Ceyhun Məmmədov: “İndiki şəraitdə dövlətlər belə bir prosesə getməyə məcburdur”
"Bu gün hər kəs tərəfindən bölüşülən fikir odur ki, hazırda yeni qaydaların müəyyənləşdirilməsi prosesi baş verir. Bildiyimiz dünya nizamı artıq mövcud deyil. Hələ ki, beynəlxalq ictimaiyyət tərəfindən istifadə olunacaq qarşılıqlı əlaqə konfiqurasiyası heç kəsə bəlli deyil. Buna dair fərqli fikirlər var".
Bu fikirləri Prezident İlham Əliyev “Euronews” televiziyasına müsahibəsində söyləyib.
Prezident Əliyev deyib: “Lakin aydın olan odur ki, birincisi, hər bir ölkə özünün daxili işlərinə və daxili imkanlarına daha çox diqqət ayırmalı, hər hansı bir yardıma və hətta beynəlxalq hüquqa arxalanmamalıdır. Beynəlxalq hüququn selektiv tətbiqinin qurbanı olan Azərbaycanın gələcəyini daxili resurslar hesabına qurması baxımından böyük təcrübəsi var.
"İkincisi, gələcək üçün vacib məsələlərdən biri odur ki, ölkələr beynəlxalq təsisatlar çərçivəsində fəaliyyətə deyil, ikitərəfli münasibətlərə daha çox əhəmiyyət verəcəklər. Çünki bu gün bəzi beynəlxalq təşkilatlar ya öz zəifliyini nümayiş etdirir və ya tamamilə iflic vəziyyətindədir. Əlbəttə, biz hələ ki, qlobal transformasiyanın ilkin mərhələsindəyik və bir çox məsələ hadisələrin gedişatından asılı olacaq".
Prezident bildirdi ki, indi dövlətlər əvvəla öz daxili işlərinə çox vaxt ayırmalıdır, ikinci, hər ölkə beynəlxalq təşkilatlara yox, ikitərəfli əlaqələrə daha çox diqqət ayırmalıdır.
“Beynəlxalq təşkilatlar ikiüzlü siyasət həyata keçirir və belə olduğu halda, bu gün ən önəmli məsələlərdən biri dövlətlərin öz aralarında münasibətləri inkişaf etdirməsidir”
Millət vəkili Ceyhun Məmmədov baki-xeber.com-a “Təəssüflə qeyd etmək lazımdır ki, bu gün növbəti dəfə dünya çox ciddi böhranlarla üz-üzədir. Azərbaycan bu problemlərdən ən çox əziyyət çəkən dövlətlərdən biridir. Beynəlxalq təşkilatlar daha çox ikili standartlarla məsələlərə yanaşan bir quruma, struktura çevriliblər. Bu da özü-özlüyündə ciddi narahatlıq doğuran məsələdir. Baxın, bu gün Avropa Şurasının ikiüzlülüyünü görürük, ATƏT uzun illər bu prosesə heç bir töhfə vermədi. Beynəlxalq təşkilatlar ikiüzlü siyasət həyata keçirir və belə olduğu halda, bu gün ən önəmli məsələlərdən biri dövlətlərin öz aralarında münasibətləri inkişaf etdirməsidir. Azərbaycan uzun illərdir, bu siyasəti uğurla həyata keçirir. Yəni biz bu gün bunun bütün istiqamətlərdə cənab Prezident tərəfindən uğurla icra olunduğunu görürük. Azərbaycan ayrı-ayrı ölkələrlə münasibətlərini ən yüksək səviyyədə qurmağa müvəffəq olub”-deyə bildirdi.
C.Məmmədov bildirdi ki, son günlər ayrı-ayrı ölkə liderlərinin Azərbaycana davamlı səfəri bu yanaşmanı, bu fikri bir daha təsdiq edir. “Biz ard-arda müxtəlif dövlətlərin rəhbərlərinin Azərbaycana səfərlər etdiyini və Azərbaycanla əlaqələri inkişaf etdirməyə çalışdığını görürük. Yəni bu olduqca önəmli, vacib bir məsələdir. Bu, Azərbaycanın uğuru kimi qiymətləndirilə bilər. Azərbaycan uzun illərdir ki, bu istiqamətlərdə proseslərə öz töhfəsini verməyə çalışır. Bu yöndə davamlı olaraq addımların atıldığını da görürük. Çünki bir daha qeyd edirik, təəssüf ki, indiki şəraitdə dövlətlər belə bir prosesə getməyə məcburdur. Ona görə də, bu gün Azərbaycanın Türkiyə, Orta Asiya respublikaları ilə, ayrı-ayrı dövlətlərlə bu proseslərdə fəal iştirakını aydın şəkildə görürük. Yəni hazırda Azərbayucan bu siyasəti tam uğurla və böyük uzaqgörənliklə davam etdirir, prosesə öz töhfəsini verir. Burda Azərbaycanın xüsusi rolunu, xüsusi mövqeyini qeyd etməliyik ki, Azərbaycan özünün nüfuzunu, özünün mövqeyini qorumaq üçün bütün zəruri addımları atır və gələcəkdə də atacaq. Bu birmənalı olaraq Azərbaycanın təhlükəsizliyinin qorunması, dövlətçilik ənənələrinin möhkəmləndirilməsi baxımından da olduqca önəmli bir məsələ, vacib bir məqamdır. Yəni qeyd etdiyimiz kimi, bu bizim dövlətçiliyimizin möhkəmləndirilməsi baxımından töhfə verəcək mühüm məsələlərdən biri kimi qiymətləndirilməlidir”-deyə C.Məmmədov qeyd etdi.
İradə SARIYEVA
