətlə inkişaf edən Özbəkistana istənilən ölkə yatırımlar etmək istəyər. Belə olan halda Özbəkistan nədən məhz Fransanı seçdi? İslam, türk dünyasının aparıcı ölkələrindən birinin bu addımları şəxsən məndə böyük təəssüf hissləri doğurdu. Türk dövlətləri türkün türkdən başqa dostu yoxdur - deyimini heç vaxt unutmamlı, beynəlxalq müstəvidə atdıqları hər addımın bu birliyə necə təsir edə bilməsinin fərqində olmalıdırlar. Real türk birliyi yartmağın yolları məhz belə yanaşımdan keçə bilər. Özbək qardaşlarımızın bu addımları bizim canımızı sıxdı. Yəqin onlar da bizim yerimizdə olsaydılar, eyni sıxıntını yaşayardılar”.
Vidadi ORDAHALLI
